Lii Lolo dhu Uru Tèka 15 سے مشہور بائبلی آیات

شئیر

Ka Abram sèmi nare lii padhai LAMATUA. Aa LAMATUA tadhe ne, dhèu mola, lula Abram lèka Ne.

Èle èèna ka, LAMATUA padꞌelo iisi Na mi Abram. Ka Na peka, aku Nèngu na, “Abram! Èu baku madhaꞌu. Lula Jaꞌa ka dhu jꞌajꞌi mi tami ho bhiri èu nèti musu. Aa Jaꞌa hia aꞌoto mi dedha èu.”

Hèia nèti Abram asa liꞌu, ka Na peka, “Èu ladhe ku asa dedha-liru nèi. Ladhe paie ku hua-hètu sèi. Bisa iga more, do aadꞌo? Bèli-camèdꞌa, ana-èpu èu sama sèmi hua-hètu sèi!”

Te ngaa LAMATUA dhaa na, “Jꞌara na sèmi boe èèna! Ana dꞌèlu èu ku, dhu unu pusaka sèra. Ènu èu abhu boe.”

Ka Ama Lamatua peka dènge ne, “Abram! Èèna na èu mamuri toke heka bhoro, aa madhe dènge beꞌa, ka ra padhane èu dènge beꞌa. Te ngaa ana-èpu èu, èèna na jꞌajꞌi dhèu tao mai ètu kabarai dhèu. Ho èèna na, dhèu isi rai sèra, tao si sèmi ènu sa, ka ra ènyi aa pajꞌèra si, toke èpa ngasu tèu. Te, ladhe èèna na, Jaꞌa huku si. Ho èèna na, Jaꞌa kèti hari ana-èpu èu nèti era èèna, aa dènge mèdha-panyau ra ae-ae.

Te ngaa, aku Abram na, “Masi ka Ama Lamatua hia ae-ae èèna ka, jꞌajꞌi boe mi ngaa sa èci. Lula jaꞌa ne dènge boe ana matana, ho hia jaꞌa ana-èpu. De dhu neo unu ae-ae sèmi èèna, tao mi ngaa? Neu-neu ka, noto mi ènu jaꞌa Elieser, dhèu Damsik èèna. Nèngu ka dhu sèmi nare aaꞌi-aaꞌi.”

Lodꞌo èèna, LAMATUA paꞌèki lii pajaji dènge Abram. Na peka na, “Jaꞌa jaji mema èu kèna, bèli-camèdꞌa Jaꞌa pangèdꞌu mi ana-èpu èu rai neꞌe ne, mulai nèti loko Masir, dꞌai loko Efrat

Aa èèna na, Jaꞌa ator ho ana-èpu èu dhu ka lèmi kèti hari si asa neꞌe mai. Limuri ne, dhèu Amori dhu pea ètu rai neꞌe. Dhèu seꞌe dhèu bhelu, te ngaa dhae bhelu iia mèka. Ladhe ana-èpu èu sèra lèpa hari asa era neꞌe, Jaꞌa neo pake si ho huku palaho dhèu Amori sèra. Lula dꞌai taa èèna, bhabhelu ra asa hino.”