ruma 1 سے مشہور بائبلی آیات

شئیر

ur‑a‑tḥšamġ s‑lh̬bar‑ad ifulkin, ašku iga taḥkimt itjhhdn n‑rbbi lli‑s‑a‑ijjnjam kullu wanna yumnn, ayt‑yudaya imzwura ula ayt‑tmizar yaḍni.

ar‑aġ‑imala lh̬bar‑ad mamnk a‑s‑a‑iskar rbbi sslamt ġ‑gras d‑willi umnnin, ar‑tt‑iskar f‑ssibt l‑liman‑nsn ġmklli ityaran, inna rbbi: «wanna yumnn, nttan a‑f‑rad‑rḍuġ fkġ‑as tudrt.»

ašku zġ‑lliġ ih̬lq ddunit, iban mamnk a‑iga ġwalli ur‑iẓri yan, iban is‑dars taḥkimt itjhhdn n‑walli bdda illan, iban is‑iga rbbi itjhhdn. ssnn ntni mamnk a‑iga ašku ẓran ma‑iskr, ur‑darsn ma‑ttinin.

walaynni wah̬h̬a ssnn mddn mamnk a‑iga rbbi, ur‑t‑uqqirn ġmklli‑tn‑d‑iqqann ula‑da‑ti‑tškarn. jlan ntni s‑iswingimn‑nsn h̬wanin, iwrri illas lɛaql‑nsn aylliġ ur‑fhimn yat.

agʷin lḥqq n‑rbbi amẓn ġ‑tkrkas. ar‑tɛbadn ar‑ssmqasan lmh̬luqat, urd ġwalli‑tnt‑ih̬lqn. nttan a‑isthllan a‑t‑ntalġ ġilad ula kullu mayd‑d‑iftan, amin.

ašku iban‑d ġilad lġaḍab n‑rbbi. igguz‑d zġ‑ignna f‑mddn ʷh̬šnnin lli‑srs‑rurnin tiġurdin‑nsn, ar‑ssrgasn lḥqq s‑lh̬ʷšant‑nsn.

ġayan a‑f‑tn‑ifl rbbi, yadj‑tn ad‑skarn s‑ššhwat‑nsn lli‑bahra‑ššḥššamnin. ula timġarin‑nsn wrrint ar‑ṭṭarnt i‑ngratsnt, ur‑sul‑a‑ttirint irgazn. ġmkan ad‑gan ula irgazn, ar‑ṭṭarn d‑irgazn, ur‑sul‑a‑ttirin timġarin. ar‑jddrn s‑ššhwat i‑ngratsn, ar‑tfsadn irgazn d‑irgazn aylliġ umẓn i‑ih̬f‑nsn lɛqubit lli‑asn‑igan f‑ddnub‑nsn. agʷin mddn‑an a‑stt‑awin ġ‑rbbi. ġayan a‑f‑tn‑ifl ad‑zaydn s‑iswingimn‑nsn rkanin d‑iskkirn‑nsn hršnin.

ar‑ttinin: «nkkʷni a‑iṭṭafn lɛaql,» walaynni inafaln ad‑gan. unfn i‑rbbi l‑lmjd lli‑bdda‑illan, ar‑tɛbadn tiġawsiwin lli‑skarn s‑ifassn‑nsn ar‑tnt‑ssrwasn s‑bnadm lli‑itmtatn d‑igḍaḍ d‑luḥuš d‑ibnkaln.