2 Piɛl 2
2
Pilɔk pí poónyí
1Peémímekélíe pá pisupɔ́ mapá insúá ɔ́ kitɔŋ kí Isiyaɛl, puandá púmoómí pifólí pí poónyí áányípá káánɔ́ ɛ́ kikɛtɛ́kɛtɛ́ɛ, páányínúfáan ɛ́ɛ́ numɛ́m pifólí pí iŋónyí pí pisupɔ́ kuám á kusáŋɔn Ɔkɔ́n umaáŋɔ́n pɔ. Akáánɛ́, pɔ́ɔ́nyípíkɔ́ɔ́kitɛn pɛkɛtɛpɛkɛt púnyím. 2Kutek ɔ́ɔ́nyɔ́ɔŋɔn kɔ́ɔ́p ɔ́ kilɔk kí kusɔt, kɔ́ɔ́p ɛ́kuɛl, páányísikan iŋilí i kémuémue. 3Kɔ́ɔ́p ɔ́ kilɔ́ɔ́ŋɛ́t kí muenyí, péényínúpúle ne piluúme péényífitenée. Maná imbakɛ́ yɔɔpɔ́ kanyɛ insúmba, muyu kakɔɔn pɔ́ kuɛ́kɛt kuɛ́kɛt. 4Á kiákí Támbák timayap pe Éŋele pɛ́mɛɛ́l kifal kati inséésítényée, weepíkinyi pɔ́ é muyu, waakúta pɔ́ é mesuŋ ne putúk, akáánɛ́ wɛɛ́nɛkɛn pɔ́ kuám puɔ́s pú isɔ́ɔ́sɔ. 5Utimayap kúúsí kú insúá, maná waanyáŋɛk Noe umaápá ukéme kémuémue nɔ pɔsɔ́k pátindatɔ́neémue á kisikɛl nupɔ́l maányusɛ́n pafal kitikit. 6Támbákɛ́ɛ wɛɛpɛn pa pálɛ́k Sɔtɔm nɔ Kɔmɔ́ɔl weepiki pɔ́ ne yiik ɛ́ɛ́ útíínyi pafal pulinsí, útíínyi epú púónyóólonée. 7Waakaáŋɔn Lote umaápá ni insíkíl ɔ́ kilɔk kí kusɔ́t kí pɛɛnd pakáánɛ́, á kiákí ɛ́ɛ́ umapá indɛ́ndɛ́nɛ. 8A kiákí ɛ́ɛ́ mɔɔnd u indɛ́ndɛ́nɛ ukáánɛ́ mapá usɔ́tɔn kɔ́ɔ́p ɛ́ɛ́ kikɛtɛ́kɛtɛ́ɛ, umapá wɔɔ́pɔn woond wɛɛ́nɛn maandá mɔ́ kilɔk pamaápá pɛ́ɛ́lɛ siki puɔ́síɛ. Ɔtɛ́m wɛ́ɛ́yɛ́ ú mɔɔnd u indɛ́ndɛ́nɛ mapa wɔpikɔn ne meelínyée mɔ́ɔ́p mɔ́ kilɔk makáánɛ́. 9Púnyɛ kɔk ɛ́ɛ́, Ɔkɔ́n nyɛ pákuáŋɔn pɛɛnd pɛ́nyɛɛ́ nulátát nɛɛyɛ́ woond unyáŋɛk epí pɛ́nyɛɛ́ pilɔk, uséésitenyi pɔ́ ɔ́ puɔ́s pú isɔ́ɔ́sɔ. 10Weényíséésitenyi sol sol epí péseeŋulenée tuɔ́l túɔ́p, pakáánɛ́ áákamba kuɛlɛ maandá mɔ́ kilɔk, páamba kuyɛɛnɛ kipia kí Támbák. Pifólí pí poónyí pikáánɛ́ áápianan pipíóndínyí ɔtɛ́m kɔ́ɔ́p. Pátipá pápianan pumbíla á kusikɛt piliínditíe pí mɛnɛ́mɛnɛ́ɛ pí nukum. 11Tɛ pe Éŋele pátipá pósóósosi, tɛ kusikɛt piliínditíe pikáánɛ́ ó pusíó pú Ɔkɔ́n, naánɛ́ kɔk ɛ́ɛ́ pe Eŋele áákányinan pifólí pí poónyí pakáánɛ́, pukaaka ni imbekí. 