Mata 6
6
Sərək ata vəla səkən a həji titikw aagi
1«Huni mbəla ŋkwaɓ, abə ɗal səkən ma təwah ata nja həji aagi, aska aagi a sən zlən kuni. Aka səku ya, huni kaalima wəda zlən kuni ma ndza ara Vava kuni ma ndza a wəzəm a wəzlaf səku. 2Tiɗa ndə hwa kavəlanə kwa səkən veme ana ala, hwa ɗiw a ɗalə aska həji aagi tsa nja ata hwa a ghal dagal kwa andza ndə aa kaɗalə ana həji ŋgwashŋgwash aagi səku, ndə aa kaɗalə a jak ta tarha aagi abə a ŋge a zal təf aagi, aska həji aagi a həmən zləm ta sa. Sa kazlap, a ɗa ŋter, aŋta, wəda zlən ta ara təmta tiw. 3Ama andza hwa kavəlanə səkən ana ala dawna hahər kwa, ra gula kwa a ɗiw a sən səkən ndə, ra zəm kwa a kavələs. 4Azha səkən kwa ndə hwa vələ watsa vələ abə ɓah, Bizlaf, Cihw kwa ma kagəra səkən kwa ndə hwa kaɗalə abə ɓah, a aŋtərahu wəda zlən kwa.
Sərək ma ndza ata tarha
5Andza huni katarha, huni ɗiw a ɗalə andza həji ŋgwashŋgwash aagi səku. Aa may tarha ata lagar a ŋge a jak ta tarha aagi abə ama zal təf aagi, aska manahayak a gərata tiwtiw. Sa kazlapahuni, a ɗa ŋter, həji watsa aagi, wəda zlən ta ara təmta tiw. 6Ama ataa aŋkwa, andza hwa kaɗiw a tarha, nda kwa a jak kwa, tsak majak kwa ka, azha hwa tar Cihw ma ɓah tə ndə hwa ŋkula a gəra, azha Cihw ma kagəra səkən ndə hwa kaɗalə abə ɓah, a aŋtərahu wəda zlən kwa.
7Tiɗa ndə, huni katarha, huni ɗiw a zhin ata zlap ma ŋtaɗ zhin dagala andza ndə, mada takun aagi aa kaɗaləs. Ama aŋta, deŋ ta ya, Bizlaf a zlimatana tarha ta ara ndə zlap ta a ɗa jiŋ. 8Huni ɗiw a ji, a baslata səku, ara ndə a ɗa, Bizlaf Cihw kuni, a kasən səkən ndə huni kamay a ɗiwi ara tiɗa, huni awli kwagwa a ɗiwzə.»
Tarha «Vana cini»
(Luk 11.2-4)
9«Aŋgha tsakwa abə huni atarha:
Vana cini ma ndza a wəzəm a wəzlaf,
kwa vaye masən ka, ndə zləm kwa a ɗa ghwaɗeɗe,
10Bay kwa mandaha,
may kwa maɗal
ata hayak andza ma ndza a wəzəm a wəzlaf.
11Vəlani, səkən zəm akacihwa teete abə ni.
12Pəlani mpət cini ka, andza ndə, ni tə yəm, ni pəlatana mpət ataa həji ma gəyani ma aagi ka yəm.
13Hwa ɗiw a mbaslani ka, a nda ata gəy ma səku, ama, pərehani bəza ara gəy ma aagi.
14Ara ndə a ɗa, andza huni tapəlatana mpət ataa həji ma gəyahuni ma aagi aka, Cihw kuni ma ndza a wəzəm a wəzlaf a apəlahuni mpət kuni ka yəm. 15Ama andza, huni kula a pəlatana mpət a həji ndiɓi aagi səku, Cihw kuni a kaapəlahuni mpət ata ma ndə, huni gəy aka yəm aka səku.»
Sərək ma ndza ata dalyam
16«Tiɗa ndə, huni kaɗal dalyam ya, huni ɗiw a ghuɗek andza ndə aa kaɗalə ana həji ŋgwashŋgwash aagi səku. Mbaɗ aa mbaɗ wənək ta bəza, aska a ghalatana a həji aagi ci, aa kaɗal dalyam. Sa zlapahuni, a ɗa ŋter, ataa aŋta, wəda zlən ta ara təmta tiw. 17Ama ataa aŋkwa, ndə hwa kaɗal dalyam, bəz mali ka a wənək kwa azha hwa ban nja kwa bəza, 18aska həji aagi a ŋkula sənahu, hwa kaɗal dalyam. Ama, ŋtaɗ tə ana Cihw ma ndza a ɗi, ma ɓah tə, ma kagəra səkən ma ɓah tə, sha ana ma kaaŋtərahu wəda zlən kwa.»
