Bikolwa 10
10
OKoluneeriyo akwetesya oPeetero
1Omu Sisaariya mwalimu omusaiza eyayetebwanga Koluneeriyo, osencuriyo#10:1 OsencuriyoYaabbanga muduumiri wʼabasirikale kikumi omwiye ryʼaBarooma. wa kibinja omwiye ryʼaBarooma, ekyayetebwanga ekyʼaBayitale, 2ye amwei nʼaba mweka yaamwe boona boona baali bajwawuki ba diini era baatangamu oKanca ekitiinisya. Yabagabiranga aBayudaaya abaseege oku bintu byamwe, era yasabanga oKanca buli kiro. 3Ekiro kimwei oku saawa nkʼomwendai eza igolo nʼabonekerwa, nʼabona kusai omalaika wa Kanca nakwiza e gyali era nakumweta ati, “Koluneeriyo!”
4OKoluneeriyo nʼamuwanga amaiso natiinire nʼamukoba ati, “Mukama wange, okunkoba ki?”
Omalaika nʼamwiramu ati, “Okusaba kwamu nʼokugabira abaseege oKanca abisiimire. 5Ale tuma ati abasaiza e Yoopa basyome omusaiza ayetebwa oSimooni Peetero, 6abba e wa Simooni omusaayiirya wa byanzo, aikala ogwa ku nyanja.”
7OMalaika wa Kanca eyamukobere ebyo niyayabire, oKoluneeriyo nʼayeta babiri oku baweereza baamwe nʼomusirikale omunyadiini era nga niye omwei okwabo abaamulindanga. 8Nʼabakobera ebibbairewo, nʼabatuma e Yoopa.
Okwolesebwa kwa Peetero
9Ekiro ekyaireku, nibacaali omu nzira, ampi nʼo Yoopa, oPeetero nʼatemba aiguru#10:9 Enkanga za manyumba gʼaBayudaaya zaabbanga zitereeri omuntu nakusobola okubbaayo. oku nyumba, oku saawa nkʼomukaaga eza mwiyangwe okusaba oKanca. 10Enzala nʼemuluma nʼayendya ekyakulya. Nibaali bacaakiteekaniza, nʼabonekerwa. 11Nʼabona eiguru niryasaime era ekintu ekikwisana eisuuka ni kisirimuka, nikikwatiibwe oku nsonda zaakyo einai. 12Omu kyo nimulimu buli ngeri ya bisolo, ebyekurundya nʼebinyonyi. 13Eiraka ni rimukoba riti, “Peetero, imuka; ita olye.”
14OPeetero nʼairamu ati, “Bbe Mukama wange, tindyangaku kintu kibbi oba ekitali kiikiiri.” 15Eiraka ni rimukoba omulundi ogwakabiri, “OKanca kyeyayeerye, tokyetanga kya muzizo 16Ekyo kyairiibwemu emirundi esatu, amangu ago ekintu ekyo ni kiiribwayo omwiguru.”
17OPeetero niyaali naceebuulya amakulu gʼekyo kyaboine, abasaiza abaatumiibwe oKoluneeriyo, baali bamaare okumanya enyumba ya Simooni gyeri era nibeemereire oku mulyango. 18Ni babuulya bati, “Ani niwo wali omugenyi ayetebwa oSimooni Peetero?”
19OPeetero niyaali nacaalowooza okwekyo kyaboine, oMwoyo Akwera nʼamukoba ati, “Abasaiza basatu bakukuswagana. 20Imuka leka kugulucaguluca sirimuka oyabe na bo mangu kubba ninje mbatumire.” 21Awo oPeetero nʼayaba egiri abasaiza nʼabakoba ati, “Niye nje gwemukuswagana. Nsonga ki ebaleetere?”
22Ni bamwiramu bati, “Osencuriyo oKoluneeriyo, niye atutumire. Omusaiza oyo ata mwikiiri, ataamu oKanca ekitiinisya, era aBayudaaya boona boona bamutaamu ekitiinisya. Omalaika akwera yamukobere akwete, oyabe e waamwe, awure byokukoba.” 23Awo oPeetero nʼabaingirya omu nyumba era nʼabasaba baraarewo.
OPeetero omu nyumba ya Koluneeriyo
Nibwakeire emambya, oPeetero nʼayaba na bo nʼabamwei oku baikiriza abaali e Yoopa, ni bamusendekeeryaku. 24Ekiro ekyaireku nʼaika e Sisaariya. OKoluneeriyo yaali abalindiriirye, era nakumbainie abaluganda lwamwe nʼabanywi ba mukago.
