If you have would like a copy of this version please contact info@davarpartners.org

Text: Garhwali New Testament, CC-BY-SA-4.0, The Love Fellowship. -- Audio: Garhwali New Testament Audio Bible, CC-BY-SA-4.0, Davar Partners International, The Love Fellowship, 2021

Garhwali New Testament

Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.

जब राजा हेरोदेस यहूदिया प्रान्त पर शासन कनु छो, त यीशु को जन्म वे प्रान्त का बैतलहम शहर मा हवे, त पूरब का देश बट्टी कथग ही ज्योतिषि यरूशलेम शहर मा ऐ के पुछण लगि गैनी कि, “यहूदियों कु राजा जै को जन्म हवे उ कख च? किलैकि हम ल पूरब दिशा मा वेका जन्म का बारा मा आराधना कन वलो गैंणो देखि अर वे तैं प्रणाम कनु कु अयां छा।”
यहूदियों का राजा का जन्म का बारा मा यु सूंणि के राजा हेरोदेस अर वेका दगड़ा मा यरूशलेम शहर का भौत सा लोग घबरै गैनी। तब वेल सभि प्रधान याजकों अर मूसा की व्यवस्था तैं सिखांण वलो तैं कठ्ठा कैरी कै ऊं बट्टी पूछि कि, मसीह कख पैदा होलो? “ऊंल वेमा बोलि” मसीह कु जन्म यहूदिया प्रान्त का बैतलहम शहर मा होलो, किलैकि मीका जु परमेश्वर का तरपां बट्टी बुल्ण वलो छो वेका द्वारा इन लिखै गै। “कि हे यहूदिया प्रान्त का, बैतलहम शहर का लुखुं तु जु यहूदिया प्रान्त का प्रदेश मा छै तु कनके भि यहूदा का अधिकारियों मा सबसे छुटो नि छै किलैकि त्वे मा बट्टी एक आदिम आलो जु अधिपति बणालो जु मेरी प्रजा इस्राएल का लुखुं कि रखवली करलो।”
राजा हेरोदेस ल वे बच्चा की उम्र जनणु कु ज्योतिषियों तैं चुपके से बुलै के पूछि, कि गैंणो ठिक कै बगत मा दिखै गै छो। अर वेल यु बोलि के ऊं तैं बैतलहम भेजि, “जावा अर वे बच्चा का बारा मा ठिक-ठिक पता कैरा अर जब उ मिली जौ त मि मा वापिस ऐ के जु कुछ तुम ल देखि वे तैं मि तैं बतावा कि मि भि ऐ के वे तैं प्रणाम कर वेकी आराधना कैरू।”
उ राजा कि बात सूंणि के चलि गैनी अर जु गैंणो ऊंल पूर्व मा देखि छो उ ऊंका अगनैं-अगनैं चलि अर जख उ बच्चा छो वीं जगह का मथि पौंछि के ठैरिगे। वे गैंणो तैं देखि के उ भौत खुश हवेनि। ऊंल वेका घौर मा वेकी ब्वे मरियम अर यीशु देखि, त अपड़ा मुंड़ो तैं झुखै के वेकी आराधना अर प्रणाम कैरी अर अपड़ा-अपड़ा थैलों तैं खोलि के वे तैं सोना अर लोबान अर गन्धरस भेंट चड़ै। तब ऊंल सुपन्या मा या चेतावनी पै कि राजा हेरोदेस का संमणी फिर नि जयां अर उ बगैर बतयां दुसरा बट्टा बट्टी अपड़ा देशों कु चलि गैनी।

ऊंका जांणा का बाद प्रभु का एक स्वर्गदूत ल यूसुफ का सुपन्या मा ऐ के बोलि, “उठ वे बच्चा तैं अर वेकी ब्वे तैं ले के मिस्र देश कु भागि जा, अर जब तक मि त्वे मा नि बोलु तब तक उखि रै किलैकि राजा हेरोदेस यु बच्चा तैं ढुंडणु च कि वे तैं मरवै द्यो।”
तब उ राती उठि के बच्चा तैं अर वेकी ब्वे तैं ले के मिस्र देश कु चलि गै। अर राजा हेरोदेस का मुरण तक मिस्र देश मा ही रै, इलै की उ वचन जु होशे जु परमेश्वर का तरपां बट्टी बुल्ण वलो का द्वारा भौत पैली बोलि छो उ पूरो हो कि, “मिल अपड़ा नौंना तैं मिस्र बट्टी बुलै।”

तब राजा हेरोदेस गुस्सा हवे, कि ज्योतिषियों ल वे दगड़ी धोखा कैरी अर लुखुं तैं भेजि के ज्योतिषियों का द्वारा ठिक-ठिक बतयां बगत का अनुसार बैतलहम शहर अर वेका अमणी-संमणी का सभि जगह का सब नौंनो तैं जु द्वी बरस से कम उम्र का छुटा नौंना छा मरवै दींनि। तब जु वचन यिर्मयाह जु परमेश्वर का तरपां बट्टी बुल्ण वलो छो, उ पूरो हवे।
“रामाह नगर मा एक दुःख-नाद सुंणै गै
रूण अर बिजां चिल्लाहट
राहेल अपड़ा नौंनो कु रूंणी छै
अर शांत हूंण चाँदि छै किलैकि उ अब नि रैनी।”

जब युसूफ, मरियम अर बालक यीशु मिस्र मा ही छा तब राजा हेरोदेस का मुरणा का बाद प्रभु का स्वर्गदूतों ल मिस्र देश मा यूसुफ का सुपन्या मा ऐ के बोलि, “उठ नौंना तैं अर वेकी ब्वे तैं ले के इस्राएल देश मा चलि जा किलैकि राजा हेरोदेस जु नौंना तैं मरण चांणु छो उ अब मोरि गै।”
तब यूसुफ उठि अर बालक अर वेकी ब्वे मरियम तैं दगड़ा मा मिस्र देश तैं छोड़ी के इस्राएल देश मा ऐ। इलै जब युसूफ ल यु सूंणि के कि अरखिलाउस अपड़ा बुबा राजा हेरोदेस जगह मा यहूदिया प्रान्त पर राज्य कनु च उख जांण से डौर गै अर सुपन्या मा परमेश्वर बट्टी चेतावनी पै के गलील जिला मा चलि गै अर नासरत नौं का गौं मा बसी गै इलै की उ वचन पूरो हो जु परमेश्वर का तरपां बट्टी बुल्ण वलो का द्वारा यीशु का बारा मा बुलै गै छो “कि वे तैं नासरत नगर बट्टी औंण वलो बुलै जालो।”

Dinleyin मत्ती 2