Yohane 1
1
Wɩɛ ŋii naŋ sɛ nkpa wɩɛ
1Lɩɩ dɩfaratɩŋ na, Wɩɛ ŋii cha ŋɩ wɩɛ. Wɩɛ ŋii na Ɩsʋɔ n cha ba wɩɛna, sɛ Wɩɛ ŋii n nyina Ɩsʋɔ. 2Wʋ cha wʋ wɩɛ Ɩsʋɔ jaŋ lɩɩ dɩfaratɩŋ.
3Wɩɛ ŋii dʋɔ sɛ Ɩsʋɔ pala na lɔ bʋrʋkʋma. Bʋrʋ garɛ taŋ sɛ naa Wɩɛ ŋii dʋɔ sɛ wʋ pala na lɔ ga a. 4Wʋ tɩba sɛ nkpa wɩɛ, sɛ dɩmʋŋ nkpa ŋina n nyina ŋmaŋi fa bakpa. 5Ŋmaŋi ŋii ŋmaŋi giteŋteŋbiri naŋ, ama giteŋteŋbiri ŋii n dɩlɛ di ŋɩ dʋɔ ɔ.
6Baalɛ wʋrʋ kɔnɛ wʋŋ Ɩsʋɔ kpiri ɩ, baa yagɛ ɩ sɛ Yohane. 7Wʋŋ n kɔŋ gaa di dɩmʋŋ ŋmaŋi ŋina dʋɔ seriya ganaŋkʋ bakpa kpiniŋ a pala na wʋ dʋɔ lɩɛ di. 8Naa Yohane tɩŋtɩŋ n nyina ŋmaŋi ŋii i, ama wʋŋ bɩrɛ wʋ kɔŋ gaa di ŋmaŋi ŋii dʋɔ seriya bɛ. 9Gasiŋteŋ ŋmaŋi gaa ga ŋmaŋi fa bakpa kpiniŋ na a kɔŋ dulunya naŋ.
10Wɩɛ ŋii fɩla ŋɩ wɩɛ Dulunya gaa naŋ. Ŋɩ wɩɛ tɩba sɛ Ɩsʋɔ pala na wʋ dʋɔ lɔ dulunya bɩrɛ, ama dulunya n jiŋ ɩ ɩ. 11Wʋ kɔŋ wʋ tɩŋtɩŋ wʋ dɩɛnaŋtina jaŋ, ama wʋ tɩŋtɩŋ wʋ dɩɛnaŋtina n lɩɛ ɩ ɩ. 12Ama baa ba lɩɛ ɩ, na baa ba lɩɛ wʋ yɩrɛ di na, wʋ fa ba gbɩɛ sɛ ba n yɩɛ Ɩsʋɔ bie, 13bie baa naa wʋkpa n lʋrʋ ba a, yaa wʋkpa jawʋ dʋɔ ɔ yaa baalɛ jawʋ dʋɔ ɔ, ama Ɩsʋɔ n yɩɛ ba wʋ bie.
14Wɩɛ ŋii gaa yɩɛ wʋkpa, sɛ wʋ gaa cha daa tɩba. Dɩ na wʋ jilima, jilima gaa n nyina Bu Wʋdʋŋdʋlʋŋ wʋŋ wʋ lɩɩ Juo wʋŋ jaŋ, sɛ wɩɩ dʋɔ na gasiŋteŋ su wʋ tɩba.