25OPeetero niyaali akwingira, oKoluneeriyo nʼamwitirana, nʼakubba amajwi ampi nʼamagulu gaamwe, nʼamuramya. 26Baitu oPeetero nʼamwimula nakukoba ati, “Imuka, njeena ndi muntu buntu.”
27OPeetero nʼaingira nakubaza na ye, nʼayaja abantu baingi nibakumbaine. 28Nʼabakoba ati, “Nywe abenyenere mumaite kusai nka nikiri ekya muzizo oMuyudaaya okuyimbya nʼomunyamanga gonze okumucaara. Baitu oKanca andangire nti tinsaine kweta muntu gonze omwei nti ti mwikiiri oba nti mubbi. 29Ale niwaanyetere, ni nyiza. Ati nkukubuulya, ‘Waanyeteire ki?’”
30OKoluneeriyo nʼairamu ati, “Ebiro binai ebyakaire, omu bwire nka buni, oku saawa mwendai eza igolo, naali mu nyumba yange ninkusaba. Amangu ago, ni mbona omuntu eyaali nazwaire engoye ezikuseryaserya, nayemereire omu maiso gange. 31Nʼankoba ati, ‘Koluneeriyo, oKanca awuliire okusaba kwamu, era asiimire okugaba kwamu. 32Ale tuma e Yoopa, oyetesye oSimooni ayetebwa Peetero, abba e wa Simooni omusaayiirya wa byanzo abba oku nyanja.’ 33Ale nikwo okukutumira, era okoore kusai okwiza. Ale ati buni tukumbaine ani omu maiso ga Kanca, okuwura oMukama byona byakulagiire okubaza.”
34Awo oPeetero nʼatandika okubaza, nʼakoba ati, “Ati buni neetejeirye kimwei nti kyʼamananu oKanca tasoroora mu bantu, 35baitu ngʼomu buli iyanga aikiriza buli muntu amutaamu ekitiinisya, nʼakola ebya bwikiiri.”
36“Mumaite obukwenda oKanca bweyawaire aBaisirairi, nakubuulira Amawuro Agasai agaleeta emirembe, okwakala omu Yesu Kurisito, oMukama wa byona. 37Mumaite ebintu ebikulu ebyabbairewo omu Buyudaaya bwona, ebyatandikiire e Galiraaya, oYokaana namaare okubuulira obukwenda bwamwe obwa kubatizibwa. 38Mumaite oKanca niyaizwirye oYesu oMunazaaleesi oMwoyo Akwera amwei nʼamaani. OYesu oyo, kubba oKanca yaali na ye, yatambulanga woona woona nakukola ebisai amwei nʼokutamba boona boona abaajoogebwanga oSitaani. 39Era iswe abakwenda tuli bajuurwa bʼebyo byona byeyakoore omu nsi yʼaBayudaaya nʼomu Yerusaalemu. Baamwitire nibakumubamba oku musaalaba. 40Baitu oKanca nʼamuyimboola ekiro ekyakasatu, era nʼamusobolesya okubonwa, 41ti mu bantu boona, okutoolaku omwiswe, oKanca beyaali amaare okukomya okubba abajuurwa baamwe, abaaliire na ye era ni tunywa na ye namaare okuyimbooka. 42Yatulagiire okubuulira abantu era nʼokukigumya nti niye oyo oKanca gweyakomerye okubba omulamuli wʼaboomi nʼabafu. 43Abalangi boona bamubazaku, nibakukoba bati, Amwikiriza, asaasirwa ebibbi byamwe okwakala omwibara ryamwe.”
Abanyamanga bakufuna oMwoyo Akwera
44OPeetero niyaali acaabaza ebyo, oMwoyo Akwera nʼaiza oku boona abaali bakumuwuliirya. 45Abaikiriza aBayudaaya abaizire nʼoPeetero okuliga e Yoopa, ni batangaaliira nibaaboine nga nʼabanyamanga oKanca abawaire ekitwo ekya Mwoyo Akwera, 46kubba baabawuliire nibakubaza endimi ezaali zitamanyiibwe, era nibakuwaisya oKanca. OPeetero nʼakoba ati, 47“Abantu bani bafunire oMwoyo Akwera nka iswe ni twamufunire, waliwo omuntu asobola okubagaana okubatizibwa nʼamaizi?” 48Awo nʼalagira babatizibwe omwibara rya Yesu Kurisito. Era ni bamusaba agira abbaaku na bo ebiro bidooli.
Айни замон обунашуда:
Bikolwa 10: RUULI-NYALA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in