If you would like a copy of this version please contact info@davaraudiobibles.org

Chambeali Bible, CC-BY-SA-4.0, Beyond Translation. (Text)
Chambeali Audio Bible, CC-BY-SA-4.0, Davar Partners International, Beyond Translation, 2026. (Audio)

Chambeali Bible

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

तिन्हा रोज्जां बिच रोम देस रे सम्राट औगुस्तुस ने ए हुकम दित्ता की सारे रोमी साम्राज्य रे सारे मणू गिणे जाये ताकि तिन्हेरे का चुंगी वसूली जाए। ए जनगणना तिस्स बेल्ले होई थी, जां सीरिया प्रदेश रा राजपाल क्विरिनियुस थिया, अते ए जनगणना पैल्ली वरी होया करदी थी। सब मणू जनगणना तांइ अपणा नां लिखाणे तांइ अपणे-अपणे सहर जो गे। ते यूसुफ जे कि गलील प्रदेश रे नासरत कस्बे अन्दर रैहन्दा थिया, तिसजो भी यहूदियां प्रदेश अन्दर बैतलहम कस्बे जो जाणा पेया, किजोकी से दाऊद राज्जे रे टब्बरे रा थिया, ते तिसेरे पुरखे बैतलहम कस्बे अन्दर रैह्‍न्दे थिये। ते से अपणी मंगेतर मरियम, जे कि उस बेल्ले दुपराणी थी, तिसजो भी अप्पु कन्ने नां लखाणे जो लेई गेया जां से मणू बैतलहम कस्बे बिच ही थिये तां मरियम रे लोक्किणे रा समय आई गेया, ते तिनिये अपणे पैल्ले मुंडे, यीशु जो जम्मेया, अते तिसजो फालड़ी अन्दर लपेटी करी चरिह् अन्दर रखेया, किजोकी तिन्हेरे जो सराये बिच रैह्णे तांइ जगाह् नी मिल्ली थी।

ते तिधाड़ी ही तिस इलाके अन्दर किच्‍छ पुहाल रात्ती बेल्ले अपणे धणा रा द्रबड़ा अन्दर पैह्रा देया करदे थिये। ते तिस बेल्ले इक्क परमेश्वर रा स्वर्गदूत तिन्हेरे मुहाग्गर आई खड़ा होया, ते प्रभु री महिमामय रौसनी ने तिन्हा जो चौंह्-पास्से का घेरी लेया, ते ए सब दिख्खी करी से बड़े-भरी डरी गे। ते तिस बेल्ले स्वर्गदूत ने तिन्हा जो बोल्लेया, तुसा डरो मत, किजोकी दिख्खो, मैं तुसा जो इक्क इदेया सुब बसेख सूणाणा, जे सबणी मणूआं तांइ होणा, ते से सुब बसेख ए है, कि अज्ज दाऊद राज्जा रे कस्बे बैतलहम अन्दर सबणी मणूआं तांइ इक्क छुटकारा दैणे वाले रा जन्म होया, अते से ही मसीह प्रभु हिन, ते तुसा जो इस गल्ल रा विश्वास कराणे तांइ ए पछाण दिन्दा, कि तुसा ने इक्क निक्के जो फालड़ी बिच लपटित्तेरा, चरिह् अन्दर दिख्खणा। तिस्सी बेल्ले, चाण-चक्केई तिस स्वर्गदूत कन्ने मते सारे स्वर्ग रे होर भी दूतां रा झुण्ड परमेश्वर री बड़ाई करदे करदे लिब्बेया ते से ए बोलणा लग्गे,
“स्वर्ग अन्दर परमेश्वर री बड़ाई हो,
ते दुनिया अन्दर तिन्हा मणूआं अन्दर सांती हो
जिन्हा कने परमेश्वर खुस हिन।”
जिस बेल्ले से स्वर्गदूत तित्ते का वापस स्वर्ग जो हटी गे तां पुहाल अप्पु-मिते बोलणा लग्गे, चलो, असा बैतलहम जाई करी ए जे अनौखी गल्ल होई, जिस्सेरे बारे अन्दर प्रभु जी ने असा जो अपणे स्वर्गदूत जो भेज्जी करी बोल्ली, असा दिख्खी आन्दे ते तिस्सी बेल्ले से चली गे ते तित्ते जाई करी तिन्हा ने मरियम ते यूसुफ जो इक्क गुआड़ी बिच, ते तिस निक्के जो फालड़ी अन्दर लिपटित्तेरा चरिह् अन्दर लेटे रा दिख्खेया। ए सब दिखणा का बाद तिन्हा पुहालां ने से सब किच्‍छ याद कित्तेया जे स्वर्गदूतां ने तिन्हा कने द्रब्बड़ बिच बोल्ली थियां। जितणे भी मणूआं ने पुहालां री ए गल्ल सूणी, से सब मणू हैरान होई गे। पर, मरियम इन्हा सबणी गल्लां जो अपणे मना बिच रख्खी करी सोचदी रेह्ई ते जिय्यां स्वर्गदूतां ने पुहालां जो बोल्ले रा थिया, तिय्यां ही सब किच्‍छ दिख्खी-सूणी करी परमेश्वर री जै-जै कार अते बड़ाई करदे-करदे वापस द्रबड़ा जो अपणे धणा का हटी गे।

