Romans 8 سے مشہور بائبلی آیات

شئیر

ဘုရားရှင်အား ချစ်မြတ်နိုး၍ ကိုယ်တော်၏အကြံတော်နှင့်အညီ ခေါ်ယူရွေးကောက်ခြင်းကို ခံရသောလူတို့ တွေ့ကြုံခံစားရသည့် အမှုတော်ခပ်သိမ်းတို့မှ အကျိုးပေါ်ထွက်လာစေရန် ကိုယ်တော်သည် သူတို့နှင့်အတူ လုပ်ဆောင်တော်မူကြောင်းကို ကျွန်ုပ်တို့သိကြ၏။

အဘယ်ကြောင့်ဆိုသော် မည်သည့်အရာကမျှ ကျွန်ုပ်တို့အား ကိုယ်တော်၏မေတ္တာတော်နှင့် မကွဲကွာစေနိုင်ပေ။ သေဆုံးခြင်းဖြစ်စေ၊ အသက်ရှင်ခြင်းဖြစ်စေ၊ နတ်ဒေဝါများဖြစ်စေ၊ ကောင်းကင်အာဏာပိုင်ဖြစ်စေ၊ ပစ္စပ္ပန်အရာဖြစ်စေ၊ အနာဂတ်အရာဖြစ်စေ၊ ကောင်းကင်အထက်တွင်ရှိသည့် အရာဖြစ်စေ၊ မြေအောက်အရာဖြစ်စေ၊ ဖန်ဆင်းထားသော မည်သည့်အရာပင်ဖြစ်စေ၊ ကျွန်ုပ်တို့၏အရှင် ခရစ်တော်ယေရှုအားဖြင့် ဘုရားရှင်ဖော်ပြတော်မူသော မေတ္တာတော်နှင့် ကျွန်ုပ်တို့အား ကွဲကွာခြင်းမရှိစေနိုင်ဟု ကျွန်ုပ်သည် အမှန်ပင်သိသောကြောင့်ဖြစ်သည်။

ထိုနည်းတူပင် ဝိညာဉ်တော်သည်လည်း အားနည်းသော ကျွန်ုပ်တို့အား ကူညီမစရန် ကြွလာတော်မူ၏။ ကျွန်ုပ်တို့သည် မည်သို့ဆုတောင်းရမည်ကို မသိကြပေ။ နှုတ်အားဖြင့် မြွတ်ဆိုဖော်ပြရန် မဖြစ်နိုင်သော ညည်းတွားသံဖြင့် ဝိညာဉ်တော်ကိုယ်တိုင်ပင်လျှင် ကျွန်ုပ်တို့အတွက် ဘုရားရှင်ထံတွင် အသနားခံတော်မူ၏။

အထက်ပါအချက်များကို ထောက်ရှု၍ မည်သို့ဆိုရမည်နည်း။ ဘုရားရှင်သည် ကျွန်ုပ်တို့ဘက်၌ ရှိတော်မူလျှင် မည်သူကမျှ ကျွန်ုပ်တို့အား ဆန့်ကျင်နိုင်မည် မဟုတ်ပေ။

သို့ဖြစ်၍ ခရစ်တော်ယေရှုနှင့် တစ်လုံးတစ်ဝတည်း ဖြစ်သောသူတို့သည် ဘုရားရှင်၏ အပြစ်ဒဏ်စီရင်ခြင်းနှင့် ယခုတွင်ကင်းလွတ်ကြ၏။

ဇာတိသဘောနှင့်ဆိုင်သော အရာများအား စိတ်စွဲလမ်းသူသည် အသက်သေဆုံးလိမ့်မည်ဖြစ်၏။ ဝိညာဉ်တော်နှင့် ဆိုင်သော အရာများကိုသာ စိတ်စွဲလမ်းသောသူတို့မမူကား အသက်ရှင်သန်၍ ငြိမ်သက်ခြင်းကိုရရှိလိမ့်မည်ဖြစ်၏။

ကျွန်ုပ်တို့သည် သိုးများကဲ့သို့ ကွဲကွာခြင်းမရှိကြသည်သာမက ထိုအတွေ့အကြုံတို့နှင့် ရင်ဆိုင်ကြရာတွင်လည်း ကျွန်ုပ်တို့အား ချစ်တော်မူသော အရှင်အားဖြင့် အထူးပင်အောင်မြင်လျက်ရှိကြ၏။

ယခုမျက်မှောက်ကာလ၌ ကျွန်ုပ်တို့ခံနေကြရသည့် ဒုက္ခဆင်းရဲတို့အား နောင်အခါ၌ ကျွန်ုပ်တို့အား ပေါ်လွင်ထင်ရှားမည့် ဘုန်းအသရေတော်နှင့် ကျွန်ုပ်တို့ထံတွင် ပေါ်လွင်ထင်ရှားမည့် ဘုန်းအသရေတော်နှင့် နှိုင်းယှဉ်၍မရဟု ကျွန်ုပ်ယုံကြည်ပါ၏။

