Yokaana 8
8
Omukali eyakwatiirwe omu busiiyani
1Awo buli omwei nʼairayo e waamwe, baitu oYesu nʼayaba oku lusozi lwa misaale gya oliva. 2Ekiro ekyaireku omu kibbambya, nʼairayo omu mbuga za iramyo abantu gyebaamwekumbaaniiryeku era yeena nʼaikala okubeegesya. 3Awo abeegesya bʼamateeka nʼaBafarisaayo ni baleeta omukali eyakwatiirwe omu busiiyani. Ni bamwemeerya omu maiso gʼabantu, 4ni bakoba oYesu bati, “Mwegesya, omukali oni akwatiirwe omu kikolwa kya busiiyani. 5Omu mateeka oMusa yatulagiire okukubba omukali nkʼoyo amabbaale. Ati we okukoba ki?”
6Baamubwirye kini nkʼakatego, leke bafune akatooro ka kumujunaana.
Baitu oYesu nʼainama nʼawandiikisya ekyala okwitakali.
7Nibaamubuuliriirye omuno, nʼainunuka nʼabakoba ati, “Buli omwei oku nywe atakolangaku kibbi niye yeekeere okumukasukiirya eibbaale.” 8Nʼairamu okwinama nʼawandiika okwitakali. 9Niyabazire kini, abaawuliire ni bazwawo omwei nʼomwei. Abasaiza abakulu nibo beekereire okuzwawo, okwica oYesu niyasigaire yenkai, nʼomukali nayemereire awo. 10Nʼairamu okwinunuka nʼabuulya omukali ati, “Abakukujunaana bali ayi? Ndoowo gonze omwei asigairewo okukusaara omusango?” 11Omukali nʼairamu ati, “Mukama, ndoowo gonze omwei.”
OYesu nʼamukoba ati, “Njeena tinkugukusaara, ati yaba baitu otaliiramu kukola kibbi.”#8:11 Ebiwandiiko ebya irai era ebikwesigibwa amwei nʼabajuurwa aba irai tibalina lunyiriri luni.
Okuwakanisya obujuurwa bwa Yesu
12OYesu niyairemu okubaza egiri abantu, yakobere ati, “Ninje kyengeezi kya nsi. Akansengereirye yeena yeena tiyatambuure mu kiiruma, baitu akwiza kubba nʼekyengeezi ekya bwomi.”
13ABafarisaayo ni bamuwakanisya nibakukoba bati, “Okwebazaku wenkai. Kikumanyisya nti obujuurwa bwamu tibwikire.”
14OYesu nʼairamu ati, “Gonze nineebazaku njenkai obujuurwa bwange bubba bwikire kubba mmaite gyenazwire era mmaite gyenkwaba. Baitu nywe e gyenazwire nʼe gyenkwaba timumaiteyo. 15Musala emisango nimukusigikira ku lulengo lwa bantu buntu, baitu nje ndoowo gwenkusaara musango. 16Nimba ngusaare ekyemba ninsaarewo kibba kiikire, kubba tindi njenkai. Mba amwei nʼoIte wange eyantumire. 17Omu mateeka gaanywe agenyenere, kyawandiikiibwe kiti, ‘Obujuurwa bwʼabantu ababiri bubba bwikire.’ 18Ninje neweeryaku obujuurwa nʼomujuurwa wange owondi niye Ite wange eyantumire.”
19Awo ni bamubuulya bati, “OIteewo ali ayi?”
OYesu nʼairamu ati, “Timummaite nʼoIte wange timumumaite. Nimwakuli mummaite nʼoIte wange mwakuli mumumaite.” 20Bini oYesu yabibazire nakusomeserya omu mbuga za iramyo ogwʼawo webaweerayo ebitwo baitu ndoowo yamukwaite kubba obwire bwamwe bwali butakaikire.
Okugulucaguluca oYesu
21OYesu nʼairamu okubakoba ati, “Nkwiza okwaba leke muntoolye. Mukwiza okufeera omu bibbi byanywe era egyenkwaba ni mutasobola kwizayo.”
22Ekigambo kini kyaleeteire abeebemberi bʼaBayudaaya okwebuulya bati, “Akwaba kwezinda? Eyo yaakubba niyo nsonga lwaki akubaza ati, ‘Egyenkwaba ni mutasobola kwizayo?’”
23Baitu niyeeyongera okubakoba ati, “Nywe muli bʼani omu nsi baitu nje nazwire aiguru. Muli ba nsi gini; nje tindi wa nsi gini. 24Mbakobere mukwiza okufeera omu bibbi byanywe; nimutaikirize nti ninje oyo gwenkubazaku, mananu mukwiza okufeera omu bibbi byanywe.”
25ABafarisaayo ni bamubuulya bati, “Niiwe naani?”
OYesu nʼabairamu ati, “Ndi oyo okuliga omu kwekeera gwenyizire mbakobera 26Ndina ebyakubaza bingi omu kubasaara omusango. Eyantumire mwesigwa era ebyenawuliire okuliga egyali nibyo nkukobera abantu.”