15Yohane di wʋ wʋsɛ dʋɔ seriya. Wʋ kuusi na doŋ tawɩ sɛ, <<Wina n nyina wʋŋ ma cha tawɩ wʋ wʋsɛ dʋɔ wɩɛ sɛ wʋŋ wʋ a kɔŋ ma wʋrʋgbɩɛ na kii maŋ, akala takɩɛ wʋ fɩla wʋ wɩɛ pɔɩ sɛ ba lʋrʋ maŋ.>> 16Lɩɩna Ɩsʋɔ wɩɩ dʋɔ gaa ga su wʋ tɩba na dʋɔ, dɩ yu kusee dɔŋa dʋɔ. 17Ɩsʋɔ pala na Mosesi dʋɔ mʋ mbara ŋii fa daa. Ama Ɩsʋɔ wɩɩ dʋɔ na gasiŋteŋ bɩrɛ, ŋɩ pala na Yesu Kirisito dʋɔ bɛ kɔŋ. 18Wʋrʋ n naa ta Ɩsʋɔ ʋ, ama Bu Wʋdʋŋdʋlʋŋ wʋŋ wʋ wɩɛ Juo wʋŋ jaŋ na, n lɩsɛ ɩ kalaa.
Yohane Ɩsʋɔ Sɔrɛ tawɩ Ɩsʋɔ wɩɛ
Matiyo 3:1-12; Maakɩ 1:1-8; Luka 3:1-18
19Ŋina n nyina Yohane seriya gaa wʋ di gʋ Yudatina bɩnɩɛ baa ba wɩɛ Yerusalem kpiri Ɩsʋɔ Seina na Lewitina#1:19 Lewitina aaŋ chɔna Ɩsʋɔ seina. Yohane jaŋ gaa tasɛ ɩ sɛ wʋŋ n nyina Mmʋɔ? 20Sɛ Yohane n pɩɛ nʋɔ lɩsɛ ɛ, ama wʋ tawɩ gasiŋteŋ fa ba sɛ, <<Naa maŋ n nyina Kirisito wʋŋ ŋ.>>
21Sɛ ba tasɛ ɩ sɛ, <<Dɩmʋŋ bɩrɛ, nyaŋ n nyina Mmʋɔ? Nyaŋ n nyina Ɩsʋɔ Ɔja Eliya yaa?>>Sɛ wʋ tawɩ sɛ,<<Naa maŋ ŋ.>>Sɛ ba ti bɔrɛ tasɛ ɩ sɛ,<<Nyaŋ n nyina Ɩsʋɔ Ɔja?>>Sɛ wʋ ti lɩsɛ nʋɔ sɛ,<<Aye.>>
22Dɩtamtɩŋ na, ba ti tasɛ ɩ sɛ, <<Nyaŋ n nyina Mmʋɔ? Lɩsɛ daa nʋɔ na dɩɩ yu wɩɛ mʋ fa baa ba kpiri daa na. Be sɛ nyaa tawɩ lɩɩ n wʋsɛ dʋɔ?>>
23Sɛ Yohane mʋ Ɩsʋɔ ɔja Yisaya wɩɛ ŋii wʋ sabɩɛ si na lɩsɛ ba nʋɔ sɛ, <<Maŋ n nyina lofu gaa gaa kuusi ifuli dʋɔ sɛ n chirigi gbɩɛ fa Kpaŋjuo.>>#Yis 40:3.
24Sɛ Farasitina baa ba kpiri ba Yohane jaŋ na, 25tasɛ ɩ sɛ, <<Sɛ nya ba yɩɛ Kirisito yaa Eliya yaa Ɩsʋɔ Ɔja na, be n yɩɛ sɛ nyaa sɔ bakpa Ɩsʋɔ sɔ?>>
26Sɛ Yohane tawɩ sɛ, <<Maŋ bɩrɛ, ma mʋ lɩŋ sɔ bakpa Ɩsʋɔ sɔ. Ama wʋrʋ sɩmɩɛɩ amɩɛ tɩba yela ɩ ba jaŋi ɩ ɩ. 27Wʋŋ n nyina wʋŋ wʋ a kɔŋ ma wʋrʋgbɩɛ, ma n daga na maa buoli wʋ asibita ganyasɛ ɛ.>>
28Wɩɛ ŋina kpiniŋ tibi Betaniya dɩɛ gaa ga wɩɛ Yodaŋ buo gatɩɛsa, dieli gaa Yohane a sɔ bakpa Ɩsʋɔ sɔ na.
