Mâreke 9
9
1Jezü kä tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Angâ azü lə̂ gbâtə̂ nyê tchâtə tchuabô tee-a, zoo kə̂ wun Gbölö gö-gbïɛ̈ ndə̂ Ndjapä ndə̂ ânə la gbôgbô.»
Angâ adjisîpili wün Jezü lə̂ golowäre ndə̂ yê
(Mat 17.1-13; Luk 9.28-36)
2La tchêngbâ lö mïndûu manə̈ balë, Jezü zâ Pîêre la Jâke la Jâan yîngâ yê, kə̈ gîtə̂ yê la andjê bhâchï lə̂ küma ngâ gbölö aga, ânyë andjë sə̂ la kütû andjê. Kʉ̂tê yê kâ wâ ngbî lə̂ la andjê. 3Alə̂ba ndə̂ yê sə̂ lakə̂ tcho kə̈ grô kpɨ̂ki. Ngâ akrə balë pâ cho âtə ndə̂ tche mbô rə̂ pä ngâ lə̂ba gro käko sə̂âbo-a. 4Elïe la Möyîze wûtu ëtə̂ andjê, kə̈ sə̂ lakə̂ to pö la Jezü. 5Pîêre tô rə̂ sə̈ Jezü päkëdə̂: «Earə̂ kə̂ nyisə̂ rə, äfü pä azə̈ sə tchâtə! Ârâ mbo andokʉ̈ vötaâ: Balë tə̂ andə̂ zə̈ nə̈, balë tə̂ andə̂ Möyîze ânyë balë tə̂ andə̂ Elïe.» 6Pîêre wûn-âbo sə̂ pö ndə̂ tche to rə̂-a, bëte wawa kä lakə̂ mbo andjê. 7Ngâ ndrö jrê kə̈ vrô pâ andjê gbɛ̂, andjë djê tchə̂lə̂ ngâ gɨ̈ lə̂ ndrö nə̈ päkëdə̂: «Tchanə̈ âtə də̈ Modô ndə̂ mê ndə̂ më nyîndə̂ yê tə̂ gbölösə̂nə̈, nyë djë tchë.» 8Kpro la tchêngbâ nə̈, ndə̂ andjê âsə̈ wun tchô kə̈ kä wûn-âbo ngâ akrə balë-a, kütû Jezü kä âkə̈ sə̂ ndrotə̂ andjê. 9Ndə̂ andjë âsə̈ tro tə̂ aga nə̈ atə̂ bêche, Jezü zâma sə̈ andjê pä andjë toabô pö ndə̂ rə ndə̂ andjë wûn rə̂ lâme tô sə̈ ngâ akrə balë, zoo Modô ndə̂ Akrə jo lə̂ kuzü. 10Andjë gâmba pö lâme, praâbalë kə̈ yûtə̂ andjê lə̂ gbâtə̂ andjê päkëdə̂: «Pö ndə̂kə̂ jo lə̂ kuzü nə̈ lâme änyïndə̂ kə̂ to rə̂ atöko?»
11La tchêngbâ nə̈ andjë yû Jezü päkëdə̂: «Bëte giamâ a-earə̂ kə̂ nyisə̂ ndïɛ̈ tô andə̂ andjë nə̈ pä, äwäpä Elïe nə dokʉ̈tchê ânyë?» 12Tche tô rə̂ ndə̂nə̈ sə̈ andjê päkëdə̂: «Tə̂ lëge nə̈, äwäpä Elïe nə dokʉ̈tchê kə̂ nyikrə arə gbɛ̂ lə̂ köbo nə̈. Praâbalë bëte giamâ a tô rə̂ tə̂ Modô ndə̂ Akrə lə̂ Mbëtï Ndjapä pä tchê wun-adje yûkü tə̂ gbölösə̂nə̈, azü wun-adje tchë batə̂ mbämbä akrə?#9.12 Nyë dɨ̈ Eza 53.3; Aps 22.1-18. 13Andə̂ me nə̈ më tö rə̂ sə̈ nyê, Elïe nə̂ nə̂, ânyë azü mbô rə gbɛ̂ ndə̂ su andjê nyîndə̂ nə̈ tə̂ yê batə̂ rə̂ ndə̂ a mbô rə̂ lə̂ Mbëtï Ndjapä pâ yê.»
