MATHAIA 27
27
Pilata hnênah Isua an hruai
(Mk. 15:1; Lk. 23:1,2; Jn. 18:28-34)
1Zîng a lo nih chuan puithiam lalte leh vântlâng upa zawng zawng chuan Isua tihhlum dân tûr an rêl a: 2An phuar a, an kai a, Ramawptu Pilata#27:2 Mss ṭhenkhatah ‘Pontia’ tih a tel. hnênah an hruai a.
Juda thih thu
(Tirh. 1:18,19)
3A mantîrtu Juda chuan Isua chu thiam loh an chantîr tih a hriat veleh a inchhîr a, tangka sawmthum kha puithiam lalte leh upate a pe kîr leh a.#Mt. 26:15. #Tirh. 1:1-19. 4“Mi pawisawi lo thi tûra ka mantîr kha ka lo tisual a ni,” a ti a. Anni erawh chuan, “Chu chu kan tân eng nge pawi ang? Nangin i tih tihin ti rawh,” an lo tihsan a. 5Tichuan, tangka chu Hmun Thianghlimah a paih lût a, a kal a, a va inâwk hlum ta a. 6Puithiam lalte chuan tangka chu an la a, “Hei hi Tempul tangka bâwma dah a thiang lo ve, thisen man a ni si a,” an ti a.#Deut. 23:18. 7Tichuan, an inrâwn a, mikhual phûm nân bêlvawtu hmun an lei ta a. 8Chuvângin a ni, chu hmun chu, tûn thlengin ‘Thisen hmun’ an tih tâk ni.
9Chutichuan, zâwlnei Jeremia hmanga sawi kha a lo thleng ta a ni:
“Israel fa tuten emaw
Tangka sawmthum an chhiara
Man chu an la a, #Zak. 11:12,13; Jer. 32:6-15.
10Lalpan thu a pêk ang khân
Bêlvawtu hmun manah an pe a,” a tih hi.
Pilatan Isua a chhâl
(Mk. 15:2-5; Lk. 23:3-5; Jn. 18:33-38)
11Isua chu Ramawptu hmaah chuan a ding a, Ramawptu chuan, “Juda-te lal i ni maw?” tiin a zâwt a. Isuan a hnênah, “I sawi chu,” a ti a. 12Puithiam lalte leh upate hêkna chu a enga mah a chhâng lo. 13Tichuan, Pilatan a hnênah, “An hêkna zozai che hi i hre lo vem ni?” a ti a. 14Nimahsela, a chhâng hlek lo va, an hêkna pakhat mah a chhân loh avâng chuan mak a ti êm êm a.
Isua tihhlum tûra thupêk
(Mk. 15:6-15; Lk. 23:13-25; Jn. 18:19—19:16)
15Ramawptu chuan kût niin mi tâng pakhat an dîl apiang a chhuahsak ṭhîn a. 16Chumi lai chuan mi hmingthang tak Baraba#27:16 Mss ṭhenkhatah ‘Isua Baraba’ tih a ni. an tih chu lung inah a tâng a. 17Tichuan, an lo pung khâwm chu Pilatan, “Tu nge chhuahsak che u ila in duh, Baraba nge Isua, Krista an tiha hi?” a ti a. 18Îtsîkna avângin ani chu a hnênah an rawn hlân tih a hre si a.
19Rorêlnaa a ṭhut laiin Pilata nupuiin, “Kha mi fel tak chungah khân eng mah ti suh; vawiin hian amah avângin mumangah thil tam tak ka tuar a ni,” tiin a rawn chah bawk a. 20Puithiam lalte leh upate chuan Baraba chu chhuaha, Isua chu tiboral tûra ngên tûrin mipuite chu an thlêm thlu ta a. 21Ramawptu chuan an hnênah, “Anni pahnih hi a tu zâwk hi nge chhuahsak che u ila in duh?” a ti leh a. 22Anni chuan, “Baraba,” an ti a. Pilatan an hnênah, “Isua, Krista an tih hi, engtin nge ka tih tâk ang le?” a ti a. An za-in, “Krawsah khêngbet rawh,” an ti a. 23Ramawptu chuan, “Engah maw, eng nge a tihsual ni?” a ti a. Nimahsela, mipui chu, “Krawsah khêngbet rawh,” tiin an au ta tuar tuar a.
