Mat. 11
11
Menge otaw insogò lekat ki Juan Memonyagay
Mat. 11:1-6; Luc. 7:18-23
1Penga te pegtoladà i Jesus te sempolò teg dowa tinoledaan din, timeped sikandin te menge lonsod medapag amon megtoladà te otaw kidoen.
2Nayan, dalem te pegkekeleboso ki Juan Memonyagay, inindanan sikandin tepad te eg-inangen te Misiyas. Pegdineg i Juan kenyan, insogò din se menge tinoledaan din meg-insà ki Jesus, 3kagi dan, “Sikona lay se ontò insogò te Timanem pinelimanan day, aw doen pa doma domateng?”
4Timaba si Jesus, “Likò kaw den doton ki Juan, aw indani niyo sikandin te kedita te dinineg niyo aw kinità niyo dini. 5Doen menge bota kimità den. Doen heman kapig minipanaw den. Doen tompigun negolian den. Doen bingelen dimineg den. Doen heman nematay neantay den. Doen menge otaw sagkep tinoledaan te Mèpiya Indan. 6Indani niyo heman sikandin te doen keluba te otaw eked pegdowa-dowa te pegsalig din kanak.”
Minikagi si Jesus tepad ki Juan Memonyagay
Mat. 11:7-19; Luc. 7:24-35
7Pegkesayo te otaw insogò i Juan, minikagi si Jesus tepad ki Juan diyà te otaw netipon, kagi din, “Pegdoton niyo te kebigtilan, kenà tigbaw egkedogen te kelamag se pinengemahà niyo. 8Wedà kaw heman doton amon tomengteng te otaw nenaol te ontò meelagà, so se menge otaw egpenaol te ontò meelagà, yan se eg-ogpà doton te balay te selotan. 9Meneng seini indà se tod niyo. Dimoton kaw te kebigtilan amon kitaen niyo se telekeliwat te kagi te Timanem. Pengkey melangkaw se kedita te telekeliwat te kagi te Timanem, meneng labi pa melangkaw si Juan. 10Sikandin se migtoladà tepad kanak, aw tinoman din se pakang seini tapay insolat kidoen te kagi te Timanem,
‘Na, doen otaw isogò ko megpetaga-taga te agpet ka den domateng, amon megpeketagad se kedita te otaw te pegdateng nikaw.’”
11Minikagi heman si Jesus, “Eneng-enengi niyo se kagi ko kenyo seini. Wedad palos otaw dini lanto te tanà labi pa melangkaw diyà ki Juan Memonyagay. Meneng labi pa melangkaw diyà ki Juan se kedita te otaw megpesakop diyà te peglowan te Timanem. 12,13Te wedà pa pegtoladà si Juan, gayed migtoladà se menge telekeliwat aw simolat heman si Moises te doen aldaw megtebò se Timanem lomowan. Pengkey lekat te pegtebò te pegtoladà i Juan lamig seini, ontò neibeg se menge otaw megpesakop diyà te peglowan te Timanem, aw medita den se otaw mebolot meibeg peden meg-agaw te peglowan din. 14Simpana nemenal kaw te inikagi te menge otaw gebii, netegahan niyo den te si Juan se timoman te intoladà dan te doen domateng iling te telekeliwat te kagi te Timanem gebii si Elias. 15Keilangan menenalan se kedita niyo doen telinga.
16“Nayan, seini se tegdeyanan iindan ko kenyo amon ketegahan niyo aw eden se pig-ilingan te menge otaw te aldaw seini. Iling dan te mengisù egdanga doton te pedyanan aw egpetewalay dan, 17‘Pengkey mig-edop kay te seluli amon somayaw kaw, meneng wedà kaw sayaw. Pengkey migdelangan kay tepad te pegkematay, meneng wedà kaw heman kelano.’ 18Iling heman kandan se menge otaw te aldaw seini, so pegdini i Juan Memonyagay, kinità dan se ketanem din te melikit egpowasa aw kenà palos heman eg-inem. Meneng wedà dan penenalan kandin, aw minikagi dan te dinetengan sikandin te bosaw. 19Pegdini ko Timanem Migpekeotaw, kinità dan se ketanem ko te egpengaen a aw eg-inem. Meneng kunù wedà dan penenalan kanak, aw minikagi dan te legoken a aw metiinem a, aw egsigelaken ko se menge iskribinti aw doma otaw nelegeb te salà. Meneng wedad beloyan, so ontò biyasa se Timanem, aw ketegahan iyan te kedita te otaw migpesakop diyà kandin aw komità dan te eg-inangen din.”
Menge otaw wedà pegselsel
Mat. 11:20-24; Luc. 10:13-15
20Penga niyan, neopal si Jesus te kedita te otaw eg-ogpà doton te menge lonsod ininangan din te keditaan te kepelahan, so wedà dan pegselsel te salà ininang dan. 21Minikagi sikandin, “Mekelelayò kaw tege Korasin. Mekelelayò kaw heman tege Bitsayda, so wedà kaw pegselsel. Aw impekità diyà te tege Tiro aw tege Sidon gebii se inang metolos impekità ko kenyo, nenaol den dan peden te sako aw migbodbod den dan peden te abo diyà te olo dan amon ipetaga-taga dan te migselsel dan te salà dan ontò medaet. 22Eneng-enengi niyo se kagi ko seini. Pengkey ipelumun te Timanem se tege Tiro aw tege Sidon, meneng labi kaw din pa ipelumun, so wedà kaw pemenal kanak. 23Sikiyo tege Kapirnaom, pengkey meibeg kaw megpelangkaw-langkaw taman te langit, meneng idagdag kaw doton te kilot. Aw impekità diyà te tege Sodoma se inang metolos impekità ko kenyo, migselsel den dan peden aw wedà heman kebàti se lonsod dan. 24Eneng-enengi niyo se kagi ko kenyo. Pengkey ipelumun te Timanem se tege Sodoma te modi aldaw tepad te salà dan ontò medaet, meneng labi kaw din pa ipelumun, so wedà kaw pemenal kanak.”
Diyà kaw kanak aw peg-etod kaw
Mat. 11:25-30; Luc. 10:21-22
25Penga niyan, migtawal-tawal si Jesus, kagi din, “Amà, Pengolo te kedita doton te langit aw dini heman te lanto te tanà, egpesiontong a diyà kamno, so wedà no petega-tegahi se kebenalan diyà te otaw biyasa aw dakel ontò netegahan, meneng impetaga-taga no den iyan diyà te otaw medanà. 26Iduyun ta Amà, so lekat iyan te ibeg nikaw ontò mèpiya.”
27Penga niyan, minikagi si Jesus, “Insalig te Amay ko se kedita diyà kanak. Se Amay ko, yan olò se netaga-taga te kedita tepad kanak, so Batà a din. Siak olò heman se netaga-taga te kedita tepad te Amay ko, aw eked ketaga-taga se otaw tepad kandin singed aw ipetaga-taga ko iyan diyà kandan.
28“Aw migkelomay kaw den tandà te pegpengibing niyo te ontò mebegat kidoen te pedowan niyo, diyà kaw den kanak, so ebaten ko iyan diyà kenyo amon mekeetod kaw den. 29Tiangi niyo se ipeibing ko kenyo iling te yogo, aw peg-iling kaw heman kanak, so ontò mèpiya se pedowan ko, aw mekeetod kaw. 30Mèpiya se ipeibing ko kenyo. Kenà mebegat se ipetiang ko kenyo.”
موجودہ انتخاب:
Mat. 11: mbs
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1982, Wycliffe Bible Translators, Inc. All rights reserved.