मार्कल 3
3
वाग़ता कयदोन येसु सव्रे कीस्तोग़
(मत्याल 12:9-14; लूकाल 6:6-11)
1अद्रमे ओसो उंद देबा, येसु पोल्वादियाते यहुदिरा पार्तनाता लोन अतोग़. अगा ओर्वोग़ वाग़ता कयदोग़ मतोग़. 2(अगा उच्वुर परुसिर वने मतोर.)पोल्वादियाते ओग़ मन्कना कयदुन येसु सव्रे कीस्तोग़ा, बार केवोग़ा, इनजोर ऊळसोर मतोर. पोल्वादियाते सव्रे कीतेके, येसुना पोग़ोन (अद दिया कबळ कीयनद) तप तोहतकोम इनजोर, पट ऊळिंदुर.#3:2 लूकाल 6:7 कालनोट ऊळाट. 3येसु वाग़ता कयदोनु, “तेदिसि नडुम वास निल्म,” इतोग़. 4पया येसु अगा मतोर मन्कलोरिन इद्रम ताल्ह्कतोग़, “पोल्वादियाते बाताल पोलिह्ता? बेसता कबळ कीयनदा, बार लाग्वा कबळ कीयनदु? जीवातुन पिसिह कीयनदा, बार बूळे कीयनदु, वेहाट!” इतोग़. मति बोरे बह वळ्ह्कोर. 5येसु ओङते सबेटोरिन ऊळतोग़, मति ओर कैंगम बुदते मतदिन ऊळिसि,#इपिसुसतोर 4:18 येसु दुकम आतोग़. आसि वाग़ता कयदोन “नीवा कय आहा!” इतोग़, अस्के ओग़ कय आहतोग़. आहतस्के ओना कय सव्रेम आता. 6पया परुसिर अग्डाह पलत पेसिसि, येसुन बह कीस हव्ककल इनजोर, एरोद राजाना तुंगातोरा संगे कलियिसि वळ्ह्किंदुर.
सम्दुरतगा वेल्लाटोर येसुनके वास्तोर
(मत्याल 12:15-16)
7अद्रमे पया येसु तनाङ कग़यवालोरिन पोसि, सम्दुरतेके अतोग़. गालिल पटटोर वेल्लाटोर लोकुरा गोह्डि, येसुना पेग़्के अतोर. 8येसु कीतद बामिह कीयनद कबळतुन केंजिसि, येरुसलेम सहरताहि, अहे यहुदा पटटाङ दुस्राङ नाह्कनाहि, इदुमिया पटटाहि, योर्दन बेरेटा अबरताङ नाह्कनाहि, सोर-सिदोन सहर्कनाहि, अव सहर्कना एरे-गूरे मनदनव नाह्कनाहि, वेल्लाटोर लोकुर येसुनगा वातोर. 9वेल्लाटोर लोकुर मताह्कु, लोकुर तना पोग़ोन अरमाकिर इनजोर, येसु तनाङ कग़यवालोरिन, “उदिस काग़्हतलाह, नाक उंदि ओडा तयर कीम्ह्टु,” इनजोर वेहतोग़. 10येसु वेल्लाटोरिन सव्रे कीस मतोग़, अदिह्क बेमरतोर ओन बोयलाह दोबेङ-नूकेङ आंदुर. 11देयह्क पोयतोर वने, लोकुरा नडुम मतोर. अव देयह्क येसुन ऊळतेक अचोन, ओना मुनेह अर्सि, “निमा देवुळता मग़निन!” इनजोर, जोरते केयिंदुङ. 12मति येसु, “नना बोनन इन्जि, बोन्के बह वेहमाटु!” इनजोर अविस्किन उकुम ईंदोग़.