Yesu Ɩsʋɔ Fiebu wʋŋ
29Gʋ tɩɛna na, Yohane na gʋ Yesu a kɔŋ wʋ jaŋ sɛ wʋ tawɩ sɛ, <<Kɩɛ, Ɩsʋɔ Fiebu wʋŋ wʋ a lɩsɛ dulunya dɩsʋbʋ na. 30Wina sɛ ma fɩla tawɩ wʋ wʋsɛ dʋɔ wɩɛ sɛ, <Baalɛ wʋŋ wʋ a kɔŋ ma wʋrʋgbɩɛ na kii maŋ, akala takɩɛ wʋ fɩla wʋ wɩɛ pɔɩ sɛ ba lʋrʋ maŋ.> 31Ma tɩŋtɩŋ ma ba jiŋ ɩ ɩ, ama kpɩnɩdɩ dʋɔ sɛ ma kɔŋ gaa sɔ bakpa Ɩsʋɔ sɔ na nyina ganaŋkʋ aja lɩsɛ ɩ kalaa Isiraitina.>>
32Sɛ Yohane di dɩmʋŋ seriya gana sɛ, <<Ma na gʋ Ɩsʋɔ Feliŋ tibi lɩɩ Ɩsʋɔ adugbe gaa cha wʋ dʋɔ takɩɛ juori gakuo. 33Nafʋɔ ma tɩŋtɩŋ ma aa jiŋ ɩ ɩ, ama wʋŋ wʋ kpiri maŋ sɛ ma n gaa sɔ bakpa Ɩsʋɔ sɔ na n tawɩ maŋ sɛ, <Baalɛ wʋŋ nya na gʋ Ɩsʋɔ Feliŋ tibi gaa cha wʋ dʋɔ na, wʋŋ aaŋ ja wʋ a mʋ Ɩsʋɔ Feliŋ sɔ bakpa Ɩsʋɔ sɔ.> 34Ma na, sɛ ma di seriya sɛ wina n nyina Ɩsʋɔ Bu wʋŋ.>>
Yesu kpalɛnara asanaŋtina baa
35Gʋ tɩɛna na, Yohane ti wʋ wɩɛ dɩmaŋ wʋ na wʋ kpalɛnara bala. 36Gʋ wʋ na Yesu wʋ a lam na, sɛ wʋ tawɩ sɛ, <<N kɩɛ, Ɩsʋɔ Fiebu wʋŋ.>>
37Gʋ wʋ kpalɛnara bala baa nyii gʋ wʋ tawɩ ŋina na, ba kpaŋ Yesu. 38Gʋ Yesu biliŋi kɩɛ sɛ wʋ na gʋ ba kpamɩna ɩ na, wʋ tasɛ ba sɛ, <<Be sɛ ɩ jawʋ?>>Sɛ ba tasɛ ɩ sɛ, <<Rabbi, [Ga tie n nyina sɛ wʋkalaasa] le sɛ n chaɩ?>>
39Sɛ Yesu lɩsɛ ba nʋɔ sɛ, <<N kɔŋ na ɩɩ na.>>Dɩmʋŋ dʋɔ ba kpaŋ ɩ ga na diele gaa wʋ chaɩ na. Sɛ ba cha wʋ jaŋ wɩɩ gana. Aja yɩɛ bʋyanɔ karafɩɛ anara.
