If you have would like a copy of this version please contact info@davarpartners.org

Cipangano Cipiya 2015

Ila New Testament © Bible Society of Zambia, 2015.

Kuli ulemekwa Teyofilasi, nikuba ati bantu banji banji bakasoleka kulemba makani ashintu shesho shakacitika akati kesu, bakalemba kwiingainya umbutwakashimwinwa ubakamboni bakabona shintu shesho kuhwa ku makancilo, ulimwi kabakambauka Mulumbe wezo. Inzho uulemekwa Teyofilasi, shintu shoonse sheshi ndakashibuzhabuzha kabotu kabotu mbuli mbushicilizhenye kuhwa ciindi nishakakanka kucitika, ubobo ndazanda ati nshilembe. Ndacita bobo kwaamba uzhibe lushinizho mu twaambo toonse ntuwakayiishiwa.

Ku ciindi mwami Helodi naakaakulela cishi ca Judiya, kakuli mupaizhi wakaakutewa ati Zakaliya, kali wa mukabunga ka bapaizhi kana Abija. Zakaliya katwele mukaintu uutewa ati Lizabeti wamukowa waka Aloni. Boonse bobile kabali bantu balulami, kabeenda mu malailile u kucilila Milawo ya Leza yoonse ca kubula kampenda. Pele kabaina mwana, nkaambo Lizabeti katazhali ulimwi boonse bobile kabali bacembele.
Bumwi buzuba, Zakaliya kali muŋanda ya Leza kucita mulimo wakwe wabupaizhi, kaambo kabuli bulizhi bwankamu yakwe. Inzho kwiingainya uciyanza ca bapaizhi, bakasala Zakaliya kwaamba ati nguuya muŋanda ya Leza kutenta tununcilizho mu busena busalala. Inkamu ya bantu keesheele ansengwe ilakomba ciindi Zakaliya naakaakutenta tununcilizho. Ngoonaawo Zakaliya wakabona anjelo wa Mwami, ulizhimine kuluya lwa cilyo lwa cipaililo aakaakutentelwa tununcilizho. Ceci cakamuzhinga Zakaliya, ulimwi wakatiya cini cini. Pele anjelo wakamwaambila ati, “Utatiyi Zakaliya! Leza wateelela kukomba kwako, mwinako Lizabeti ulakakuzhalila mwana mweembezhi wezo nguukaaulika ati Johani. Kulakaba kubotelwa ukutangala cini cini, u bantu banji banji balakabotelwa ukaambo kakuzhalwa kwakwe! Wezu mwana ulakaba mulemu ku bushu bwa Leza, ulimwi takanwi waini pe, nishiba shimwi shikola, ulakakwata insana sha Moza Usalala kacili mwifwu lyakabaina. Wezu muntu ulakacita kwaamba ba Izilaili banji banji bazhoke ku Mwami Leza wabo. Inzho Johani nguukaasololela Mwami Jeso, ulimwi ulakaakukwete insana sha Moza shili ukoya shaakaakukwete mushinshimi Elaija. Ulakaleta kuteelezhanya akati kabana ubamaushabo, ulakalulamika bantu bataluleme kwaamba babe u mizeezo mibotu, ulakacita bantu ba Mwami kwaamba balibambile.” Zakaliya wakamubuzha anjelo ati, “No ndazhiba buti ati ceci nciwaamba cilakacitika? Nkaambo ndakomena, aze mwinangu mucembele.”
Anjelo wakamwiingula ati, “Ndime Gabuliyele! Mutwanga wa Leza uuzhima ku bushu bwakwe ciindi coonse. Wantuma kwaamba nzhize nkwaambile aza makani. Inzho ulaba shicintaamba, ubobo tuukwaamba kushicila sheshi shintu shikacitike nkaambo wiina kwaashoma mazwi angu aza aakaacitika ku ciindi ceelele.”
Ku ciindi ceco bantu kabamulindila Zakaliya, bakakanka kubuzhanya ati, “No nkaamboonzhi wamuka kuhwa muŋanda ya Leza?” Naakamuhwa, wakakacilwa kwaamba, wakakanka kutambaika matashi cakutaamba linji, ubobo bantu bakashimpikila kuzhiba ati wabona cilengaano muŋanda ya Leza.
Bulizhi bwakwe bwakusebeza muŋanda ya Leza nibwakamana, Zakaliya wakaya kwakwe. Inzho nikwakaita mazuba, Lizabeti wakemita, amane wakaliseseka ku bantu kwa myezhi yosanwe, ulaamba ati, “Inzho Mwami wamfwila luse nkaambo wantaba, wankusha insoni ku bantu!”

