1 CORINTIOS 15 سے مشہور بائبلی آیات

شئیر

Entonces, key hermano n-oc cyakꞌa weya, jaxte ko camal tibaj il bix tibaj cyamecy. Yaaꞌn tuꞌn kcyaj tuj cyamecy. Juꞌ tzunj chi weꞌxixa tuj kocslabl tiꞌ Kaaw, tuꞌntzen miꞌn chi cub tzꞌaka. Bix chi akꞌananxa tuya cykil cyanema tuj taakꞌen Kaaw, cuma yaaꞌn nuk kajx nko akꞌanan.

Pero chjonte te Kman Dios o tzaj tkꞌoꞌn coꞌpbil ke tuꞌn miꞌn koꞌx tuj tkꞌab taaw il tuꞌnj e baj bint tuꞌn Kaaw Jesucristo.

Pero yaaꞌn juꞌwa. Miꞌn chi oc tzpeta tuꞌn cyyol kej xjal tzin cykbaꞌn miꞌn ko jatz itzꞌj tuj cyamecy, cuma ka n-oc cybiꞌna cyyol, cxeꞌl xitj cynaabla.

Pero amale minttiiꞌ wajbela tuꞌn woca te t-xel Jesús, pero tuꞌn t-xtalbil Dios wibaja o tzꞌoc woclena te t-xel Jesús. Bix yaaꞌn nuk tajx o tzꞌoc tkꞌoꞌn Cristo weya tuꞌn woca te t-xel, cuma o chin najbeꞌna mas tiꞌ tkꞌumj tyol Dios cywitz niyꞌtl t-xel Jesús. Pero min e najbeꞌna tuꞌn wexa wipemala, sino tuꞌn tipemal Dios.

Juꞌ tzunj, oj kjatz itzꞌj tuj cyamecy, bixsen ko al meltzꞌaj xmucchal tiꞌ taaw cyamecy. Cxeꞌl kkbaꞌn: “Taaw cyamecy, ¿ti e baj tey? E tajbey tuꞌn ktzyeta tuꞌna, pero min e camana. ¿Tiiꞌn o txiꞌj tipemala tuꞌn toc is̈j kiꞌja?” tz̈i kbel. Yaltzen tipemal taaw cyamecy, ¿titzen jilel tipemal taaw cyamecy tuꞌn toc tis̈jsaꞌn ejooꞌ jaꞌlewe? Jaj tuꞌn tbinchaj il kuꞌn, bix j-il nxiꞌ tiiꞌn ejooꞌ tuj cyamecy. Tzin tyeecꞌan tley Dios at nim kil, bix tuꞌn kil, at tuꞌn kxiꞌ tuj cyamecy.

Juꞌ tzunj cxeꞌl nkꞌumena cyey jun tumel o tzaj tyeecꞌan Dios weya. Amale yaaꞌnt cykilca koꞌ ocslal ko cymel, pero cykilca kxumlal cchꞌixpetel. Jlu pjel tuj ajkelbil, nuk tisen ncub yutzꞌpaj ttzi kwitz. Tzul jun kꞌij oj tkꞌajt tzunj mancꞌbil tkꞌajkꞌajel xux. Oj tkꞌajt xux, cykilca t-xjal Dios cyimne chi jawetz itzꞌj bix mlay chi cyim juntl maj. Kej ocslal mitknaꞌx cycyim jax ko chꞌixpetel tuya jun acꞌaj kxumlal, pero miꞌn ko cyim. Te tzunj kꞌij tzul cchꞌixpetel cykilca koꞌ ocslal.

Cykilca xjal twitz txꞌotxꞌ il tiꞌj chi cymel tuꞌn il cuma oc il twitz txꞌotxꞌ tej tcub tzꞌak tneel kxeꞌchel tuj il. Juꞌtzen tuꞌn jun xjal e tzyet cyamecy twitz txꞌotxꞌ. Pero jax tuꞌn jun xjal tzul coꞌpbil ke tuj cyamecy laꞌ alcye jun kꞌij. Juꞌ tzunj, nko cyim, cuma tiyꞌjil Adán koꞌ. Pero tuꞌntzen kkꞌon kiib tuya Cristo, ko itzꞌjel juntl maj.

Cyjel kkꞌoꞌn jkxumlal nxiꞌ tuj cyamecy tuꞌntzen kocx tuj jun kxumlal miꞌn kꞌey, acꞌaj, bix mintiiꞌ tbajlel.

Maxetzen cxeꞌl tkꞌoꞌnxin tcawbilxin te tmanxin, il tiꞌj ccawelxin, cuma mlay txiꞌ tkꞌoꞌnxin tcawbilxin te tmanxin te mitknaꞌx tcamanxin tibaj cykil kej nchi kꞌojl tiꞌjxin. Bix mancꞌbiltzen ccamalxin tiꞌj mintiiꞌtl cyamecy.