ZING'ANO 2
2
Amadanyi go Vogeri
1Mwana wange wigi agangwigizaa, kandi utivilira agangovoolera okole mba. 2Hulira gaveeye govogeri kandi ogerizi kugamanyiriza. 3Usave ovogeri kandi wenyelerizi limanyiriza liu musi. 4Uvwenyelerizi vudinyu kuli wenyaa ifeza anaho vutugi vwaviswa. 5Niiva ulakola ndio, ulamanya kivuni chu kutia Yahova kandi ulanyora ovogeri vwa Nyasaye. 6Yahova niye uhaanaa vogeri, kutura kuye ahaanaa limanya kandi limanyiriza. 7Ahaanaa vokonyi kandi likingwa ku vandu valungi kandi avasuuvirifu. 8Akingaa yavo avakolera avandi vulungi kandi alindaa yavo avihaana kuye.
9Niiva ulambuliriza, ulamanya agaveeye amalungi likalaga lirungi kandi liduukilu kandi ulamanya agadukanaa okole. 10Ulakave mugeri, kandi limanya liilio lilakakoletele lieyaanziza. 11Ovogeri vwuvwo kandi limanya liilio liu musi lilakukinga, 12kandi vulakugaaya kokora vindu vidamanu, vulakokola welehe ku vandu vakora vudamanu. 13Yavo na vandu vasuura limenya liu vulungi, navuzwa komenya mu kisundi chu vwoni. 14Yavo na vandu vayanzilira kokora vudamanu kandi avasangalira uvusiru vudamanu, 15avandu vaveeye avachamu, kandi avataveeye avasuuvirifu.
16Ulava nuvunyari vwukwigaya ku mukali woosi muheyi ogerizaa kokogoonya na makuva geege malahi. 17Mukali uyu siaveeye nilisuvira kumusaza weve mba kandi yivilira lilagana lilie litakatifu. 18Niiva ulazia munyumba yeeye ulava nogendaa kunzira yilikuza. Niiva ulaziayo nu kwisunda mu kivala cha vakuzu. 19Mundu woosi umugeniha si yirana kandi mba. Siyilanaa kunzira yi livamwoyo mba. 20Kunangwa ga kuduukira olonde liiva lia vandu valahi kandi omenye limenya liu vulungi. 21Avandu valungi kandi vasuuvirifu, valamenya mu kivala chietu yiki. 22Navuzwa Nyasaye alatulizaho vandu vachamu kandi avoni kutura mu kivala kuli misaala jifwaa kutura mu marova.
©Bible Society of Kenya, 2019