यीशु रे पैदा होणे का बाद अठ्ठमे रोज्जे, तिन्हेरा खतना होया ते तिन्हेरा नां यीशु रख्खेया गेया, जिय्यां कि तिन्हेरे पैदा होणे का पैल्ले ही स्वर्गदूत ने मरियम जो बोल्लेया थिया।

मूसा रे कानून रे हिसाब कने मुंडे रे पैदा होणे रे चाली दिनां बाद, मन्दिर बिच मरियम री शुद्वीकरण री कुर्बानी दैणे रा समय थिया, ते मरियम ते यूसुफ यीशु जो परमेश्वर रे सामणे समर्पित करणे तांइ यरुशलेम रे मन्दिर बिच लेई गे। जिय्यां कि परमेश्वर रे कानून बिच लिख्खे रा है, कि जेठ्ठा मुडां परमेश्वर रा ही कम्म करणे तांइ समर्पित कित्तेया जाए। ते परमेश्वर रे कानून रे हिसाब कने घुग्घी रा इक्क जोड़ा या कबूतर रे दो बच्चेयां जो कुर्बानी करी के परमेश्वर जो चढ़ाण।

तिन्हा दिनां बिच, यरुशलेम सहर अन्दर शमौन नां रा इक्क मणू रैहन्दा थिया, से परमेश्वर रे रस्ते पर चलणे वाला, भला अते नेक मणू थिया, से बड़ी उम्मीद कने मसीह रे आणे रा इंतजार करेया करदा थिया ताकि से आई करी इस्राएल रे मणूआं जो सांती दये, ते शमौन पवित्रात्मा रे गलाये चलदा थिया। ते पवित्रात्मा ने तिस पर ज़ाहिर कित्तेया थिया, कि तैं तां तांइ नी मरणा है, जां तांइ तू परमेश्वर रे भेज्जे रे “मसीह” जो अपणी हाख्खी कने दिख्खी नी लैणा। फिरी शमौन जो पवित्रात्मा ने यरुशलेम रे मन्दिर अन्दर जाणे जो बोल्लेया, ते तिस्सी रोज्जे यूसुफ कने मरियम परमेश्वर रे कानून रे हिसाब कने अपणे निक्के, यीशु जो सभास्थल अन्दर लेई आये ताकि से अपणे निक्के जो परमेश्वर रे अग्गे सौंपी सकण। शमौन तिस बेल्ले सभास्थल अन्दर ही थिया, ते से यीशु जो अपणे हत्थां बिच चुक्की करी परमेश्वर री बड़ाई करदे-करदे बोलणा लग्गेया: ओ मेरे प्रभु जी, अवे मैं सांती कने मरी सकदा, किजोकी तुसा री बोल्ले री गल्ल अज्ज पूरी होई गई, किजोकी, मैं अपणी हाख्खी कने तुसा रे भेजे रे छुटकारा दैणे वाले जो दिख्खी लेया, जिस जो तुसा ने देस रे सबणी मणूआं तांइ भेज्जेया ताकि मसीह गैर यहूदी मणूआं जो परमेश्वर रा रस्ता दिखाणे वाली रौसनी बणना, ते इस्राएल रे मणू, जे कि तुसा रे अपणे हिन, तिन्हा तांइ ए परमेश्वर री महिमा लियाणे री वजह बणना। जे गल्लां शमौन ने यीशु रे बारे बिच बोल्ली थी, से सुणी करी, यूसुफ ते मरियम हैरान होई गे। फिरी शमौन ने तिन्हा जो आशीष देई करी यीशु री मां, मरियम जो बोल्लेया, इस निक्के री वजह कने इस्राएल रे मते मणू बचाए जाणे ते मते मणू नास होणे, ते बड़े लोक्कां ने इसेरे खिलाफ होणा। इस कने मते लोक्कां री दिल री लुके री गल्लां सामणे आई जाणी, ते लोक्कां ने तिस कने इन्नी क्रूर चीजां करणी कि से दिख्खी करी तुसा जो इन्नी तकलीफ होणी कि जिय्यां तुसा रे दिल बिच तलवार खूबी गे री हो।

