१ पत्रुस 1 سے مشہور بائبلی آیات

شئیر

हमार प्रभु येशू ख्रीष्टके बाबा और परमेश्वरहे प्रशंसा होए। परमेश्वर अपन महान कृपासे हम्रिहिन्हे लावा जीवन देले बताँ। काकरेकी परमेश्वर येशू ख्रीष्टहे मुअलमेसे फेनदोस्रे जिवैलाँ। ऊ हम्रिहिन्हे निर्धक्कसे जिअक लग सक्षम बनैले बताँ; उ कलक ऊ हम्रिहिन्हे वाचा कर्लक बात भेटैना पूरा आशा करना हो। परमेश्वर हमार लग तयार पर्लक सक्कु मजा चिज भेटाइक लग हम्रे आसरा हेरती। उ चिजनहे केऊ फेन नाश करे नै सेकी। ओइन्हे कुछु चिज फेन बिगारे नै सेकी। उ चिज कबु फेन पुरान या नै सुग्घुर नै हुइहीँ। परमेश्वर उ चिजनहे तुहुरिन्के लग स्वर्गमे धर्ले बताँ।

तुहुरे यहे सक्कु बातमे खुशी हुई परत, तभुन फेन अब्बे कुछ समयक लग तुहुरिन्हे बहुत मेरके दुःख सहे परी। यी समस्यनके उद्देश्य यी देखाइक लग हो कि तुहुरे जात्तिकमे परमेश्वरकेमे भरोसा करथो। येशू ख्रीष्टकेमे तुहुरिन्के विश्वास सोनसे फेन धेउर मोलके बा। जसिके नाश होजिना सोनहे आगीलेके जाँचजाइत और निखारजाइत। ओस्तेहेँके जब तुहुरिन्के विश्वास समस्यामे फेन बल्गर पलिरहत कलेसे, येशू ख्रीष्ट फिर्ता अइना दिनमे यी तुहुरिन्हे बहुत्ते प्रशंसा, महिमा और सम्मान लेके आई।

पर आब तुहुरे अपन करना हरेक बातमे पवित्र हुई परत, जसिके परमेश्वर पवित्र बताँ, जे तुहुरिन्हे अपन लरका बनाइक लग चुन्लाँ। काकरेकी पवित्र शास्त्रमे असिके लिखल बा, “तुहुरे पवित्र हुई परत, काकरेकी मै पवित्र बतुँ।”

अपन दाईबाबक आज्ञा पालन करुइया मजा लर्कनके हस तुहुरे फेन परमेश्वरके आज्ञा पालन करो। तुहुरे परमेश्वरके सच्चाई नै जानल समयमे अपन इच्छा अनुसार कर्ती रहल खराब काम आब तुहुरे ना करो।

तबेकमारे तुहुरे का करतो कहिके मजासे सोँचो, और अपनहे नियन्त्रण करो। मुक्ति भेटैना आशा करो, जोन मुक्ति अनुग्रहसे आइत, जोन मुक्ति तुहुरिन्हे येशू ख्रीष्ट यी संसारमे फिर्ता अइलक दिनमे देजाई।

काकरेकी पवित्र शास्त्रमे असिके लिखल बा, “सक्कु मनै घाँस जसिन हुइँत, और ओइन्के सक्कु गौरव घाँसक फूला हस हुइतिन। घाँस सुख जाई, और फूला भुइयाँमे झरजाई, पर प्रभुक वचन सदासर्वदा पलिरहत।” और तुहुरिन्हे प्रचार करगिलक खुशीक खबरके वचन यहे हो।