Sal 11
11
SALMO 11
A eb' tojl snab'en,*r* a Jehová a 'aych yipc sc'ojl eb'
Sb'it David jun tic tzc'an junc mach tzjucb'tzan b'it
1A Jehová a tzwa'ch yipc in c'ojol, nab'an̈ej tzeyal 'ixtc 'ayin: 'Ixic, 'at c'ub'j 'el a b'a 'a jolmctac witz 'icha no ch'ic.
2'Ilt nab'n eb' maysch'olnil tas tzb'o'o; tzya'ch eb' sjul-lab' 'a yojl ch'an̈ ch'an̈ yic sjul-lab', caw sin̈mtac tzyutj eb'. Ax 'a junc lugar 'aj c'ultac yaji, ata tzjulwj eb' 'a eb' wach' snab'en.
3Toto a eb' yajl tzjuw 'el snab'en, ¿tasto wal 'oj yutc sb'a mach wach' sb'eyb'al? xe chi 'ayin.
4A Jehová 'ayc' 'a yatut, atn jun to yicn̈ej yaji. A 'a satcha'an̈ ata 'ay sdespacho, tzcham wal yiln tas tzqui b'o an̈ 'anman̈ec tic.
5A tzb'eyc'ojlan eb' wach', ax eb' tu sb'eyb'al, caw tzyajx 'el eb' yu'uj.
6'Oj ya' cot c'ac' 'a yib'n̈ eb' maysch'olnil cha. 'Oj cot azufre 'a yib'n̈ eb' 'icha wal yem yaxn̈ab', 'ixta wal 'oj 'emoc. Ax ya'n cot pax jun niwquil 'ic' yic tztacj 'el smasnil tas yu'uj. 'Ixta 'oj yutc ya'n spac tas tzb'o eb'.
7Caw tojl snab'en Jehová, tzchamc'ojlej smasnil tas tojol; a eb' wach' snab'en, 'oj yil-lac 'och eb' sat yet'oc.
Seçili Olanlar:
Sal 11: CSS
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Biblia Chuj San Sebastian © Sociedades Bíblicas Unidas, 1999.