သို့ဖြစ်၍ မည်သူသည် ကျွန်ုပ်တို့အား ခရစ်တော်၏ မေတ္တာတော်နှင့် ကွဲကွာစေနိုင်မည်နည်း။ ဒုက္ခရောက်ခြင်း၊ ကျဉ်းကျပ်ခြင်း၊ အညှဉ်းပန်းခံရခြင်း၊ ငတ်မွတ်ခြင်း၊ ဆင်းရဲနွမ်းပါးခြင်း၊ ဘေးအန္တရာယ်နှင့်ကြုံတွေ့ခြင်း၊ ကွပ်မျက်ခံရခြင်းတို့သည် ကိုယ်တော်၏မေတ္တာတော်နှင့် ကျွန်ုပ်တို့အား ကွဲကွာစေနိုင်မည်လော။

လူတို့၏ စိတ်နှလုံးကို သိမြင်တော်မူသော ဘုရားရှင်သည် ဝိညာဉ်တော်၏ စိတ်သဘောကိုလည်း သိမြင်တော်မူ၏။ အဘယ်ကြောင့်ဆိုသော် ဝိညာဉ်တော်သည် ဘုရားရှင်၏အလိုတော်နှင့်အညီ ကိုယ်တော်၏ လူမျိုးစုများအတွက် အသနားခံတော်မူသောကြောင့်ဖြစ်သည်။

ဘုရားရှင်၏ဝိညာဉ်တော် ရှေ့ဆောင်လမ်းပြမှုကို ခံယူကြသောသူတို့သည် ဘုရားရှင်၏သားသမီးများ ဖြစ်ကြ၏။

လူ့ဇာတိသဘော၏ စေခိုင်းမှုအရ အသက်ရှင်သူတို့သည် လူ့ဇာတိသဘောနှင့်ဆိုင်သော အရာများကိုသာ စိတ်စွဲလမ်းကြ၏။ သို့ရာတွင် ဝိညာဉ်တော်၏ ညွှန်ကြားချက်အရ အသက်ရှင်ကြသူတို့မူကား ဝိညာဉ်တော်အလိုရှိသည့် အရာများသာ စိတ်စွဲလမ်းကြ၏။

မိမိ၏ သားတော်အရင်းကိုပင် နှမြောခြင်းမရှိဘဲ ကျွန်ုပ်တို့ရှိသမျှအတွက် ပူဇော်သက္ကာအဖြစ် ပူဇော်တော်မူသောဘုရားရှင်သည် ကျွန်ုပ်တို့အား ဆန့်ကျင်မည် မဟုတ်ပေ။ ကျွန်ုပ်တို့အတွက် တပါးတည်းသော သားတော်အား ပူဇော်သော ဘုရားရှင်သည် အရာခပ်သိမ်းတို့အား ကျွန်ုပ်တို့အား မပေးအပ်ဘဲ မည်သို့ နေတော်မူမည်နည်း။

ကျွန်ုပ်တို့သည် ဘုရားရှင်၏ သားသမီးများ ဖြစ်ကြကြောင်းကို ဝိညာဉ်တော်ကိုယ်တိုင်ပင်လျှင် ကျွန်ုပ်တို့၏ ဝိညာဉ်နှင့်အတူ သက်သေခံတော်မူ၏။ ကျွန်ုပ်တို့သည် ဘုရားရှင်၏ သားသမီးများဖြစ်ကြသဖြင့် ကိုယ်တော်၏ လူမျိုးတော်အတွက် ကိုယ်တော်လျာထားတော်မူသော ကောင်းချီးမင်္ဂလာများကို ခံစားရကြမည်။ ခရစ်တော်အတွက် ဘုရားရှင် လျာထားတော်မူသည့် ဂုဏ်အသရေကိုလည်း ခံစားရကြမည်ဖြစ်၏။ အဘယ်ကြောင့်ဆိုသော် ကျွန်ုပ်တို့သည် ခရစ်တော်နှင့်အတူ ဝေဒနာခံစားကြလျှင် ကိုယ်တော်နှင့်အတူ ဘုန်းအသရေတော်ကို ခံစားရကြမည် ဖြစ်သောကြောင့်ပင်ဖြစ်၏။

ဇာတိသဘောဆိုင်ရာ အရာများကို စိတ်စွဲလမ်းသူသည် ဘုရားရှင်အား ရန်ဖက်ပြုသူဖြစ်၏။ ထိုသို့ စိတ်စွဲလမ်းသူသည် ဘုရားရှင်၏တရားတော်ကို မလိုက်လျှောက်တတ်ပေ။ အမှန်ပင် လိုက်လျောက်နိုင်ခြင်း မရှိကြပေ။

ဘုရားရှင်သည် မိမိ၏သားသမီးများကို ပေါ်လွင်ထင်ရှားစေမည့် အခြင်းအရာကို အဖန်ဆင်းခံ ကမ္ဘာလောကတစ်ခုလုံးက အလွန်လိုလားစွာဖြင့် စောင့်မျှော်လျက်ရှိ၏။

အဖန်ဆင်းခံဖြစ်သည့် ကမ္ဘာလောကတစ်ခုလုံးသည် သားဖွားခြင်းဝေဒနာကဲ့သို့ ပြင်းထန်သောဝေဒေနာဖြင့် ယခုအချိန်တိုင်အောင် ညည်းတွားလျက်ရှိကြောင်း ကျွန်ုပ်တို့သိကြ၏။