40Andurusi wʋŋ wʋ yɩɛ Simoŋ Petero wʋ nabu na, cha wʋ yɩɛ bakpa bala baa ba tɩba wʋrʋ nyii wɩɛ ŋii Yohane tawɩ, sɛ ba kpaŋ Yesu. 41Bʋrʋ gaa Andurusi chɩŋkpɩɛ yɩɛ na n nyina sɛ wʋ ju ga ja wʋ ŋmɩɛtɩ Simoŋ sɛ wʋ tawɩ ɩ sɛ, <<Dɩ na Mesaya wʋŋ,>> [wʋŋ n nyina Kirisito wʋŋ.] 42Sɛ wʋ mʋ Simoŋ ju Yesu jaŋ. Sɛ Yesu kɩɛ ɩ sɛ wʋ tawɩ ɩ sɛ, <<Nyaŋ n nyina Simoŋ, Yohane bu baalɛ jaŋ wʋŋ. Baa yagɛ nyaŋ sɛ Kefasi>>#1:42 Kefasi yɩɛ Aramiki dɩtawɩ bɛ [a kalaa sɛ Petero.#1:42 Giriki dɩtawɩ naŋ na, Petero ga tie akala sɛ dɩkpa]
Yesu yagɛ Filipo na Nataneli
43Gʋ tɩɛna na, Yesu yɩɛ wʋ n nfɩɛrɛ sɛ wʋ a ju Galaliya tibi dʋɔ. Gʋ wʋ na Filipo na, wʋ tawɩ ɩ sɛ, <<Kpaŋ maŋ.>>
44Filipo lɩɩ Betisayida dɩɛ naŋ bɛ. Dɩmaŋ sɛ Andurusi na Petero gba ba lɩɩ. 45Filipo na Nataneli sɛ wʋ tawɩ ɩ sɛ, <<Dɩ na wʋŋ Mosesi sabɩɛ wʋ wʋsɛ dʋɔ wɩɛ dʋ mbara ŋii naŋ na, sɛ Ɩsʋɔ bajana gba ti sabɩɛ wʋ wʋsɛ dʋɔ wɩɛ. Wʋŋ n nyina Yesu, Yosefu bu wʋŋ wʋ lɩɩ Nasarati.>>
46Sɛ Nataneli tasɛ ɩ sɛ, <<Bʋrʋ gabam a dɩlɛ lɩɩ Nasarati kɔŋ?>>Sɛ Filipo tawɩ ɩ sɛ, <<kɔŋ gaa kɩɛ.>>
47Gʋ Yesu na Nataneli a kɔnɛ na, wʋ tawɩ wɩɛ lɩɩ wʋ dʋɔ sɛ, <<Gasiŋteŋ Isirai wʋkpa mɩnaŋ, wʋ tɩba sɛ akarɩɛ taŋ ŋ.>>
48Nataneli tasɛ Yesu sɛ,<<Sɩnɛ sɛ nya yɩɛ jiŋ maŋ?>> Sɛ Yesu lɩsɛ ɩ nʋɔ sɛ, <<Gʋ n saŋ n wɩɛ figi daŋ gaa tie pɔɩ na Filipo a gaa yagɛ nyaŋ na, sɛ ma na nyaŋ.>>
49Sɛ Nataneli tawɩ Yesu sɛ, <<Wʋkalaasa, nyaŋ n nyina Ɩsʋɔ Bu, nyaŋ n nyina Isiraitina Juo wʋŋ.>>
50Sɛ Yesu tawɩ ɩ sɛ, <<Nya lɩɛ di akala takɩɛ ma tawɩ nyaŋ sɛ ma na nyaŋ figi daŋ gaa tie. Sɛ nyaa na abʋrɩ ajanɩɛ kii dɩmʋŋ.>> 51Sɛ Yesu ti tawɩ ɩ sɛ, <<Maa tawɩ sɛ n nyii na dieli sɛ ɩɩ na gʋ Ɩsʋɔ adugbe fulu, yela Ɩsʋɔ gabʋɔsɛ a jiŋ baa tibi Wʋkpa Bu wʋŋ dʋɔ.>>
Айни замон обунашуда:
Yohane 1: CLL
Лаҳзаҳои махсус
Нусха
Муқоиса
Паҳн кунед
Мехоҳед, ки ҷойгир кардаҳои худро дар ҳамаи дастгоҳҳоятон захира кунед? Бақайдгирӣ ё воридшавӣ
2025 Ghana Institute of Linguistics Literacy amp Bible Translation