24Tichuan, Pilatan engtia tih mah a sâwt lo va, buaina a chhuak mai dâwna a hriatin, tui a la a, mipui hmaah chuan a kut a sil a, “He mi fel#27:24 Mss ṭhenkhatah ‘fel’ tih hi a tel lo. thisenah hian ka hul e, nangnin in tih tihin ti rawh u,” a ti a.#Deut. 21:6-9; Sam. 26:6. 25Mipui chuan an za-in, “A thisen mawh chu keimahni chungah leh kan fate chungah awm rawh se,” tiin an chhâng a.#Tirh. 5:28; Jos. 2:19. 26Tichuan, Baraba chu a chhuahsak a; Isua erawh chu sipaite a vuaktîr a, krawsa khenbeh tûrin an kutah a pe ta a.
Sipaiten Isua an sawisa
(Mk. 15:16-20; Jn. 19:2,3)
27Tichuan, Ramawptu sipaite chuan Isua chu praitorian-ah#27:27 Praitorian hi Ramawptu in chhûnga sipai awmna a ni ang. an hruai lût a, an pâwla mi zawng zawng a bulah an au khâwm a. 28A kawr an hlihsak a, kawrfual senduk an hâktîr a. 29Chawimawina atân hlîng an kual a, an khumtîr a, a kut ding lamin tiang an kentîr a, a hmaah an ṭhingṭhi a, “Chibai, Juda-te lal,” tiin nuihza siam nân an hmang ta a. 30Ani chu chil an chhâk a, tiang chu an lâksak a, a luah an vua a. 31Nuihza siam nân an hman zawhin kawrfual chu an hlihsak a, ama kawr chu an hâktîr leh a, krawsa khenbeh tûrin an hruai ta a.
32Kalkawnga an kal laiin Kurini khuaa mi, a hming Simona an hmu a, Isua kraws putsak tûrin an man a.#Heb. 13:12. 33Golgotha, ‘Luruh hmun’ an tih chu an va thleng a; 34Chutah chuan uain, thil kha nêna pawlh a in tûrin an pe a; a han tem a, a in duh ta lo va. #Sam. 69:21. 35An khenbeh zawhin a silhfênte chu ṭhumvâwrin an insem a. #Sam. 22:18. 36Chutah chuan an ṭhu a, amah chu an vêng a. 37Amah hêkna, ‘He mi hi Isua, Juda-te lal a ni,’ tih ziak a lu chungah chuan an bel a.
38A rual chuan suamhmang pahnih krawsah an khêngbet ve a, a ding lamah pakhat, a vei lamah pakhat. 39Mi veivâk nuk nukte chuan an lu an thing a, an tiel a. #Sam. 22:7,8; 109:25. 40“Nang, Tempul hi ṭhiata ni thuma din leh theitu, intidam rawh. Pathian Fapa i nih meuh chuan kraws ata kha lo chhuk ta che,” an ti a. #Mt. 26:61; Jn. 2:19; Tirh. 6:14. 41Chutiang bawkin puithiam lalte chuan Dân zirtîrtute leh upate nên nuihzatin, 42“Mi dang mah tidam ṭhîn, mahni lah intidam thei si lo! Israel lal alâwm, tûnah hian kraws ata lo chhuk sela kan ring ang chu! 43Pathian a ring alâwm, amah hi a duh chuan tûnah chhan chhuak ang hmiang, ‘Pathian Fapa ka ni,’ a ti si a,” an ti a.#Sam. 22:8; Fil. 2:18-20. 44Suamhmang khenbehte pawh chuan chutiang bawkin an tiel ve a.