Jezü tchä ngâ bechë ndə̂ tche wâ la ngbongbo tchozö lə̂ yê
(Mat 17.14-21; Luk 9.37-43a)
14Ndə̂ andjë kâ pu adɨ̂ adjisîpili nə̈, andjë wûn ngâ gbölö kpûlû azü ndə̂ andjë tâkpa ndrotə̂ andjê, ânyë a-earə̂ kə̂ nyisə̂ ndïɛ̈ sə̂ lakə̂ gama andjê la adjisîpili nə̈. 15Gbô rə̂ ndə̂ kpûlû azü nə̈ âsə̈ wun Jezü, tchə̂lə̂ küma andjê gbɛ̂ djîngɨli, ânyë andjë kpê pu tchë ndə̂kə̂ po ndə̂ yê. 16Tche yû adjisîpili ndə̂ yê päkëdə̂: «Nyë gäma nyê la azü âtə pâ giamâ?» 17Ngâ akrə balë lə̂ kpûlû azü nə̈ tô rə̂ ndə̂nə̈ sə̈ tchë päkëdə̂: «Earə̂ kə̂ nyisə̂ rə, më nə̈ âme la modô ndə̂ mê sə̈ mö, ndə̂ tche wâ la ngbongbo tchozö ânyë andjë zâ pö ma yê. 18Ngbongbo tchozö nə̈ mbö tchë katchôgbɛ̂, tche göä tchë bêche, frötchë wutu lə̂ ma yê, tche zɨ̈ tchə̂lə̂ da jï yê, kə̂ kpo kə̂kə̂kə̂-ë. Më yûkû nə̈ sə̈ adjisîpili ndə̂ zə̈ ndə̂kə̂ pa andjë gro tchë, praâbalë andjë wâbo la gbôgbô ndə̂kə̂ gro tchë-a.» 19Jezü zâ pö kə̈ tô rə̂ sə̈ andjê päkëdə̂: «Nyënyê ndə̂ azü ndə̂ tchô angêta ndə̂ nyë zâbo su nyê zä sə̈ Ndjapä âtə, mê âkä sə ndrotə̂ nyê zoo ëtə̂ lö atöko? Mê ârʉatə̂ su mê la nyê zoo dalatchêbâ? Nyë nə̈ la bechë nə̈ sə̈ mê.» 20Andjë nə̂ la tchë sə̈ tchë. Tche âsə̈ wun Jezü, ngbongbo tchozö nə̈ nyôânyoa bechë nə̈ la gbôgbô. Tche tê lakə̂ rotə̂ yê ku bêche, ânyë frötchë sə̂ lakə̂ wutu lə̂ ma yê. 21Jezü yû bha bechë nə̈ päkëdə̂: «Rə nə̈ mbö tchë âmbô lö atöko?» Tche tô rə̂ ndə̂nə̈ sə̈ tchë päkëdə̂: «Ä jëtə̂ yê po la bechë. 22Tə̂ angâ lö, ngbongbo tchozö nə̈ yï tchë lə̂ wo âdəndjë lə̂ ngû ndə̂kə̂ pa tche tchu-î. Praâbalë âdə mo âwa ndə̂kə̂ mbo ngâ rə, amö nə kə̈ wûn nyonyo ârâ, kə̈ zâ könô sə̈ ârâ!» 23Jezü tô rə̂ sə̈ tchë päkëdə̂: «Bëte giamâ mo tô rə̂ pä âdə mê âwa ndə̂kə̂ mbo ngâ rə? Akrə ndə̂ tche zâ su yê sə̈ mê, tche wä ndə̂kə̂ mbo rə gbɛ̂.» 24Posə̂nə̈, bha bechë nə̈ ôn päkëdə̂: «Më zä su mê sə̈ mö! Za könô sə̈ mê bëte më wûn-âbo sə̂ köbo kə̂ mbo rə̂-a.» 25Jezü wûn kpûlû azü ndə̂ andjë sə̂ lakə̂ kpe ndə̂kə̂ nə pu andjê, tche hrô la ngbongbo tchozö nə̈ päkëdə̂: «Momö ndə̂ ngbongbo tchozö ndə̂ mo nə̂ la mangbɨ̈lə̈ âtə, wutu lə̂ bechë âtə-ê, kə̈ kâ lîâbô lî atə̂lə̂ yê balë-ê!» 26Ngbongbo tchozö nə̈ tâ wârə̂, kə̈ nyôânyoa bechë nə̈ la gbôgbô, ânyë kə̈ wûtu-ê. Bechë nə̈ wâ batə̂ kuzü, âmbô rə̂ pä angbängbä azü tô rə̂ päkëdə̂: «Tche tchû nə̂» 27Praâbalë Jezü zâ könô yê kə̈ kênga tchë ëlafô ânyë tche krʉ̂. 28Ndə̂ Jezü gû atə̂lə̂ manda, ânyë adjisîpili ndə̂ yê sə̂ la kütû andjê la tchë, andjë yû tchë päkëdə̂: «Bëte giamâ ânyë ârâ grô ngbongbo tchozö lâme tʉrʉ-ê?» 29Tche tô rə̂ sə̈ andjê päkëdə̂: «Ngoa ngbongbo tchozö lâme wä ndə̂kə̂ wutu kütû lə̂ köbosə̂ kə̂ to pö sə̈ Ndjapä.»