Ciindi Lizabeti naakakwanya mwezhi iili cisambomwi yakumita, Leza wakatuma anjelo Gabuliyele kuya ku Nazanleta mucishi ca Galilaya. Wakamutuma kunakalindu wakaakuseselwe ku mulombwana uutewa ati Jozefu wa luhubo lwa Devidi, izhina lya nakalindu wezo kali Maliya. Anjelo wakeza kwakwe wamwaambila ati, “Uwe umulonjezhe, Mwami Leza abe aze.” Maliya naakaateelela aza mazwi wakazhingwa cini cini, wakalibuzha mu monzo wakwe ati, “Anu nkwaanzha kuli buti koku?” Inzho anjelo wakamwaambila ati, “Utatiyi Maliya, Mwami Leza wakufwila luse. Bona, ulakamita u kuzhala mwana mweembezhi, ulakamuulika izhina lya Jeso. Ulakaba mulemu, ulakaakutewa ati Mwanakwe Namakungwe Mutalabala. Mwami Leza ulakamupa bwami buli ukoya mbwaakaakubele Devidi ushi, ulakaba muleli wamushobo wa Izilaili shikwense uushikwense, bulelo bwakwe tabukamana!”
Inzho Maliya wakamubuzha anjelo ati, “No ceci cilakonzha kuba buti kwangu ume iintezhi mulombwana?”
Anjelo wakamwiingula ati, “Moza Usalala ulakeza alyuuwe, iinsana sha Leza wamwizeulu shilakakuhumba. Wezo nguukaazhala Usalala ulakaakutewa ati Mwanakwe Leza. Sa ulamuzhibaluka Lizabeti musazhinoko welya ngubakaakwaamba ati tazhali? Inzho ulimishi mwana mweembezhi mu bucembele bwakwe. Mwezhi weno ngwacisambomwi. Nkaambo kwiina cikaka kwa Leza.”
Maliya wakaamba ati, “Ume ndimuzhike wa Mwami, acibe kwangu mbubona mbuwaamba.” Ngoonaawo anjelo wakamushiya.

Kwiite mazuba mashoonto, Maliya wakabweza lweendo cakubindaana kuya ku munzhi uuli mu mapili mucishi ca Judiya. Wakaya kunjila muŋanda yaka Zakaliya, wakamwaanzha Lizabeti. Inzho Lizabeti nakateelela kwaanzha kwaa Maliya, mwana wakaakuli mwifwu lyakwe, wakasamba ca kubotelwa. Ngoonaawo Lizabeti wakeendelezhewa u Moza Usalala, wakapozomoka ati, “Ulikwete coolwe uwe akati kabakaintu boonse, u mwana ngukaazhala ulikwete coolwe! Anu ndime ni iinkonzha kuswayiwa kwa baina Mwami wangu? Mbuwaŋanzhizha bulyo, aze mwana uuli mwifwu wasamba ca kubotelwa. Ulikwete coolwe nkaambo wakashoma ati, makani a Leza nguwakaambilwa alishinizhe alakacitika.”