Isua a thi
(Mk. 15:33-41; Lk. 23:44-49; Jn. 19:28-30)
45Dâr sâwm leh pahnih aṭanga tlai dâr thum thlengin khawvêl pum pui a thim ta vek a. 46Tlai dâr thum vêlah chuan Isua chu ring takin a au chhuak a, “Eli, Eli, lema sabakthani” a ti a; chu chu, ‘Ka Pathian, ka Pathian, engah nge mi kalsan?” tihna a ni. #Sam. 22:1. 47A kianga ding ṭhenkhat chuan chu chu an hriatin, “He mi hian Elija a ko va ni,” an ti a. 48An zînga pakhat chu a tlân nghâl a, sponj#27:48 Sponj hi âwmpâwng ang deuh tui tam tak fûn thei a ni. a la a, uain thûrah a chiah a, tiangah a târ a, Isua chu intîr a tum a.#Sam. 69:21. 49Mi dangte chuan, “Ngawi rú, amah chhan tûrin Elija a lo kal emaw i en ang u,” an ti a. 50Isua chu ring takin a au leh a, a thlarau a thlah ta a.
51Ngai teh, Tempul chhûng puanzâr chu a chung lam aṭangin a hnuai lam thlengin a thlêr thla a; lîr a lo nghîng a, lungpuite a khi chat a. #Exod. 26:31-33; Heb. 9:8; 10:19. 52Thlânte a lo inhawng a, mi thianghlim muhîl tawhte taksa tam tak pawh kaihthawh a ni ta a. 53A thawhleh hnuah chuan chûngte chu thlân ata lo chhuakin khaw thianghlimah chuan an lût a, mi tam tak hnênah an inlâr a. 54Sipai za hotu leh a bula Isua vênga awm vete chuan, lîrnghîng leh thil lo thlengte chu an hmuhin an hlau ta êm êm a, “He mi hi Pathian Fapa a ni ngei mai,” an ti a.
55Chutah chuan hmeichhe tam tak, a rawngbâwla Galili aṭanga Isua rawn zuitute chu an awm bawk a, hla tak aṭangin an thlîr a. #Lk. 8:2,3. 56Chûng zîngah chuan Magdala mi Mari te, Jakoba leh Josia#27:56 Mss ṭhenkhatah Josea nu tih a ni. nu Mari te an tel a, Zebedaia nupui pawh a tel a.
Isua an phûm
(Mk. 15:42-47; Lk. 23:50-56; Jn. 19:38-42)
57Tlaiah chuan Arimathai khuaa mi hausa pakhat, a hming Josefa a lo kal a, ani pawh chu Isua zirtîr a ni bawk a. 58Chu mi chu Pilata hnênah a va kal a, Isua ruang chu a dîl a. 59Pilata chuan a lo phal a. Tichuan, Isua ruang chu Josefa chuan a hlâwm a, puan zai sîn fai takin a tuam a, 60ama thlân thar, lung a ker kuakah chuan a zalh a; thlân kawngka chu lung lian takin a khâr a, a kalsan ta a. 61Chutah chuan Magdala mi Mari leh Mari dang chu an awm ve a, thlân hma zâwnah chuan an ṭhu a.
Thlân vêngtu sipaite
62A tûk, Sabat ni chuan puithiam lalte leh Farisai-te chu a huhovin Pilata hnênah an kal a 63“Ka pu, Tihdertua khân a dam laiin, ‘ni thum chinah ka tho leh ang,’ a tih kan hre reng a ni. #Mt. 16:21; 17:23; 20:19; Mk. 8:31; 9:31; 10:3-34; Lk. 9:22; 18:31-33. 64Chuvângin, thlân chu ni thum ni thlenga vêng ṭha tûrin thu pe rawh; chuti lo chu a zirtîrten amah chu#27:64 Mss ṭhenkhatah ‘zânah’ tih a tel. an va ru hlauh ang a, vântlâng hnênah, ‘Mitthi zîng ata a tholeh ta a ni,’ an ti dah ang e; tichuan, tihderna hnuhnûng zâwk chu a hmasa ai khân a ṭha lo lehzual ang,” an ti a. 65Pilatan an hnênah, “Vêngtute in nei alâwm,#27:65 ‘Vêngtu sipaite chu in nei alâwm’ tih theih a ni. kal ula, ṭha in tih ang apiangin vêntîr rawh u,” a ti a. 66Chutichuan, an kal a, thlân khârna lung chu an chhinchhiah a, vêngtute chu an vêntîr ta tlat a.
موجودہ انتخاب:
MATHAIA 27: MIZCLBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.