निर्गमन 3 سے مشہور بائبلی آیات

شئیر

परमेसवर नै मूसा तै कह्या, “मै जो सूं, वो सूं।” फेर उसनै कह्या, “तू इस्राएल के माणसां तै न्यू कहिये, ‘जिसका नाम “मै सूं” सै उस्से नै मेरै ताहीं थारे धोरै भेज्या सै।’”

फेर परमेसवर नै उत्तर दिया, “पक्‍का मै तेरे गैल रहूँगा; अर इस बात का के तेरा भेजण आळा मै सूं, तेरे खात्तर यो निशान होवैगा; के जिब तू उन माणसां नै मिस्र देश तै लिकाड़ ल्यावैगा तो थम इस्से पहाड़ पै परमेसवर की आराधना करोगे।”

फेर परमेसवर कह्या, “धोरै ना आवै, अर अपणे पायां म्ह तै जूतियाँ नै तारदे, क्यूँके जिस जगहां पै तू खड्या सै वो पवित्र धरती सै।”

फेर यहोवा नै कह्या, “मन्‍नै अपणी प्रजा के माणस जो मिस्र देश म्ह सैं उनकै दुख ताहीं जरुर देख्या सै, अर उनकी जो चिल्‍लाहट मेहनत कराण आळयां कै कारण होवै सै उस ताहीं भी मन्‍नै सुण्या सै, अर उनकी पीड़ा पै मन्‍नै चित्त लगाया सै; इस करकै इब मै उतर आया सूं के उननै मिस्रियाँ कै बस तै छुड़ाऊँ, अर उस देश तै लिकाड़ के एक आच्छे अर बड़े देश म्ह जिस म्ह दूध अर शहद की धारा बहवै सै, यानिके कनानी, हित्ती, एमोरी, परिज्जी, हिब्बी, अर यबूसी माणसां की जगहां म्ह पोंहचाऊँ।

अर ओड़ै एक कंटीली झाड़ी कै बिचाळै आग की लौ म्ह यहोवा के दूत नै उस ताहीं दर्शन दिया; अर मूसा नै निगांह ठाकै देख्या के झाड़ी जळण लागरी सै, पर भस्म न्ही होन्दी।

इस करकै आ, मै तन्‍नै फिरौन कै धोरै भेज्जू सूं के तू मेरी इस्राएली प्रजा नै मिस्र देश तै लिकाड़ ले आवै।”