Матфеё 5 Popüler Kutsal Kitap Ayetleri

Paylaş

И ке́ли захачкирэна момолы́ (све́чка), на чхувэ́на ла тэл пири́, а дро шандало (подсвечнико) тэ свэнцынэл яг пир саро́ кхэр. Адя́кэ мэк тэ свэнцынэл тумари́ яг анги́л манушэ́ндэ, соб (кай) ёнэ тэ дыкхэ́н тумарэ́ лачхэ́ рэ́нды и тэ славинэ́н Дадэ́с тумарэс Болыбнаскирэс.

Тумэ́ исын сыр яг ваш сарэ́ манушэ́нгэ. Фо́ро, со исын пэ бэ́рга пэ вучипэ́н, на могинэ́ла тэ ґарадёл.

Бахталэ́ исын одолэ́, савэ́ндэ исын жужо́ (чы́сто) ило́, пал-дова́ со ёнэ дыкхэ́на Дэвлэ́с.

Бахталэ́ исын одолэ́, конэ́скиро ило́ исын бокхало пал Дэвлэ́скиро лав и сыр пани́ древа́н родэ́ла чачипэ́н. Дэвэ́л чалякирэла лэ́нгиро ило́.

Нэ Мэ пхэна́ва тумэ́нгэ: сыкавэ́н паты́в пэ́скирэ вэргэ́нгэ, и мангэ́нпэ Дэвлэ́скэ пал одолэ́ндэ, савэ́ кошэна тумэн, кэрэ́н лачхипэ́н одолэ́нгэ, савэ́ древа́н на камэ́на тумэн и мангэ́нпэ Дэвлэ́скэ пал одолэ́ндэ, савэ́ нашукар отлыджанапэ кэ тумэ́ и традэ́на тумэн

“Бахталэ́ исын одолэ́, савэ́ джинэ́на, со лэ́нгирэ духоскэ трэй Дэвэ́л; лэ́нгиро сыс Кралипэ́н дро Дэвлэ́скиро Раё.

Бахталэ́ исын одолэ́, савэ́ кэрэ́на рама́нё (миро), пал-дова́ со явэ́на тэ кхарэ́н лэн ‘Дэвлэ́скирэ чхавэ́.’

Бахталэ́ исын одолэ́, савэ́ ровэна, пал-дова́ со Дэвэ́л подрикирэ́ла лэ́нгиро ду́хо (фа́но).

Бахталэ́ исын одолэ́, конэ́с традэ́на пал чачипэ́н; лэ́нгиро исын Кралипэ́н дро Дэвлэ́скиро Раё.

Бахталэ́ исын одолэ́, савэ́ примангэна банг манушэ́нгэ, пал-дова́ со лэ́нгэ явэ́ла примангло.

Бахталэ́ сан тумэ́, ке́ли мануша́ явэ́на тэ кошэн тумэн и тэ традэ́н, и явэ́на тэ ракирэ́н налачхэ́ лава́ пэ тумэ́ндэ пал Ма́ндэ. Явэ́н бахталэ́ и радынэ́нпэ, пал-дова́ со баро́ отдыибэ́н Дэвлэ́стыр ужакирэ́ла тумэн дро Болыбна́скиро Раё: адя́кэ традэнас и пророкэ́н, савэ́ сыс анги́л тумэ́ндэ.

Бахталэ́ исын ковлэ́-илы́тка, пал-дова́ со пхув явэ́ла лэ́нгири.

Тумэ́ исын сыр лонд ваш сарэ́ манушэ́нгэ. Ко́ли ж лонд нашавэла пэ́скиро лондыпэн, нисыр нашты́ тэ кэрэ́с, соб (кай) нэвэ́стыр лонд тэ явэ́л лондо; лэ́стэ буты́р ни саво́ лачхипэ́н нанэ, екх со тэ вычхурдэс лэс яври́ тэ штавэн мануша́ ґэрэ́нца.

Палдова́ явэ́н бидошакирэ, сыр бидошакиро исын тумаро́ Болыбна́скиро Дад.

Мэк тэ явэ́л тумаро́ лав ‘ны, ны’, ‘над, над’, а со упрэдыр далэ́стыр, дова́ исын налачхэстыр.’

Тумэ́ шундлэ́, со сыс пхэндло́: ‘Якх пал якх, и данд пал данд.’ Нэ Мэ ракира́ва тумэ́нгэ: на кэр фуипэ́н палэ одолэ́скэ, кон кэрдя́ фуипэ́н ту́кэ; нэ кон пэкавэла тут дрэ тыри́ чачи́ (право) чам (шчока), тэ́ньчи ри́скир кэ ёв яви́р.

Ко́ли ж чачи́ якх злыджала тут кэ грэ́хо, ри́скир ла яври́ и вычхурдэ; пал-дова́ со фэды́р ваш ту́кэ тэ нашавэс екх якх, сыр саро́ тэ джал дро лю́но (адо). Ко́ли ж чачо́ (пра́во) васт лыджа́ла тут кэ грэ́хо, отчингир лэс и вычхурдэ; пал-дова́ со фэды́р ваш ту́кэ тэ нашавэс екх васт, сыр сарэ́ маса́ тэ джа́н дро лю́но.