Yohane 5
5
Yesu chʋɔ lʋmtɛ wʋrʋ dɩpatɛ garɛ jaŋ
1Ŋina wʋrʋgbɩɛ na, Yesu ju Yerusalem na wʋ a di Yudatina asadi adiya di ŋarɛ. 2Dɩpatɛ garɛ wɩɛ Yerusalem dɩɛ naŋ tirina Feŋ Buonɔ baa yagɛ ga Aramiki#5:2 Dɩmʋŋ saŋa gana na, Aramiki dɩtawɩ yɩɛ dɩtawɩ gaa ga tirina Hibiri dɩtawɩ sɛ Yudatina galaga a tawɩ ga. dɩtawɩ naŋ sɛ Betisada. Sɛ ba baŋ akoneŋ anʋŋ logo ga. 3Akoneŋ ŋina naŋ sɛ lʋmɩɛtina fɔɩ takɩɛ bataŋpʋna, buobi aba na baa ba jaɩ-jaɩ na duwei. 4Dɩ tala saŋa garɛ na, Ɩsʋɔ gabʋɔ aja kɔŋ gaa sarɛ lɩŋ ŋii naŋ. Lʋmtɛ wʋŋ wʋ a chɩŋkpɩɛ jʋʋ dɩpatɛ gaa naŋ na, lʋm kʋma gaa wʋ a kili na a yela ɩ. 5Wʋrʋ wɩɛ dɩmaŋ wʋ cha kili bɩŋsɛ nkuonasala na jiŋinara. 6Gʋ Yesu na ɩ sɛ wʋ jiŋ gʋ wʋ kili duo dɩmaŋ taŋgɩlɛ na, wʋ tasɛ ɩ sɛ, <<Nyaa aja sɛ nyaa yu alaŋfiya?>>
7Sɛ lʋmtɛ wʋŋ lɩsɛ ɩ nʋɔ sɛ, <<Kpaŋjuo, ma tana wʋŋ wʋ a chɔna maŋ na maa jʋʋ dɩpatɛ gaa naŋ gʋ baa sarɛ lɩŋ ŋii naŋ na a. Gʋ maa chɩdɩsɛ maa jʋʋ na, sɛ wʋrʋ a chɩŋkpɩɛ maŋ.>>
8Sɛ Yesu tawɩ ɩ sɛ, <<Kʋlʋ, mʋ n kalaŋ na nyaa pala.>> 9Gabʋanaŋ sɛ wʋ yu lʋm chʋɔ, sɛ wʋ mʋ wʋ kalaŋ sɛ wʋ palɛ.
Wɩɩ gaa ŋina tibi na yɩɛ Fɩɛsɛ wɩɩ bɛ.
10Dɩmʋŋ dʋɔ Yudatina bɩnɩɛ baa tawɩ baalɛ wʋŋ Yesu chɔ ɩ na sɛ, <<Ŋɩ yɩɛ Fɩɛsɛ wɩɩ bɛ. Mbara ŋii n fa gbɩɛ sɛ nya n sɩlɛ n kalaŋ ŋ.>>
11Ama wʋ lɩsɛ ba nʋɔ sɛ,<<Baalɛ wʋŋ wʋ chɔ maŋ na n tawɩ maŋ sɛ mʋ n kalaŋ na nyaa pala.>>
12Dɩmʋŋ dʋɔ ba tasɛ ɩ sɛ, <<Mmʋɔ n nyina baalɛ wina wʋŋ wʋ tawɩ nyaŋ sɛ mʋ n kalaŋ na nyaa pala?>>
13Baalɛ wʋŋ Yesu chɔ ɩ na, wʋ ba jiŋ wʋŋ wʋ chɔ ɩ ɩ, akala takɩɛ jama baa ba wɩɛ dɩmaŋ na dʋɔ, Yesu lɩɩ laŋ yela wʋrʋ n na ɩ.
14Wʋrʋgbɩɛ na, Yesu na ɩ Ɩsʋɔ tʋm danɛ naŋ sɛ wʋ tawɩ ɩ sɛ,<<Kɩɛ nya yu alaŋfiya, yela dɩsʋbʋ yɩɛ, ganaŋkʋ ŋii ŋɩ kii ŋina n baa kɔŋ n dʋɔ.>> 15Sɛ baalɛ wʋŋ lɩɩ dɩmaŋ ga tawɩ Yudatina bɩnɩɛ baa sɛ Yesu n nyina wʋŋ wʋ chɔ maŋ.