Sərək ma ndza ata dala abə ŋtsəɓ ma ndza a wəzlaf
(Luk 12.33-34)
19«Huni ɗiw a dzam səkən ŋtsəɓ ma ndza ata hayak, ndə tepi abə gezhi aa ɓam bəza səku, ata la ndə ŋhil aagi kaɗa gwar a heɗes. 20Aɓa azha, huni dzamɓa səkən ŋtsəɓ ma ndza a wəzəm a wəzlaf, ndə kwa tepi, kwa gezhi, aa gwar a ɓamə akas, ndə kwa ŋhil a kagwar a heɗes. 21Ara ndə a ɗa ya, la ndə səkən ŋtsəɓ kwa a tsutsa ya, ꞌunəf kwa a ndza a tsutsa yəm.»
Ndza ma ndza a weɗ la
(Luk 11.34-36)
22«Azha, nja ana ma ɗa weɗ la ataa zlikusəm: Andza nja kwa təwah, zlikusəm kwa tiwtiw a ɓal. 23Ama andza, nja kwa aagi aa tawələf ta, zlikusəm kwa tiwtiw a ndza a ləvaŋ. Mbara azha, weɗ la ma ndza a hwa, dəgnak ci, zlikusəm kwa a bəw tə leviŋleviŋ a guɗaŋ.»
Bizlaf aka səku dala
(Luk 16.13)
24Azha: «Kwa ala ma kaɗa kula, a ɗalanə zlən a həji aagi gbak akas: Aka səku a ŋkalzə mampər, azha a ɗiwɓa magbak tə ma ndaha a baraf, aka səku, a ŋkalzə ala ma ndaha a baraf, azha, a ɗiwɓa ala mampər. Huni kula a ɗa, həji ma may a ɗalanə zlən a Bizlaf aagi, zhana huni kaɗiw dala səku.»
Ɗal ŋzliŋ ara Bizlaf
(Luk 12.22-31)
25«Dawna sha abə sa kazlapahuni, ŋzliŋ a ɗiw a dzahuni aska səkən zəm abə səkən ta sa ndə zlikusəm kuni a kamayə səku, aka səku dawna rəkuts ndə huni katsə ata zlikusəm kunis. Ama, təwah miɗ dəy aha səkən zəm, azha təwah zlikusəm dəy aha rəkuts, aka wəra? 26Huni taŋzə vigin ma kambir a wəzlaf aagi: aa kazləgas, səkən ata wəvə a dzamha a za cebem akas, ama, Cihw kuni ma ndza a wəzəm a wəzlaf ma kazəmatana səkən! Təwah kuni a kaɗa dəy aha vigin aagi aka wəra? 27Azha, a taba kuni, ala ma kaɗa kula abə deŋ tə, a kərəɗzə wan tə kwa vah ŋtaɗ ata manahayak watsə vaya? 28Huni naana aska rəkuts ara veme? Huni taŋzə abə aa kadəfha ana fafan mpi, a ŋge a la aagi: Aa kaɗal zlən kwa akas, kwa aa kagas rəkuts akas. 29Ama azha, sa kazlapahuni, kwa Suleymanu, abə ŋtsəɓ tə tiwtiw, talima a tsaɓa rəkuts ma ŋtan andza fafan kwa ŋtaguleŋ akas. 30Andza Bizlaf a katsanə rəkuts ikwa a ŋkəsaf ma ndza akacihwa, aka, a kwaf aa baz aka a kwahu, azha a kaaɗalahuni dəy aha təmta aka wəra? Həji ndə ɗal awa a ɗa ɓəraŋ ara təmta aagi! 31Azha ŋzliŋ a dzahuni a huni azlap: “Həji azəm veme? Həji asa veme? Rəkuts ndə həji kaatsə ata zlikusəm veme?” huniy səku. 32Həji ma da takun aagi ana ma kagas shiŋ səkən watsa aagi, aa kaŋtəɓələs. Ama, Cihw kuni ma ndza a wəzəm a wəzlaf a kasən səkən ndə huni kamayə. 33Huni gas la ndza bay Bizlaf kwagwa abə landza ma dəlili ndə a kaɗiwi, azha Bizlaf a avəlahuni səkən ma ɓinha aagi tiwtiw. 34Ŋzliŋ a ɗiw a dzahuni ata vah ma ndza a kwaf səku: Vah ma ndza a kwaf ma kaaɗalɓa ha tə. Kala vah teete abə səkən ndə a kaɗalə.»
Айни замон обунашуда:
Mata 6: GOU
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in