Maliya wakaamba ati,
“Ndakulumba Mwami mu monzo wangu.
Moza wabotelwa cini cini kaambo ka Leza mufwutuli wangu,
ukuti wazhibaluka kulicesha kwangu, ume ndimuzhike wakwe.
Inzho mazhalane oonse alakenta ati, uli ucoolwe,
nkaambo Leza shinsana shoonse wancitila shintu shikando,
nkaambo kezhina lyakwe lilasalala.
Wakatondezha luse ku bantu boonse bamulemeka, kukancila kwizhalane limwi kushicila kuli limwi.
Wakacita shintu shizoosha iitashi lyakwe, ukwaandaanya bantu bakwete mizeezo yamatunta mu myonzo yabo.
Wabakusha baleli bashinsana mu shuuna shabo ukusumpula balibonzha.
Bafwile inzala bekuta shintu shibotu,
bahubi wabatanda cinkambaminwe.
Wacibamba cishomezho ncaakashomezha kuli ba shaakale besu,
ulimwi wamuyohwa Izilaili musebezhi wakwe.
Wazhibaluka kuba shiluse kwa shaakale wesu Abulahamu
ukuluhubo lwakwe luzhiza shikwense u shikwense.”
Maliya wakakala u Lizabeti kwa myezhi iitiikabe yotatwe, amane wakapiluka kwakwe.

Ciindi nicakashika caka Lizabeti cakutumbuka, wakazhala mwana mweembezhi. Bashimukobonina ubasazhiina nibakateelela Mwami mbwaakatondezha luse kwa Lizabeti, boonse bakasekelela antoomwi.
Inzho mwana naakakwanya mazuba ali lusele, bakeza kwaamba bamupalule. Kabazanda kumuulika izhina lya ushi, ati ngu Zakaliya. Pele baina wakaamba ati, “Pe pe! Izhina lyakwe ngu Johani.”
Bantu bakaamba ati, “Kwiina musazhinoko naaba womwi uukwete izhina leli.” Ngoonaawo bakatambaika matashi kwa ushi, kumubuzha izhina ndyazanda kuulika mwanakwe.
Ngoonaawo Zakaliya wakalomba shakulembela kwiita mukutambaika matashi amane walemba ati, izhina lyakwe ngu Johani. Inzho bantu boonse bakazhingwa. Mbwaakamanina bulyo kulemba, Zakaliya wakakanka kwaamba ulimwi ukutembaula Leza. Beenzhiina boonse bakatiya cini cini, u makani aza akayeempuwo mucishi coonse ca mapili a Judiya. Boonse babo bakateelela sheshi shintu bakashibika mu myonzo yabo, bakaabuzhanya ati, “Anu wezu mwana ulakaba muntu uuli buti?” Nkaambo cakalibonya kwaamba ati, insana sha Leza kashilyaaze.

Zakaliya ushi Johani, wakeendelezhewa u Moza Usalala, wakashinshima ati,
“Atembaulwe Mwami Leza wa Izilaili,
nkaambo weza kuyohwa ukunununa bantu bakwe.
Wakatupa mufwutuli shinsana kwiza kutufwutula, wakahwa muluhubo lwaka Devidi.
Umbona mbwaakaamba kwiita mu bashinshimi bakwe ku mazuba a kale kale basalala.
Wakaamba ati, ulakatufwutula kuhwa mu matashi a bashinkondonokwesu, u babo batuswile.
Wakaamba ati ulakabacitila luse baushesu bakale kale, ulimwi takaluba cihuminano cakwe cisalala.
Ncakapinga kwa ushesu Abulahamu, ukutushomezha ati,
ulakatuhuna kumatashi a bashinkondonokwesu kwaamba ati tukamusebezele cakubula bukandu,
ukweenda cabusalazhi ubululami, kwaamba tube basalazhi ubalulami ku mazuba oonse a bumi bwesu.
Uwe u mwanangu ulakatewa ati, mushinshimi wa Namakungwe Mutalabala, ulakasololela Mwami kumululamicila inzhila yakwe.
Ulakazhibya bantu bakwe kwaamba balakafwutulwa u kulecelelwa shibi shabo.
Lufwutuko lwa Mwami lulakeza kulyuuswe kuhwa kwizeulu, ukoya mumuni wezuba kumahwilo,
ulakamunikila bantu boonse bashite mu mushinze umucinhule ca lufwu, ukutusololela muluumuno.”
Inzho Johani wakakomena ku mubili uku Moza. Wakaakukala mulukula kushikila kubuzuba naakakanka milimo yakwe ya buleya mu Izilaili.

Dinleyin Luka 1