येसु बारा बळयिरिन आचिह्तोग़
(मत्याल 10:1-4; लूकाल 6:12-16)
13अद्रमे उंद दिया येसु गुड्रातगा पोग़ोन तग़्ङतोग़. तग़्ङिसि तन्क विचर वातोरिन, तनगा केयतोग़. केयतस्के ओर ओनगा अतोर. 14-15अतस्के तना संगे मन्जि कग़यलाहि, देवुळता पोल्लोतुन पोकुर कीयलाह लोहतलाहि, मन्कलोरग्डाह देयह्किन पेसिह कीयनद अदिकर ईयलाहि, बारा बळयिरिन निल्पिह कीतोग़. 16ओर बारा मन्कलोराङ पेदिर्क इद्रम मन्ह्ताङ: सिमोन (वेन पत्रु इनजोर येसु दुस्रा पेदिर तासतोग़); 17जेबेदिनाङ मग़्कु याकुब ओसो योहन, वेर तमोग़ इर्वुर (बुवनरगिस इतेके गुळ्न्जना लेह्काडोर इनजोर, येसु वेरिन दुस्रा पेदिर तासतोग़); 18आंद्रेयाल, पिलिप, बार्तोलोम, मत्याल, तोमाल, अल्पुना मग़ि याकुब, तदु इनवाल यहुदाल, सिमोन (वेग़ रोम सर्करता अडम पार्टितोग़ मतोग़). 19ओसो यहुदा इस्केर्योत, वेग़े आक्रिते येसुन कोंटेतोरा कयदे पोसीतोग़.#बळयिर 1:13
सास्त्रमगूरुर येसुन देयम पोयतोग़ इन्ह्तोर
(मत्याल 12:24-32; लूकाल 11:15-22; 12:10)
20पया येसु कापेर्नाटे तना मतद लोतगा वातोग़. अस्के ओसोवने इचोन लोकुर जमा आतोर इतेके, येसुह्क ओसो ओनाङ कग़यवालोरिह्क, गाटो तिनदलाह वने अग़ दोर्को. 21येसुना लोतोर इद पोल्लोतुन केंजिसि, ओन ततलाह अतोर. बाराह्क इतेके, येसु बय्माङ आतोग़ इनजोर, लोकुर वळ्ह्किंदुर.#योहन 7:5; 2 कुरिंततोर 5:13
22उच्वुर सास्त्रमगूरुर येरुसलेम सहरताहि वास मतोर. ओर इद्रम इतोर, “वेन बेल्जेबुब इनदनद देयह्कना मुक्याल पोयता, तानाय साय्ताते, देयह्किन मन्कलोरग्डाहि पेसिह कीस्तोग़ रा!” इनजोर इतोर. 23अदिह्क येसु ओरिन तनगा केयिसि, पुन्पिह कीयनव पीटोने इद्रम वेहतोग़, “देयह्कना मुक्याल बाराह्क तनाङ देयह्किन पेसिह कीयग़ा? 24बेदाय राजेमते तमाय नडुमि कोंटेङ पुटटेके, अद राजेम निच मनो. 25अहे बेदाय लोतगा कोंटेङ पुटटेके, अद लोन निच मनो. 26अद्रमे देयह्कना मुक्याल ओसो ताना तोळताङ देयह्क, तमतमा विरुद आतेके, अविस्कना लाव मनो आवालि. 27मति उंद लोतगा नेङिस, लूटे केवाल मुने अग्डोग़ पळ्योन दोहवालेवा, अग्डा मादुन लूटे कीसि पेहता पग़वोग़. मुने पळ्योन दोहतेकेने, ओना लोतुन वेग़ लूटे कीस ओयनोग़. (अद्रमलेह्का देयह्कना पळ्योन दोहतेकेने, नना देयह्किन पूंड पग़यकन,)” इनजोर इतोग़. 28-30ओर सास्त्रमगूरुर येसुन देयम पोयता इनजोर इंदुर. अदिनेनाह्क (इद्रम तप तोहतनद, देवुळता जीवातुनपास्कतप आस्ता, इदिन तोहतलाह) येसु ओसो इतोग़, “इह केंजाट, मीक सेतेम वेहतह्नन, मन्कना सबे पापमतुनु, अहे देवुळता अडम वळ्ह्कतदिनु, देवुळि मापि कीया पग़यग़ा. मति बोग़ देवुळता पवित्र जीवातुन पास्किह्तोग़, ओन देवुळि बेस्केन मापि केवो आयग़ा.#इब्रितोर 10:29 ओग़ हातेकाय, अद पापम मापि आयवा ओनगा मन्ह्ताये,” इनजोर इतोग़.
येसुना निटम जीवातोर बोरु?
(मत्याल 12:46-50; लूकाल 8:19-21)
31पया अस्केन येसुना तलोग़ि, ओनाङ तमोर वातोर. ओर अग़दगा निचि, येसु पलत पेसेग़ इनजोर, केय लोहतोर. 32अस्के ओना सर्ने उदिस मतोर लोकुर इतोर, “गूरु, नीवा यायालि, नीवाङ तमोर पलते नीक पर्ह्कलाह आतोर,” इतोर. 33इदिन केंजिसि येसु इतोग़, “नावा यायालि, नावाङ तमोर, नावा लोतोर बोर आंदुर?” इतोग़. 34पया ओना सर्ने उदिस मतोरिन ऊळिसि इतोग़, “ऊळाट! नावा लोतोर इतेके वेरे आंदुर. 35बोर देवुळ वेहतप ताकिह्तोर, ओरे निटमे नावाङ दादालोर-तमोर, एलास्क-बायिस्कु, तलिस्क आंदुर,”#इब्रितोर 2:11 इनजोर येसु इतोग़.
Seçili Olanlar:
मार्कल 3: माडियाबाय्बल
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2021, Wycliffe Bible Translators, Inc. All rights reserved.
