Iironga 23
23
ONTOPORUA 23.
Aajuda ja ara okudipaga Paulus. Ota farua ku Kesarea
1Paulus okua deng’otshigongi omesho, ina s’onge nde ta ti: “Jarumentu ne aamuameme, sigo okesiku rjonena ngaje ond’enda motshipara tsha Karunga nehuvo ehanaua rjomutima.”
2Omupristeri omunene Ananias okua rombuere mboka ja cikama pu he, je mu denge keemrungu.
3Ndere Paulus okue mu rombuere: “Karunga ote ku denge, ngueje ekuma rja gogua ondomo,#23:3 Miipaci jaantu ua fa omujuki. Ndere meni rjohe omu nuumbudi. ngueje ua kaatumba mpaka u pangurendje komukaro guompango, ndere omokurombora ndi dengue, ngueje muene to dini ompango.”
4Mba ja cikama pu he ja ti: “Oto tuku omupristeri omunene gua Karunga?”
5Paulus okua ti: “Hi tshiuirue jakuetu, nokutja he omupristeri omunene. Eno, otsha tshangua: Omureri guotshiguana tshandjeni ino mu tuka.”
6Ndere Paulus sho a tshiuirue naua otshitoporua tshimue tshaakuruntu tsha ri tshomotshimpaga tshaasadukai,#23:6 Tara ontoporua 4:1 otshikuauo tsomotshimpaga tshaafarisai, oku’igida motshigongi tshaakuruntu: “Jarumentu jamuameme, ngaje omufarisai, ngaje omuna guomufarisai, ote ka pangurua moru’etegerero rjokutegerera ejumuko rjaasi.”
7Ngija a popi doka aafarisai naasadukai oj’umana mokati kauo ongashi otshigongi otsha topoka.
8Oshoka aasadukai otaa ti: “Kaku nejumuko, kaku naajengeli kaku neembepo. Ndere aafarisai oj’iteera iinima mbi.
9Nde pua tukuka ombujo onene. Aafarisai jamue oja cikama, j’umana nde taa ti: “Katu uete uuhineji nando ua tsha momuntu ngu. Otshi ri nduno ngiini, ombepo nenge omujengeli nge a popja ku he?”
10Omarudi gauo sho ga rundarara, omukuruntu guaakuiita okua kara a hijageka, Paulus ta njanjurua ku jo, oku’icana aakuiita, je mu kuce mo mokati kauo, jo je mu fare monguru haakuiita.
11Uusiku mbuijaka Muene okua cikama pu he a ti: “Ikororera, ngashi ua okororandje mu Jerusalem, otsho uo ngaa ngueje u nokuokororandje mu Roma.
12Nde sho kua tshi, aajuda jamue oja ngundungara, ja gana egano, nokutja itaa ka rja tsha jo itaa ka nua tsha, sigo oja dipaga Paulus.
13Aantu mba ja gana egano ndika oja ri je vure aarumentu eemrongo ine.
14Mboka oje ja kaapristeri no kaakuruntu ja ti: “Sse otua gana omagano omadigu, nokutja itatu ka makera tsha sigo otua dipaga Paulus.
15Ne ano notshigongi tshaakuruntu amu ka tuma eraka komukuruntu guaakuiita, he e mu ete kune, mua fa mua ara okuuva naua eehapu de; ndere osse tu’irongekeka tu mu dipage, manka he ine ja kune.”
16Omutekuru gua Paulus, sho a huvu omarangero ngano, okua hi monguru haakuiita, he te ga okororere Paulus.
17Nena Paulus oku’icana gumue gueendjai a ti: “Fara omunjasha nguno komukuruntu guaakuiita. Oku na tsha shi te mu rombuere.”
18Nguka okue mu kuca, he te mu fara komukuruntu guaakuiita a ti: “Paulus omukuatua okua garikana, ndi ete omunjasha ngu kungueje, oshoka oku na tsha shi te tshi ku rombuere.”
19Omukuruntu guaakuiita okue mu kuata keke, te mu fara parue, nde te mu pura: “Oue ja u rombuerendje tshee?”
20He okua ti: “Aajuda oj’ihuvacanena je ku garikane u fare ngura Paulus motshigongi tshaakuruntu, ongashi oja fa ja ara oku pura nokuuva naanaa eehapu de.
21Ndere ino j’inekera! Oshoka aarumentu je vure eemrongo ine oje mu rangera, jo ja gana omagano, nokutja itaa ri tsha, jo itaa nu tsha sigo oje mu dipaga. Oj’irongikida nokuri, taa tegerere ouara epitiko rjohe.#23:21 Epitiko rjokutuma Paulus motshigongi tshaakuruntu.
22Nena omukuruntu guaakuiita okua rareke omunjasha nde ta ti ku he: “Ino rombuera nand’omuntu nokutja ongueje ue tshi tshiuicirandje.”
23Oku’icana eendjai mbari, nde ta ti ku do: “Kuceni aakuiita omacere gaari, naarondi juupuka eemrongo uunuari, aakuiita jomagonga omacere gaari. Jo ja kare j’irongekida naua oku ha ku Kesarea postunde ontitatu huusiku.
24Otsho uo tuu amu kara nuupuka mbu tau rondua ku Paulus, ne mu mu fare naua ku Feliks, h’omureri guotshirongo.”
25Oshoka okua tire nokutja aajuda, nge taje mu kuca neenkondo, taje mu dipaga, nde he muene ta ka tshekua nomarundiro nga ngo a peua ombumbo.
26Okua tshanga ombrife neehapu di: “Klaudius Lisias#23:26 Klaudius Lisias, edina rjomukuruntu guaakuiita. ota arere omureri guotshirongo Feliks uuhanaua aushe?
27Aajuda oja kuata omurumentu nguka, konjara je mu dipaga. Nena ngaje onde ja nongundu haakuiita, nde mu upica, sho nd’uvu nokutja he omuroma.
28Sho nda ara okutshiua omudi gueendjuma dauo, ngaje onde mu fara kotshigongi tshaakuruntu jauo.
29Hu nda dimburura naua nokutja ota umanekerua omarudi geehapu dompango hauo, ina ninga iironga juududu mbu tau geerua nokusa nenge nondrongo.
30Sho nda rombuerua nokutja oje mu rangera ofuci, ngaje onde mu tumu kungueje. Naahumani je oja rombuerua oku mu u manekera kotshipara tshohe. Kara po naua.”
31Ano aakuiita oja kuca Paulus, ja hi na he ku Antipatris uusiku, ngashi je tshi rombuerua.
32Esiku rja ngura aarondi juupuka oj’enda na he. Jojene#23:32 Aakuiita aakuauo. oja garuka ja ha konguru haakuiita.
33Sho ja ciki ku Kesarea, oja gandja komureri guotshirongo ombrife, ja fara Paulus ku he.
34H’okua lesha nde te mu pura nokutja ohe oguotshirongo tshini, nde t’uvu he oguomu Kilikia.
35Okua ti: “Otii ku uvu, aahumaneki gohe nge je ja. Ta rombora na rangerue motshipanguriro tsha Herodes.
Omission Heklesia Ekatolika, 1951. Namibian Catholic Bishops Conference.