EPIHU 4 سے مشہور بائبلی آیات

شئیر

Tàka na nyuna, màtawa nyimi kai pa-hàmungu eti dàngu kai pa-milangu eti dàngga angumi, dàngu kai kawàra pa-jàmangu hama tuna i Ala ba najàma-nggai nyimi lai Karitu.

Màtawa nyimi ka na-karàda mànu na etimi, kai malijangu dàngu kai pa-torungu. Pawuwa-ya na mbuhangu-mi bai wàngu pa-pandulangu dàngga angumi.

Jàka mi-kareuku àmbi wàngudu panii marihaku. Màta kai wàngu panii ma-panaungu dàngu ma-pandulangu la tau hawiangu. Da panii tungu nu napa da-patàka-nya pahàmu wàngu da tau da marongu-ya.

Wàrunya mbuu ndàbana na hidu eti, na pa-umbingu dàngu na mbeni. Àmbi hilu warangu-du dàngu àmbi hilu tolangu. Àmbu hilu ningu-dupa karaü eti jàka ndia hilu hau papàda eti hamana nuna.

Jàka era mbenimi, àmbi màta-dunya na mbenimi hi lupa na-pawiti-nya na panjala wàmi. Àmbi mbeni lundu malingu-na, ka àmbu ningu ngia papeku-na i Kambàliku.

Jia-duya pukalu-yawa na tau memangu lupa na huri luri memangu na pa-paruha-da da paiti - paitirungu da ma-panjàrangu. Màtawa da eti dàngu da kanandingu-mi kai pabidi palundu hàlanja. Màtawa kai luri hama tuna tau bidikai na pa-padikangu tundunya na hadana i Ala; nu la paluri wàngu huri madeningu, matànji dàngu ma-matua.

Pamukarungu langata - tàka kai luri pandami, ka peku padai pangalangu-na na mbulungu na pambàda raï rukuna na Ngahuna i Ala.

Nyuna-maka “na ma-wuangu pa-wuana hangia - hangia la tau” ba wàna; hawiangu natuya papahurungu, hawiangu natuya wunangu; tàka hawiangui natuya ma-bobaru Lii Mànangu, tàka da-hawiangui natuha ngguru dàngu matanara kabungguru. Yiana hi tunanya nu hawanjiru-nanya na banjaru-na i Ala ka peku lumunanya i Miri dàngu ka peku pahada-nanya na tauna i Karitu. Jia-duyaka ba tuna nu hi ta-mbulungu nyuta nu ba hamanda la ngera pawai dàngu la ngera tanda hàmundanya na Ana Ala. Tàka hi tanjadi tau mamatua taunda mangeri nda - ndàharungu la jàngapu hama tuna i Karitu.

Nyuta nda tahilu anakeda-apa ma-lindingu lai nu - lai nu dàngu da pangàndi arihu pa-ajaru-da da tau da mapingu pa-kahili. Nyuda da-panjàra-nya na tau wàngu akalu kahili-da. Ndia-a! Hauya duna, màta ka ta-pawuwa-ha wàngu eti mbuhangu langatàka-nda jàka nggàraha da ma-deningu, hi lupangu la ngala mandaina taparu - rukangu pa-lànyapu la mbuu ndàbana hama tuna i Karitu na kapala-nda.