16Lɩɩna gʋ Yesu a yɩɛ dɩmʋŋ wɩɛ ŋina Fɩɛsɛ wɩɩ na dʋɔ, Yudatina bɩnɩɛ baa nyala ɩ. 17Sɛ Yesu tawɩ ba sɛ, <<Majuo a yɩɛ wʋ dɩtʋm saŋa kʋma gaa tala jaŋ, maŋ gba maa yɩɛ dɩtʋm.>> 18Ŋina dʋɔ sɛ Yudatina bɩnɩɛ baa mʋ dɩsɛ chɩbɛ baa ja gbɩɛ gaa baa mʋna dʋɔ kʋ ɩ. Naa gʋ wʋ warɩɛ Fɩɛsɛ wɩɩ na nyiŋeŋ dʋɔ ɔ, ama wʋ a yagɛ Ɩsʋɔ wʋ tɩŋtɩŋ wʋ juo yela wʋ a yɩɛ wʋ wʋsɛ takɩɛ wʋ na Ɩsʋɔ n nyina kʋrʋkʋrʋ.
Bu wʋŋ yikuo
19Sɛ Yesu lɩsɛ ba nʋɔ sɛ, <<Maa tawɩ sɛ n nyii na dieli sɛ Bu wʋŋ baa dɩlɛ yɩɛ bʋrʋ wʋ pam dʋɔ ɔ. Ŋii wʋ na Wʋjuo a yɩɛ na nyiŋeŋ sɛ wʋ a dɩlɛ yɩɛ, akala takɩɛ bʋrʋkʋma gaa Juo wʋŋ a yɩɛ na, gaa sɛ Bu wʋŋ gba a yɩɛ. 20Akala takɩɛ Juo wʋŋ a ja Bu wʋŋ wɩɛ, sɛ wʋ kalaa ɩ bʋrʋkʋma gaa wʋ a yɩɛ. Gasiŋteŋ, wʋ a kalaa ɩ abʋrɩ ajanɩɛ kii ŋina ganaŋkʋ aja yɩɛ amɩɛ doba. 21Akala takɩɛ ganaŋkʋ Juo wʋŋ a feŋsi sɩra sɛ wʋ a fa ba nkpa na, dɩmʋŋ sɛ Bu wʋŋ gba a mʋ nkpa wʋ a fa wʋŋ wʋ a jawʋ na. 22Juo wʋŋ baa di wʋrʋ wɩɛ ɛ, ama wʋ mʋ wɩɛ di kpiniŋ dʋ Bu wʋŋ pamɩɛ naŋ, 23na wʋkʋma a mʋ obuo fa Bu wʋŋ takɩɛ ganaŋkʋ baa mʋ obuo baa fa Juo wʋŋ na. Wʋkʋma wʋŋ wʋ aa mʋ obuo fa Bu wʋŋ na, wʋ aa mʋ obuo wʋ a Juo wʋŋ wʋ kpiri ɩ na a.>>
24Sɛ Yesu tawɩ sɛ, <<Maa tawɩ sɛ n nyii na dieli sɛ wʋkʋma wʋŋ wʋ nyii ma wɩɛ, sɛ wʋ lɩɛ wʋŋ wʋ kpiri maŋ di na, wɩɛna nkpa ŋii ŋɩ taŋ gɩtɛ, sɛ baa fu ɩ dɩpʋɛ ɛ. Wʋ lɩɩ sɩŋ naŋ kɔŋ nkpa naŋ. 25Maa tawɩ sɛ n nyii na dieli sɛ, saŋa garɛ a kɔnɛ sɛ gaa taŋ kɔnɛ, gʋ sɩra aja nyii Ɩsʋɔ Bu wʋŋ lofu, baa ba nyii na aja yu nkpa. 26Akala takɩɛ ganaŋkʋ Juo wʋŋ wɩɛna nkpa wʋ tɩŋtɩŋ wʋ tɩba na, dɩmʋŋ sɛ wʋ fa Bu wʋŋ gba nkpa wʋ tɩŋtɩŋ wʋ tɩba. 27Sɛ wʋ fa ɩ yikuo sɛ wʋ n fu dɩpʋɛ, akala takɩɛ wʋ yɩɛ Wʋkpa Bu bɛ.>>
28Sɛ wʋ ju dʋɔ tawɩ sɛ, <<N baa yela na ŋina a yɩɛ amɩɛ doba, akala takɩɛ saŋa garɛ a kɔnɛ gʋ baa ba wɩɛ bʋɔsɛ naŋ na aja nyii wʋ lofu 29na baa lɩɩ ba bʋɔsɛ naŋ. Baa ba yɩɛ dɩbam na aja feŋ kɔŋ nkpa naŋ, sɛ baa ba yɩɛ dɩsʋbʋ na aja feŋ na baa fu ba dɩpʋɛ.>>
Yesu wʋsɛ dʋɔ seriya
30Ma tɩŋtɩŋ maa dɩlɛ yɩɛ bʋrʋ ma pam dʋɔ ɔ. Maa di wɩɛ ganaŋkʋ Ɩsʋɔ tawɩ maŋ na bɛ. Sɛ ma wɩɛ di duwei ŋɩ gbɩɛ dʋɔ akala takɩɛ maa ja sɛ maa yɩɛ ma tɩŋtɩŋ ma jawʋ ʋ, ama wʋŋ wʋ kpiri maŋ na jawʋ.
