Mateo 4
4
Mkiil Maxuu Jesús
(Mr. 1:12-13; Lc. 4:1-13)
1Zee lee Mbi Naban mbe Jesús naz wen pa kiil Maxuu xaa. 2Nu mkwan xaa tub choo mbizh nu tub choo yaal, gorna nandawt xaa nik tik kwaan, zeera ngok nlaan xaa. 3Nu lee Maxuu mbii gax lo Jesús zee kiil Maxuu Jesús, nu nzhé Maxuu:
—Chelee lu wlipa lu nak lu Xgann Dios guzh lu lo re ke ne zee gaka pan.
4Per Jesús mkeb nzhé:
—Lo Xkyech Dios nkee: “Nanebt pan nle zee mban re myet, nel noka re wdizh kwaan nroo roo Dios nle zee mban re myet”. [Dt. 8:3]
5Zee lee Maxuu mbe Jesús naz leen yezh Jerusalén, yezh kwaan nambey nak, nu mtexoob Maxuu Jesús yek yidoo pa mas ya nzeb, 6nu nzhé Maxuu lo xaa:
—Chelee lu wlipa lu nak lu Xgann Dios, brenzeb naz xan naz lo yo; nel nkeela lo Xkyech Dios nzhé: “Dios xaal mandad cheen xaa zee zenyaa xaa lu, zee nalat nii lu lo ke”. [Sal. 91:11]
7Jesús mkeb nzhé:
—Noka nkee lo Xkyech Dios nzhé: “Nanzhaalt kiil lu Xdios lu, Xaa Nabeyy lo lu”. [Dt. 6:16]
8Zee lee Maxuu mbe Jesús yek tub yi kwaan ya doo nzeb, nu mlu Maxuu rese yezh kwaan nzhi lo yizhyo lo Jesús, nu xomod chul doo nzhaka. 9Nu nzhé Maxuu:
—Na za rese kwaane ka lu chelee lu kichxub lu lo na nu gool lu lo na.
10Jesús mkeb nzhé:
—Bachii lo na Maxuu, nel lo Xkyech Dios nkee: “Nzhaal gool lu nebse lo Xdios lu Xaa Nabeyy lo lu, nu nebse lo lee xaa nzhaal kee lu zhiin”. [Dt. 6:13]
11Zee lee Maxuu mlaa Jesús, zee lee lak mandad cheen Dios mzhin lo xaa kanap xaa.
Jesús mzelo mkee zhiin
(Mr. 1:14-15; Lc. 4:14-15)
12Gorna lee Jesús mbin lee Juan nzho lozhyib, nya xaa naz yizhyo Galilea. 13Nu mded xaa yezh Nazaret, zee nya xaa ngu xaa naz yezh Capernaum, roo nistoo kwaan nak yizhyo cheen re dii cheen Zabulón nu Neftalí. 14Kwaane ngok zee mbarlo kwaan nzhé Chay, xaa mzaa kwent kwaan nzhé Dios lo lee xaa yilo:
15Yizhyo cheen Zabulón nu cheen Neftalí,
kwaan nzhi stub lad roo yuu Jordán, roo wri nistoo,
kwaan nak yizhyo Galilea pa nzho re xaa nanakt xaa Israel,
16re xaa nzho naz ba nzo xaa lo yalnakaw,
per ngune xaa lo tub xni gro doo,
nu noka nzho re xaa xan xkal cheen yalgut,
per mlu tub xni lo xaa. [Is. 9:1-2]
17Gorzee lee Jesús mzelo mzaa kwent cheen wdizh chul nu nzhé xaa:
—Blaa gu naletra gu re kwaan nawent nu wii gu lo Dios, nel mzhin gaxla mbizh gorna nabeyy Dios lo rese myet.
Jesús mrezh tap xaa nzen mbal
(Mr. 1:16-20; Lc. 5:1-11)
18Gorna nzhaze Jesús roo nistoo cheen Galilea, zee ngune xaa lo rop wech Simón (nu stub le xaa nak Pér) nu Ndres. Rop xaa ne nak xaa nzen mbal, nu kagobi xaa xkyeez xaa leen nis. 19Jesús nzhé lo rop xaa:
—Breke rop gu tich na, zee le na gu xaa zere myet lo Dios, kwentaxa nzen gu mbal.
20Gorzee mlaa rop xaa xkyeez xaa nu nzhake xaa tich Jesús.
21Xepse mze Jesús naz delant, zee ngune xaa lo Chag nu Juan xgann Zebedeo, nzho yon xuz xaa leen kano kagobde xaa xkyeez xaa. Nu Jesús mrezh xaa. 22Nu leeka gorzee mlaa xaa xuz xaa leen kano nu mreke xaa tich Jesús.
Jesús mseed zyen doo myet
(Lc. 6:17-19)
23Jesús mded rese yezh Galilea nu mseed xaa rese xaa, re pa nkasa be nseed be xtizh Dios, nu mzaa xaa kwent wdizh chul cheen pa nabeyy Dios, nu msekwen xaa re xaa nzak reta klas yalyizh nu reta klas yalne. 24Nu dubse yizhyo cheen Siria mbin xaa re kwaan mle Jesús, zee nyiidno xaa re xaa nzak yalyizh nu re xaa nzak yalne, xaa nzho mbi mal lextoo, xaa nzhak naxen, xaa mdeen, zee sekwen Jesús re xaa. 25Zyen doo myet mreke tich Jesús, re xaa nze naz Galilea, re xaa nze naz chii yezh kwaan le Decápolis, re xaa nze naz Jerusalén, nu re xaa nze naz yizhyo cheen Judea, nu re xaa yezh kwaan nzhi stub lad roo yuu Jordán.
Seçili Olanlar:
Mateo 4: zpo
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2002, Wycliffe Bible Translators, Inc. All rights reserved.