27Baitu tibeetejerye nti yaali akubakobera bikukwata kwIte waamwe 28Olwʼekyo oYesu nʼakoba ati, “Nimulikaanika oMwana wa Muntu aiguru oku musaalaba, nimwo mulimanya nti niye nje era nti ndoowo kyenkola oku bwange baitu mbaza ebyombe oIte wange byeyanyegeserye. 29Eyantumire ali nanje, tandekanga kubba njenkai, kubba bulinca nkola ebimusemeerya.” 30Abantu baingi abaawuliire oYesu nakubaza bini ni bamwikiriza.
Abaana ba Ibbulaimu
31OYesu nʼakoba ati aBayudaaya abaali bamwikiriize, “Nimwakwata ebyenkubeegesya, mananu mwabba beegesebwa bange. 32Obwo mwamanya amananu nʼamananu gaabafoola aba idembe.”
33Bo ni bamwiramu bati, “Iswe tuli baizukulu ba Ibbulaimu era titubbangaku bairu ba muntu gonze omwei. Oyinza otyai okukoba nambu twafooka aba idembe?”
34OYesu nʼairamu ati, “Muleke mbakobere amananu; buli muntu akola ekibbi abba mwiru wa kibbi. 35Omwiru tabba mwikali wa lubeerera omweka baitu oMwana abba wa mweka emirembe nʼemirembe. 36Olwʼekyo oMwana niyabafoola aba idembe, mananu mwabba ba idembe. 37Mmaite nka nimuli abaizukulu ba Ibbulaimu, baitute niinywe abakwendya okunyita. Ekyo kiri kityo kubba omu mitima gyanywe timwikiriza kigambo kyange. 38Nkubakobera ebyo oIte wange byeyandangire baitu nywe mukola ebyo oite waanywe byabakoba.”
39Nibairamu bati, “OIbbulaimu niye aize waiswe.”
OYesu nʼakoba ati, “Nimwakuli baizukulu ba Ibbulaimu, mwakuli mukweyakalya nkʼoIbbulaimu niyeeyakalyanga. 40Baitu ati nywe mukwendya kunyita ate nga ninje muntu abakobeire amananu agenaiyire e wa Kanca. Ebintu ebiri nkʼekyo oIbbulaimu tiyabikoore. 41Nywe mukukola nkʼoite waanywe.”
Ni bairamu bati, “Tituli baana ba nzai, oKanca omwenyenere niye Ite waiswe yenkai” 42OYesu nʼabakoba ati, “OKanca niyaakuli nali Ite waanywe, mwakunyenderye kubba ninaizire egyemuli, nazwire waamwe. Tinaizire kubwange, oKanca niye yantumire. 43Lwaki mutakweteja byenkubaza? Kubba timukwendya kumpuliirya. 44Muli baana ba ite waanywe nʼoite waanywe oyo niye oSetaani era mukwendya okwikiirya ebyo byayendya. Yaali mwiti okuligira kimwei omu kwekeera, nga takugumira ku mananu era omu ye ndoomu mananu. Nabba akubeyega akolesya orulimi lwamwe, kubba mubeyegi era niye kitina kya bubeyegi. 45Baitu nje nimbakobera amananu timunyikiriza! 46Waliwo omu nywe asobola okulanga ekibbi oku nje? Ninaabba mbakobera amananu, lwaki mutanyikiriza? 47Buli abba owa Kanca, awura oKanca byakukoba. Nywe timubiwura kubba timuli ba Kanca.”
OYesu akubaza oku bukulu bwamwe
48Awo abeebemberi bʼaBayudaaya ni bamwiramu bati, “Titwikire nitukobere nti oli Musamaliya era nti oliku omuzumu?”
49OYesu nʼakoba ati, “Tindiku muzumu baitu ntaamu oIte wange ekitiinisya nywete nimutakimuntaamu. 50Tinkwetoorya kitiinisya, waliwo akukintoorya era oyo niye mulamuli. 51Kambakobere amananu; buli aikiriza ekigambo kyange talifa.”
52Niyabazire kini ni bakoba bati, “Ati twetejeirye kimwei nti oliku omuzumu! OIbbulaimu yafiire nʼabalangi boona ni bafa, atite okoba otyai nambu buli awura ekigambo kyamu talifa? 53We oli mukulu okukira aize waiswe oIbbulaimu? OIbbulaimu yafiire nʼabalangi boona ni bafa, we okwerowooza kubba naani?”
54OYesu nʼairamu ati, “Nineetumbya njenkai, okwetumbya kwange kubba kumburamu. OIte wange gwemukukoba nti niye Kanca waanywe niye antumbya. 55Gonze nimwabba mutamumaite, nje mmumaite. Ninaakukobere nti timmumaite naakuli mubeyegi nka nywe, baitu mmumaite era nkwata ekigambo kyamwe. 56Aize waanywe oIbbulaimu yasemereirwe olwa kulindiirya okwiza kwange, yakuboine era nʼasemeerwa.”
57Abantu ni bamukoba bati, “Ocaali na kwica myaka ataanu egya bukulu, ale nʼokoba nambu waboine oIbbulaimu?”
58OYesu nʼairamu ati, “Kambakobere amananu; oIbbulaimu yaali acaali kubbaawo, nje nindiwo!” 59Niyabazire kini, ni bakoma amabbaale okumukubba baitu ni yeebbisa nʼanyweruka okuliga omu mbuga za iramyo.
Айни замон обунашуда:
Yokaana 8: RUULI-NYALA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in