Jaikopɨ dara wɨ'nake' “Sekɨmɨ nɨmɨre taaya' ata lɨmwanna jɨwaka!” Dɨna kya' gawaalɨvava pɨba yɨbwa'nadapɨjɨ navɨka mwaala'. Jɨlɨkyaawarya maremwaaidɨvɨsara gawaalɨvava bɨna yeva ku'ne' sɨnna tɨka naanga wɨdava'. Sɨnna tɨka kudava' sa' Aamo Jaikopɨmɨre gawaalɨvavaavɨ wɨda' “Sekɨmɨ nyɨbwaalɨvɨne Taaya Daaina' nyɨjaama! Gannya a'mwe' maaradelyɨ. Sarɨmɨ yagaala sara nyɨjide' sara yɨhɨzaavɨdesɨra.” Mi'na kuda' Jaikopɨmɨre gawaalɨvava kwaasɨ wɨdɨna “Nemɨ yuyaina kɨlaaka pɨkarya neyɨnɨkeinera. Sarɨmɨ kɨlaaka pɨkarya kada'napɨjɨ Daaina' Sekɨmɨmɨne' yɨhɨzavaadesɨra.” Sara wɨdɨna kye' Aamojɨ Sekɨmɨ gawaalɨsɨ saraai yɨlaaya yagi. Kɨrɨnnya angewɨnna wawagɨla kɨrɨmɨre a'mweraavɨ wɨdahi “Jaikopɨmɨre gawaalɨvava sara nehɨthɨwaasa' sara yaana! Dɨvidaasɨ Jaikopɨmɨre gɨlyɨvɨsa maraadengɨra.” Sara dɨneva angeba Sekɨmɨ mwaalyara kunnya kɨlaaka pɨkarya da'ne'. Kada'ne' kɨlaaka daanga wɨvɨdaa'nyɨ Daainavɨre gya'mweraai Sɨmɨyanɨ Livaai saraai wɨlaabahɨla Sekɨmɨ mwaalyaraavɨ tamakɨna yagi. Tamakɨna kyagi Jaikopɨmɨ gawaalɨvava beva Sekɨmɨmɨre angevɨdaasɨ Daaina' makuna ye'. Nabaai a'mwejɨ kaimɨraayajɨ Sekɨmɨ mwaalyaraavɨre gɨlyɨvɨsajɨ makwawe'. Jaikopɨ a'mwe pwaraavɨna lɨka yaka gawaalɨvavaavɨ mayagaala wɨdɨna. Mayagaala wɨdɨna kya' “Sekɨmɨ neya'mwevɨ kayaa'nanaanga yakelyɨra,” wɨde'.