अशेर गोत्र बिच का फनुएल री कुड़ी हन्ना इक्क भविष्यद्वक्तिणी करणे वाली थी, तिसेरे ब्याह् जो हल्ले कोई सत्त साल ही होये रे थिये, कि तिसेरा लाड़ा मरी गेया। ते से फिरी चुरास्सी साल्लां तांइ विधवा ही रेई। तिनिए मन्दिर जो कदी भी नी छड्डेया, ब्रत्त अते प्रार्थना करदे परमेश्वर री भक्ति करदी रेह्न्दी थी। जां से मणू मन्दिर बिच ही थिये, तां हन्ना तिन्हा लोक्कां का आई, ते परमेश्वर री महिमा करणा लग्गी, ते तिसने लोक्कां जो तिस मुंडे रे बारे बिच दसणा लग्गी जे मणू तिस मसीह रे इंतजार बिच थिये जिस जो ने भेज्जी करी यरुशलेम रे लोक्कां जो छुटकारा दैणा।

जां मरियम ते यूसुफ परमेश्वर रे कानून रे हिसाब कने सब किच्‍छ पूरा करी बैठ्ठे, तां से अपणे घरे, नासरत कस्बे बिच जे कि गलील प्रदेश बिच है, तित्ते जो हटी गे।

ते तित्ते यीशु जिस्मानी ते आत्मिक गल्लां अन्दर मुटिंदे गे से समजदार थिये ते परमेश्वर री दया तिन्हा पर थी फसह रा त्याहार पर हर साल, तिन्हेरे मां-प्यो, यूसुफ ते मरियम यरुशलेम जान्दे थिये। जां यीशु बारा साल्ले रे होये, तां से हर वरी सांई फसह रा त्यहार मनाणे तांइ यरुशलेम जो गे जां त्योहर मुकी गेया, तां मरियम ते यूसुफ घरे जो हटेया करदे थिये, तां यीशु यरुशलेम बिच ही रेई गे, ए गल्ल तिन्हेरे मां प्यो जो पैल्ले ध्यान बिच नी आई कि तिन्हेरा निक्का तिन्हा कन्ने नी है। तिन्हा ने ए समजेया, कि तिन्हेरा निक्का होरणी मणूआं कने होणा, जां से पूरी ध्याड़ी सफर करदे रे तां से यीशु जो अपणे रिस्तेदरां अन्दर तोपणा लग्गे पर जां तिन्हा जो अपणा निक्का नी मिल्लेया तां से दोह्ई जणे तिस्जो तोपदे-तोपदे यरुशलेम जो वापस हटी गे फिरी इय्यां होया कि त्रीय्ये रोज्जे तिन्हा ने यीशु जो मन्दिर रे अंगण बिच परमेश्वर रे कानून रे सखाणे वालेयां रे मंझाटे बैठ्ठे रा ते तिन्हेरी सूणदे ते तिन्हा कने सुआल पुछदे दिख्खेया। से सब जह्णे, जे कि यीशु री गल्लां सूणदे थिये, से तिन्हेरी समजदारी अते तिन्हेरे सुआलाँ का हैरान थिये जां यीशु रे मां-प्यो ने भी तिन्हा जो दिख्खेया तां से भी हैरान होई गे ते मरियम ने यीशु जो पूच्छेया, ओ निक्केया, तैं असा रे कने इय्यां किजो कित्ता, तू इत्ते किजो रुकी गे रा थिया? असा बड़े उदास होई गेरे थिये, तेरे प्यो ते मैं, तिज्जो कुते कुते नी तोप्पेया? यीशु ने तिन्हा जो बोल्लेया, तुसा मेरे जो किजो तोपदे थिये? कै तुसा ए नी जाणदे कि मेरे तांइ अपणे प्यो रे घरे रैह्णा कितणा जरुरी है? पर यीशु ने तिन्हा जो जे जवाब दित्तेया, से तिन्हेरी समझ अन्दर नी आया। ते फिरी से तिन्हा कने नासरत कस्बे बिच आई गे ते अपणे मां प्यो रे गलाए पर चलदे रे ते यीशु री मां ने इन्हा सब गल्लां जो अपणे मन बिच ही रख्खेया, ते यीशु समझ, कद-काठी अते परमेश्वर ते मणूआं री दया बिच बद्धदे गे।

Dinleyin लूका 2