31Sɛ Yesu ju dʋɔ tawɩ sɛ, <<Sɛ ma di ma tɩŋtɩŋ ma wʋsɛ dʋɔ seriya na, ma seriya gaa ba yɩɛ gasiŋteŋ ŋ. 32Wʋrʋ wɩɛ wʋ a di ma wʋsɛ dʋɔ seriya, sɛ ma jiŋ gʋ ma wʋsɛ dʋɔ seriya gaa wʋ a di na yɩɛ gasiŋteŋ.>>
33Sɛ Yesu ju dʋɔ tawɩ sɛ, <<Amɩɛ tɩŋtɩŋ ɩ kpiri gabʋɔsɛ ju Yohane Ɩsʋɔ Sɔrɛ wʋŋ jaŋ, sɛ wʋ di seriya gaa ga yɩɛ gasiŋteŋ. 34Maŋ bɩrɛ, maa lɩɛ wʋkpa seriya maa dʋ ʋ, ama ma tawɩ ŋɛ bɛ na ɩ yu mɔlɔgɩ. 35Yohane cha wʋ kɩɛna bɛ takɩɛ fitila gaa gaa tʋ sɛ gaa ŋmaŋi na, sɛ amɩɛ bɩrɛ, amɩɛ asadi wʋ ŋmaŋi ŋii tɩba chonii.>>
36Sɛ Yesu tawɩ sɛ, <<Maŋ bɩrɛ, ma wɩɛna seriya gaa ga wɩɛ yuŋ kii Yohane teri. Akala takɩɛ dɩtʋm gaa Majuo mʋ fa maŋ sɛ ma n yɩɛ na sɛ maa yɩɛ, sɛ ŋii di seriya gʋ Juo wʋŋ n kpiri maŋ. 37Sɛ Juo wʋŋ wʋ kpiri maŋ na gba di ma wʋsɛ dʋɔ seriya. Ɩŋ nyii ta wʋ lofu yaa ɩŋ na ta wʋ wʋsɛ duluŋ ŋ, 38yaa wʋ wɩɛ wʋ chaɩ amɩɛ tɩba, akala takɩɛ ɩŋ lɩɛ wʋŋ wʋ kpiri na di i. 39Ɩ chɩdɩsɛ kpalɩɛna Ɩsʋɔ Sabɩɛwɩɛ ŋii na dieli, akala takɩɛ ɩ fa nfɩɛrɛ sɛ ŋɩ tɩba sɛ ɩ yu nkpa ŋii ŋɩ taŋ gɩtɛ. Ɩsʋɔ Sabɩɛwɩɛ ŋina a di ma wʋsɛ dʋɔ seriya bɛ. 40Ama ɩ pɩɛ ma jaŋ kɔnɛ, na ɩ yu nkpa.>>
41Sɛ Yesu ti tawɩ sɛ, <<Maa ja kalɩɛwʋ lɩɩ wʋkpa jaŋ ŋ, 42ama ma jiŋ amɩɛ. Sɛ ma jiŋ gʋ ɩ tana jawʋ fa Ɩsʋɔ amɩɛ agela naŋ ŋ. 43Ma kɔŋ Majuo yɩrɛ naŋ sɛ ɩŋ lɩɛ maŋ dʋ ʋ. Ama sɛ wʋrʋ kɔŋ wʋ tɩŋtɩŋ wʋ yɩrɛ naŋ na, ɩɩ lɩɛ ɩ dʋ. 44Sɩnɛ sɛ ɩ dɩlɛ lɩɛ di gʋ ɩ lɩɛ kalɩɛwʋ lɩɩ amɩɛ dɔŋa jaŋ dʋ na, ama ɩŋ chɩdɩsɛ na ɩ yu kalɩɛwʋ lɩɩ Ɩsʋɔ wʋdʋŋdʋlʋŋ wʋŋ jaŋ?>>
45Sɛ Yesu ju dʋɔ tawɩ sɛ, <<Ama n baa fa nfɩɛrɛ sɛ maa pʋɩ amɩɛ Juo wʋŋ asanaŋ. Wʋŋ wʋ a pʋɩ amɩɛ na n nyina Mosesi wʋŋ ɩ mʋ amɩɛ tamaa jaga wʋ dʋɔ na. 46Sɛ ɩ lɩɛ Mosesi di na, ɩ lɩɛ maŋ di, akala takɩɛ wʋ sabɩɛ ma wʋsɛ dʋɔ wɩɛ bɛ. 47Ama gʋ ɩŋ lɩɛ ŋii wʋ sabɩɛ di na, sɩnɛ sɛ ɩ yɩɛ na ɩ lɩɛ ŋii ma tawɩ na di?>>
Айни замон обунашуда:
Yohane 5: CLL
Лаҳзаҳои махсус
Нусха
Муқоиса
Паҳн кунед
Мехоҳед, ки ҷойгир кардаҳои худро дар ҳамаи дастгоҳҳоятон захира кунед? Бақайдгирӣ ё воридшавӣ
2025 Ghana Institute of Linguistics Literacy amp Bible Translation