12Pɛɛnd pakáánɛ́ nyɛ ɛlɛɛ́ manyam mátiányípá mápian tutátɔ́, mépípíéne mákuman meésúkin mákua kí itamb na kuyika. Páásikan epú pátiányípá pémenyen, pɛ́ɛ́nyísɛm pɔ́ é nikú ɛlɛɛ́ mayam makáánɛ́. 13Páányítáŋap pinamá pí puólí púɔ́p pú kilɔk. Pɔ́pílɔ́ɔ́ŋɔ kuwóónyosi pilɔ́ɔ́ŋɛt píɔ́p kɔ́ ɔtɛ́m ú puɔ́s. Kisikɛl pɛ́ɛlɛnɛ́ɛ putɔ́mbí naanɔ́ púnyɛ pusupɔ́ pɔ́núɔ́yɔnɛ́ɛ aká nupíyakanɛ́ɛ nɔɔpɔ́. 14Eŋis yɔ́ɔ́p ɔ́ɔ́pílɔ́ɔ́ŋɔ pakáandɔ́, pɔ́pílɔ́ɔ́ŋɔ siki kisikilɛ ɛ́ kuɛlɛ kifal, pɔ́píkɔ́ɔ́kɔn pɛɛnd pɛ́nyɛɛ́ tɔlitɔli. pányɛ pɛɛnd páambanɛ́ɛ kupɔ́t puandá á siki kisikilɛ. Inyɔmɔ i Támbák nyɛ nɔɔpɔ́. 15Pányɛ peenén iŋilí yi indɛ́ndɛ́nɛ, páátam ɔ́ kuɔŋ kí iŋilí i Palam muɔ́nɔ́ u Pɔsɔ́ɔl pémeéki wɔ́ muenyí ɛ́ wɛ́ɛlɛ kilɔk. Palamɛ waátap pilɔk pí muenyí pikáánɛ́. 16Maná waapia pitɛ́mbɛ́l pí punyam pútiányípá púkála púmaátíán wɔ́ ne ekelú ú mɔɔnd, maná waayap kilɔk kí iŋilí ikáánɛ́. 17Pɛɛnd pakáánɛ́ nyɛ mutam muusákán, kiélík kí iŋum emfún mɔ́nyikɔ́l. Támbák ɛ́ɛ́nɛkinɛn pɔ́ imbíne yiikɔ́nɔ́kakɔn. 18Na tukál túɔ́p tú pisupɔ́ tútiányípá tɛ na puandá kɔ́ɔk nɛkɛtɛ́ɛ, pɔ́píkɔ́ɔ́kɔn epe pémeétúm pɛɛnd pɔ́sɔ́tɔnɛ́ɛ ɔ́ kilɔk kélém. 19Pátáninan pɔ́ púweéŋelí, kɔɔ́mɔ pɔ́ muɛt puólí pú pilɔk pí maandá yikesié pɔ. Á kiákí tunyɛ kiɔ́lí kí púúpú pútúpíányinanɛ́ɛ 20Índɛ epí pémenyenée Yésus Kilíise Ɔkɔ́n waasɔ́ no Osótí waasɔ́ pámaápífánuna á maandá me kúúsí, maná páand akɔɔn á mɔ, etényí wɔɔpɔ́ nyɛ kilɔk kutápɔk ú insúá. 21Púmapá peseé kɔ́ɔ́p ó pusíó ɛ́ɛ́ pétimenyí iŋilí yi indɛ́ndɛ́nɛ, maná péétum pikotí pí Támbák pómoónyítónyí pɔ́ kélém. 22Nínúan púmaámínɛ́n aná insap eye ɔ́ɔ́yɔɔnɛ́ɛ: imbuá móóndó á kunyáan tunut túɛ́yɛ́, kúnyaánɛ iŋunɛ́p pɛ́mɛ́nyɛɛ́kɛt etumbe éépípúŋule kɛ́ɛ́yɛ́ á pilɛp.
Seçili Olanlar:
2 Piɛl 2: yav
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2026, CABTAL