Jezü kâ tô pö ndə̂kə̂ tchu lakə̂ jo ndə̂ yê lə̂ kuzü
(Mat 17.22-23; Luk 9.43-45)
30Andjë âlafô tchâme kə̈ rô lə̂ agö ndə̂ Galilë. Jezü nyîâbo ndə̂nə̈ pä a wunsə̂ tchô ndə̂ tche sə̂ tâ-a. 31Bëte tche sə̈ lakə̂ nyisə̂ rə sə̈ adjisîpili ndə̂ yê, lakə̂ to rə̂ sə̈ andjê päkëdə̂: «A âgboadje tə̂ Modô ndə̂ Akrə ëtchânə̂ azü, andjê won-adje tchë, lö vötaâ la tchêngbâ nə̈, tchê joadje lə̂ kuzü.» 32Praâbalë andjë djêâbo tchə̂lə̂ pö lâme-a, ânyë wawa kə̂ yu tchë mbô andjê.
Tchabâ kä âkə̈ wâ gbölö pâ angâ yê?
(Mat 18.1-5; Luk 9.46-48)
33Andjë wûtu bhâ Käpërënäyûmo. Ndə̂ andjë sə̂ bhâ tchâalê, Jezü yû adjisîpili ndə̂ yê päkëdə̂: «Nyë gäma nyê âme pâ köbo tə̂ pö ndə̂ giamâ?» 34Praâbalë andjë pôâbo-a, bëte andjë sə̈ âme lakə̂ gama andjê pâ köbo ndə̂kə̂ wunsə̂ akrə ndə̂ tche wâ gbölö pâ angâ yê. 35Jezü sə̂ ëbêche kə̈ ê adjisîpili ndə̂ yê lə̂ könô gbɛ̂ tchêpâ nə̈ bïchuû ânyë kə̈ tô rə̂ sə̈ andjê päkëdə̂: «Âdə ngâ akrə ânyində̂ kə̂ watə̂ küma nə̈, äwäpä tche watə̂ akrə dəngbâ angâ yê gbɛ̂, kə̂ wa ndjë tə̂ earə̂ kua ndə̂ andjê.» 36La tchêngbâ nə̈ tche zâ ngâ yɛ̈yɛ̈ bechë kə̈ zâ tchë lə̂ gûtə̂ andjê, kə̈ â ma yê ânyë kə̈ tô rə̂ sə̈ andjê päkëdə̂: 37«Akrə ndə̂ tche mbô rə̂ la ngâ yɛ̈yɛ̈ bechë batə̂ tchanə̈ âtə la rə̈ mê, dëkë mëmê la tə̂ mê kä ndə̂ tche mbô rə̂ la mê. Akrə ndə̂ tche mbô rə̂ la mê, âdə̂âbo mëmê la kütû mê kä ndə̂ tche mbô rə̂ la mê-a, praâbalë tche mbö ndjë rə̂ la tchanə̈ ndə̂ tche wân mê.»
Akrə ndə̂ tche kôâbô sə̂ azə̂ kô-ê tche də̈ tchandə̂ azə̈ nə̈
(Luk 9.49-50)
38Jâan tô rə̂ sə̈ Jezü päkëdə̂: «Earə̂ kə̂ nyisə̂ rə, ârâ wün ngâ akrə ndə̂ tche sə̂ lakə̂ gro angbongbo atchozö la rə̈ zə̈. Ârâ nyï âme ndə̂kə̂ kitə̂ köbo tə̂ yê bëte tche zâbo tchêngbâ azə̂-a.» 39Praâbalë Jezü tô rə̂ ndə̂nə̈ päkëdə̂: «Nyë kïäbô kîtə̂ köbo tə̂ yê, bëte ngâ akrə ndə̂ tche mbô kpɨ̈ngbɨ̈ rə la rə̈ mê, ânyë kpro la tchêngbâ nə̈ tche kä tô ngbongbo pö tə̂ mê sə̂âbo-a. 40Akrə ndə̂ tche kôâbô sə̂ azə̂ kô-ê, tche də̈ tchandə̂ azə̈ nə̈. 41Akrə ndə̂ tche zâ ngâ kangûchi ngû sə̈ nyê bëte rə̂ ndə̂ nyë wâtə̂ azü ndə̂ Krîsiti, ɛn-ɛn, tə̂ lëge nə̈ më tö rə̂ sə̈ nyê, tchê gboadje rə ndə̂ yê ngbânə̈.»
