2 कुरिन्थियों भूमिका
भूमिका
जद्या कुरिन्थ नगर का बस्वास्या की टोळी की लार पौलुस को बुवार खराब होग्यो छो, जद्या उं कळ्डी बगत म बी पौलुस कागद माण्ढबो कोन छोड़यो। उं बगत उन्अ खुदन्अ कुरिन्थ नगर मं जार अचानक जांच करणी पड़ी (2 कुरि 2:1)। पण बस्वास्या की टोळी मं एकात असान्त मनख पौलुस प हमलो करबा जस्यान को बुवार कर्या। पौलुस झटदाणी इफिसुस नगर मं पाछो चलग्यो। फेरबी वो खुदका बिरोध्या सुं मेळजोळ करबा की घणाजोर की मन्सा रखाण्अ छो। पौलुस तीतुस न्अ वां कन्अ खन्दायो अर फेर वो खुद बी वांकाड़ी चाल पड़यो। वो मकिदुनिया परदेस ताणी ई पुच्यो, क तीतुस आर वान्अ चोखो समचार देव्अ छ क बिरोध्या सुं मेळजोळ होग्यो। ई समचार सुं संतोष पार पौलुस यो नयो कागद माण्ढ्यो छ (2 कुरि 7:6)।
ई कागद का सरू का भाग म पौलुस कुरिन्थ नगर का बस्वास्या की टोळी की लार खुदका बुवार की बतळ्यावण करअ छ। वो ई भाग मं वां कारणा प जोर देव्अ छ क वे बिरोध्या का बिरोध अर अपमान को अतरा जोरसुं क्युं जुवाब देव्अ छ। ई भाग म वो खुदकी खुसी बी प्रगट करअ छ क वांकी कळ्डाई को चोखो नतिजो ई नखळ्यो, अर बिरोधी पस्तावो अर मेळजोळ कर्या।
फेर पौलुस यहूदा परदेस का गरीब मसीया की सायता बेई खुला मन सुं दान देबा की अरदास कुरिन्थ का बस्वास्या की टोळी सुं करअ छ।
आखरी का पाठा मं थरपेड़ा पौलुस खुदका थरपेड़ा पण न्अ बचाव्अ छ। कुरिन्थ नगर क बस्वास्या की टोळी म एकात अस्या मनख आग्या छा ज्यो खुदन्अ सांचा थरपेड़ा बता मेल्या छा, अर थरपेड़ा पौलुस न्अ झूंटो!
रूप रेखा
भूमिका 1:11
पौलुस अर कुरिन्थ नगर का बस्वास्या की टोळी 1:12—7:16
यहूदा परदेस का गरीब मसीया बेई दान 8:1—9:15
पौलुस को खुदका थरपेड़ा पणा न्अ बचाबो 10:1—13:10
उपसंहार 13:11–14
Seçili Olanlar:
2 कुरिन्थियों भूमिका: डि एच डि
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
(c) 2010-2017, New Life Computer Institute. All rights reserved