Bwøth Wøk 19
19
Kanya Ö Jwøki Na Cääne Ki Modhe Bäät Kïn Caynay
1'Ba na tïme na dää dwäde ni jø Icriel onø ö wøk ki yi ŋööm Ijep, dïcäŋ manøgø kiree gena pïï dï paap Caynay. 2'Ba kar kaaca ge tïŋŋi ka Rapidim ni pïïcge dï paap Caynay, ni tïïcge twïër marge dï paabøgø buut Kïn Caynay.#19:2 Kïn Caynay ki kwör møøk di cwølø ni Kïn Körëp.
3Ni ö Modhe ni ci maal bäät kïdi nee røømge ki Jwøk, ni ö Wuuö Jwøki ni cääne ki Modhe ki bäät kïdi, ni kööe, ni «Caanï jï nyïïkwaac Jeekap na näk jø Icriel ni kööï jïge, 4ni ‹Uuni ki dëëtu kiree gïna tïïa dëët jø Ijep ajootu ki nyeŋŋu, na käla uuni wøk ki Ijep, ni gwøa uuni kaa man wø ö odhuuthi wø käär nyaare ki bwöpe, ni käla uuni baŋa. 5'Ba ennø, ni näk mo luumma wïnynyu wïnynyö na adïëri møn, ni gwøgu gïna tuuda ki uuni, u puta tïmö ni uuna 'moa dï wïth juurre bëët, kiper piny bäre beeye mara; 6ni tïmu ni uuna dïlämme mo tuuŋ kwär jïra, ni uuna wï jur mo ena kur keere.› Moøgø beege luup moo caanï jï jø Icriel.»
7Køøre Modhe aduu piny ni cwøl jø døøŋŋø mo jø Icriel, ni peeth luup moøgø bëët nyïmge, ni beege luup moa cem Wuuö Jwøki jïre. 8Kanyøgø aløk jø Icrielli bëët ki dwøl aciel ni köge, ni «Luup bëët moa caan Wuuö Jwøki tïïcwa tïïö.» Ni ö Modhe ni dwøk luubö mana caan jiyi baŋ Wuuö Jwøk.
9Ni kö Wuuö Jwøki jï Modhe, ni «Ka adïëri møn, a ööa baŋï naa ööi ka yi pöölö mo cøl, kiper nee luup moo cara ki ïïni nee wïny jiyi, niï ŋääthge na bäre bäre thuwø.» Køøre Modhe luubö mana caan jøøgø aput caan jï Wuuö Jwøk.
10Ni cäŋ Wuuö Jwøki köö jï Modhe, ni «Ci baŋ jø Icriel ni døøyï ge mo waany dïcäŋ man ki dïcäŋ mar diøø, ni penyge abïïe moge; 11ni jiiŋge dëëtge kiper dää nïne, kiper noo tïme na dää nïne, a na Wuuö Jwøk a ööa piny bäät Kïn Caynay naa nëënö jï jø Icriel bëët. 12'Ba wärï tïïï ki keew lak kïdi manøgø bäre kiper jiy, ni kööï jïge, ni ‹Gwøgu rou ni ba cou maal bäät kïdi, ni kär nou guta keew manøgø; no dee dhaanhø mo guta kïdi manøgø jaak, ka adïëri møn, ŋatøca put ka 'näk. 13Kär dee dhaanhø mo gut ŋatøgø, 'ba eni wär këëri ki kïte wala ka athëëre; këël lääy wala dhaanhø, ba doo bëëdö ni kwøw këët.› 'Ba kanyo köök tuuŋŋi ni dwøre bäär, kar kaaca nø jø Icriel wär öge buut kïdi.»
14Køøre Modhe aduu piny ki bäät kïdi ni ö baŋ jiy ni døøc jiy mo waany, ni ö jiyi ni penyge abïïe moge. 15Ni kö Modhe jï jiy, ni «Jiiŋŋu dëëtu kiper dää nïne; kär dee ŋat mo ci baŋ dhaagø.»
16'Ba kanya tïme na dää nïne, ni piny amöölla, bäät kïdi aput jïtö ki køth mo pöödö, ka agaackøth mo mal, ki pöölö mo cøl; ni ö dwølli mo päl ma dwør tuuŋ ni wïnye. Køøre jiy moa en twïër bëët dëëtge aput tïmö ni kwanynyi. 17Ni ö Modhe ni käl jiy wøk ki yi twïër nee røømge ki Jwøk; ni putge cuŋŋö tier kïdi piny. 18Kar kanyøgø Kïn Caynay atïmö na jïrö bäre, kiper mana ö Wuuö Jwøki na ö bäät kïdi manøgø ki maac. Ni put jïrö tïmö ni nyäälö bäät kïdi kaamar jïc dwaar, ni ö kïdi manøgø bäre ni put tïmö ni jäŋŋi døc. 19'Ba kanya tïme ni dwør tuuŋ jwöŋi ni cäätha maal ni døøŋŋø døøŋŋø, Modhe aluupö ni dwøgi ya Wuuö Jwøki jïgø ki dwør odäru.
20Ni put Wuuö Jwøki öö bäät Kïn Caynay, wï kïdi kiree; ni ö Wuuö Jwøki ni cwöl Modhe baŋe wï kïdi manøgø, ni put Modhe ci maal. 21Køøre Wuuö Jwøk acäänö ki Modhe, ni kööe, ni «Ci piny, ni köömmï jiy nee keew mara ba kaalge ki man neenge aani, a na Wuuö Jwøk, kiper jø okaal gø bëët puta thøø. 22Ni caanï gø jï dïlämme thuwø mo wø nyänh buuta nee dëëtge døøcge mo waany, kiper nee ge ba nääa, a na Wuuö Jwøk.»
23'Ba Modhe aköö jï Wuuö Jwøk, ni «Jiy ba løny ki man öge bäät Kïn Caynay, kiper waana cemï ni kööï, ni ‹Tïïu ki keew lak kïdi manøgø bäre, nee kïdi manøgø bëëde na kïdi mo ena kur keere.› »
24Køøre Wuuö Jwøk aköö jï Modhe, ni «Ci piny ni cäŋï duu maal, ni löömmu ka Aran; 'ba dïlämme ki jiy møga kär wëëk kaal keew nee öge baŋa, a na Wuuö Jwøk, kiper nee ge ba nääa.»
25Ni ö Modhe ni put ö piny baŋ jiy ni caan dwørøgø jïge.
Seçili Olanlar:
Bwøth Wøk 19: AnyuB
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© The Bible Society of Ethiopia