Kə̂ gbɨtɨ tü
(Mat 18.6-9; Luk 17.1-2)
42«Akrə ndə̂ tche mbô rə̂ pä ngânə̈ balë lə̂ gûtə̂ ayɛ̈yɛ̈ bechë lâme ndə̂ andjë zâ su andjê sə̈ mê te lə̂ ngbongbo rə, äfü pä a i gbölö täme tə̂ gɨ̈ yê, ânyë kə̂ yi tchë atə̂lə̂ gbölö ngû ngbro. 43Âdə könô zə̈ kä ndə̂ âmbo rə̂ ndə̂kə̂ pa mo te lə̂ ngbongbo rə, amö ku rə̂-ê. Äfü pä mo li atə̂lə̂ tchôtchô tchîsûwu la ngâ könô zə̈ balë, ârô anə̈ ndə̂kə̂ pa gbô könô zə̈ bïchuû gbɛ̂ ndəpo tâ ânyë mo e la rə̂ atə̂lə̂ tchô ndə̂ yûkü, ndə̂ wo ju tâ pïï etə̂. [44Bhâye, amändjalï ndə̂ andjë zɨ tə̂ akrə, andjë tchûâbo-a, ânyë wo nə̈ wrʉ̂âbo ndjë balë-a#9.44 Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 44 lâme wâbo lə̂nə̈-a..] 45Âdə da zə̈ kä ndə̂ âmbo rə̂ pä mo te lə̂ ngbongbo rə, amö ku rə̂-ê. Äfü pä mo li atə̂lə̂ tchôtchô tchîsûwu la ngâ da zə̈ balë ârô anə̈ ndə̂kə̂ pa gbô da zə̈ bïchuû gbɛ̂ ndəpo tâ ânyë a yi mö la rə̂ atə̂lə̂ tchô ndə̂ wo ju tâ pïï etə̂. [46Bhâye, amändjalï ndə̂ andjë zɨ tə̂ akrə, andjë tchûâbo-a, ânyë wo nə̈ wrʉ̂âbo ndjë balë-a#9.46 Lə̂ angâ angbängbä abəndɨ Mbëtï Ndjapä la ma gerêke, yɛ̈yɛ̈ da 46 lâme wâbo lə̂nə̈-a..] 47Âdə la zə̈ kä ndə̂ âmbo rə̂ pä mo te lə̂ ngbongbo rə, amö niɛ rə̂-ê. Äfü pä mo li atə̂lə̂ Gbölö gö-gbïɛ̈ ndə̂ Ndjapä la ngâ la zə̈ balë, ârô anə̈ ndə̂kə̂ pa gbô la zə̈ bïchuû gbɛ̂ ndəpo tâ ânyë a yi mö la rə̂ atə̂lə̂ tchô ndə̂ yûkü, ndə̂ wo ju tâ pïï etə̂. 48Bhâye, ‹amändjalï ndə̂ andjë zɨ tə̂ akrə tchûâbo-a, ânyë wo nə̈ wrʉ̂âbo ndjë balë-a›, 49bëte wo zadje kʉ̂tê akrə balë balë batə̂ rə̂ ndə̂ ngbro za kɨ̈zɨ̂.
50«Ngbro wätə̂ tchôtchô rə, praâbalë âdə kötchô nə̈ âwutu lə̂nə̈ nə̂, giamâ kä ndə̂ a mbo rə̂ tâ ânyë kötchô nə̈ ka ëlə̂nə̈ ngbânə̈? Äwäpä nyë watə̂ ngbro lə̂ tchîsûwu ndə̂ nyê la tə̂ nyê, kə̂ sə la zɨtɨ su lə̂ gbâtə̂ nyê la angâ nyê.»
Seçili Olanlar:
Mâreke 9: lnl
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Wycliffe Bible Translators, Inc.
