MATHAIA 28
28
Isua thawhleh thu
(Mk. 16:1-10; Lk. 24:1-12; Jn. 20:1-10)
1Sabat ni a lo ral a, Pathianni zînga khua a vâr dâwnin Magdala mi Mari leh Mari dang chu thlân en tûrin an kal a. 2Ngai teh, lîr nasa takin a lo nghîng a; Lalpa Vântirhkoh vân aṭangin a lo chhuk a, lung chu a rawn lum sawn a, a chungah a ṭhu ta a. 3A lan dân chu kâwlphe ang a ni a, a silhfênte chu vûr angin a vâr a. 4Amah an hlauh êm avângin vêngtute chu an khûr a, mitthi ang maiin an lo awm ta a. 5Vântirhkoh chuan hmeichhiate chu a bia a, “Nangni chuan hlau suh u, Isua an khenbeh kha in zawng tih ka hria e. 6Hetah a awm tawh lo ve, a sawi ang ngeiin kaihthawh a ni tawh a, a mutna hmun hi rawn en teh mah u. 7Tin, kal thuai ula, a zirtîrte hnênah, ‘Mitthi zîng ata kaihthawh a ni ta, Galili ramah a lo kal hmasa dâwn a, chutah chuan amah in hmu ang,’ ti ang che u. Ngai teh u, ka hrilh tawh che u hi,” a ti a. #Mt. 26:32; Jn. 21:1-23.
8Hlau leh lâwm êm êm chungin thlân aṭang chuan hmanhmawh takin an kal a, zirtîrte hrilh tûr chuan an tlân ta a. 9Ngai teh, Isuan anni chu a tâwk a, “Chibai u,” a ti a. Tichuan, a kephahte chu an vuan a, kûnin chibai an bûk a. 10Isuan an hnênah, “Hlau suh u, kal ta ula, Galili rama kal tûrin ka unaute va hrilh rawh u; chutah chuan mi hmu ang,” a ti a.
Vêngtute thu theh darh
11An kal lai chuan vêngtu ṭhenkhat chu khawpuiah an va lût a, thil lo thleng zawng zawng chu puithiam lalte an hrilh a. 12Upate nên an kal khâwm a, an inrâwn zawhin vêngtute chu tangka tam tak an pe a. 13“Zânah kan muthilh hlânin a zirtîrte an lo kal a, amah an ru ta a ni,” ti ang che u. 14Ramawptuin chu chu a lo hre ta a nih leh amah chu kan thlêm ang a, hlauhthâwn tûr nei lovin kan siam ang che u,” an ti a. 15Chutichuan, tangka chu an la a, an hrilh ang zêl chuan an ti ta a; tichuan, tûn thlengin chu thu chu Juda-te zîngah an la sawi darh ta zêl a ni.
Zirtîrte hnênah Isua a inlâr
(Mk. 16:14-18; Lk. 24:36-49; Jn. 20:19-23; Tirh. 1:6-8)
16Zirtîr Sâwmpakhatte chu Galili ramah, Isuan tlâng a ruatsakah chuan an kal a. #Mt. 26:32; Mk. 14:28. 17Amah an hmuh chuan kûnin chibai an bûk a; ṭhenkhat erawh chuan an ringhlel#28:17 ‘an tîm a’ tih theih a ni bawk. a. 18Isuan a rawn pan a, anni chu a bia a, “Lei leh vâna thuneihna zawng zawng pêk ka ni ta. #Mt. 11:27; Lk. 10:22; Fil. 2:9; Efe. 1:20-22. 19Tichuan, kal ula, hnam zawng zawng zirtîrah siam rawh u; Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u. #Mk. 16:15,16; Lk. 24:47; Tirh. 1:8. 20Tin, ngai teh u, kei, kumkhuain, khawvêl tâwp thleng pawhin, in hnênah ka awm zêl ang,” a ti a.#28:20 Mss ṭhenkhatah ‘Amen’ tih a tel.
موجودہ انتخاب:
MATHAIA 28: MIZCLBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.