Luk 23
23
Pailed Abịp Yisọs Mbịme
1Ndin afịd esob emaedakka eda enyʌñ eben Yisọs ekaa iso Pailed. 2Ndin ammọ emaetọọñọ adidot anye uyio, ete, “Awo ami asịn nsọk ke idịd ñnyịn, ate mme awo ekuukpe taks enọọ Sisa, anyʌñ abo ke imọ ido Krais, adidem.”
3Ke ntoro Pailed amaabịp Yisọs ate, “Afo ado adidem mme Yuu?”
Yisọs amaabọọrọ, “Ado afo atañ ntoro.”
4Ndin Pailed amaadọkkọ mme ikpọ aku ye atu awo ate, “Ami ñkịtte ndudue nnọ awo ami.”
5Ado ammọ emaeyiire ete, “Ukpeebñkpọ amọ a-adat mfịna adi ke afịd Yudia. Anye aketọọñọ ke Kalili ndin idahami adiwuọ umi.”
6Pailed akekop ami amaabịp me anye ato Kalili. 7Ke ini anye akediọọñọke ke Yisọs akeba ke idak ukara Herọd anye amaanọ Yisọs esọk Herọd ke Yeruselem sia Herọd akeba do ke ini ado.
8Herọd akekịt Yisọs, esịd amaanem anye sia ke ataa anyan ini anye amaanie udọñ adisoobo ye Yisọs. Se anye akekop abaña Yisọs amaanam anye anie idodanyen ke imọ iyaikịt naña anye anam utịppeñkpọ. 9Herọd amaakwak Yisọs ye uwak mbuume ado anye ikibọọrọke anye. 10Mme ñkpoon aku ye mme andikpeeb mbed e-ekebaaha do emaesọọñọ etañ ikọ ndoduyio ebaña Yisọs. 11Herọd ye mbon ekọñ amọ emaesaha, enyʌñ edọọñ anye ndọk. Ke emaekesịn anye uyaiya afọñ ubọọñ emaetịmme enọ anye esọk Pailed. 12Tọọñọ ke usen ado Pailed ye Herọd e-ekesidusuarake emaekappa edoñño ufan.
13Pailed amaakoot mme ñkpoon aku ye mme adaukara ye afịd awo abok ke itie keed 14anyʌñ abo ammọ ate, “Ndufo ekedat awo ami ensọk miin nte awo a-asịnne nsọk nọ mme awo esịn ntịme ke abio. Ami mmeduuñọ anye ke iso ndufo ado ñkịtte ndudue a-anamma ndufo etañ ikọ edian anye. 15Herọd ikiinyʌññọ ikịt ndudue ke anye, ntak ado akenam anye atịmme anọ anye isọk ñnyịn. Nte ndufo ekịtte, anye idueghe ñkpọ a-adotto ufen ñkpa. 16Ke ntoro, ami ñyaamia anye ñnyʌñ nsaana anye ñyaak.” 17Nte mbed adooho, akena anye afeen ndudue awo keed enyʌñ esio anye ke ñkpakọb ke ini Usọrọ Nsaña Mboiyo.
18Ado afịd atu awo emaebọñ ke uyio keed ete, “Iben awo ami ikaa! Isio Barabas inọ ñnyịn.” 19(Ekesịn Barabas ke ñkpakọb sia anye amaasịn nsọk ke abio anyʌñ awot awo.)
20Ke adiyem adisaana Yisọs ñyaak, Pailed amaamaana akpeiye ammọ. 21Ado ammọ emaebọñ ke akpọsọñ uyio, “Ekọñ anye ke krọs, ekọñ anye ke krọs!”
22Pailed amaakaa iso atañ ye ammọ ayọhọ akañ ita anyʌñ abịp ate, “Ntak-a? Nsoo ido ndudue amọ? Ami ñkịtte ntak ekpenọọhọ anye ufen ñkpa. Ke ntoro, ami ñyaanam enọ anye ufen ndin esaana anye eyaak.”
23Ado ammọ emaebọñ ke akpọsọñ uyio, eyiire ete ekọñ anye ke krọs ndin uyio ammọ amaasọñ ada. 24Ke ntoro Pailed amaabiide adinam uduak ammọ. 25Anye amaasio awo e-ekekọppọ ke ntak usịn nsọk ke abio ye uwodawo, anye a-ammọ ekebooho yak esio, ado ayaak Yisọs anọ ammọ nọ ekenam ye anye naña ammọ eyem.
Ekọñ Yisọs ke Krọs
26Naña mbon ekọñ ekebenne anye edakka, ammọ emaemʌm Saimọn awo Siriin ke usʌñ isañ a-anye akekaaha enyʌñ enam anye abiom krọs akeene Yisọs. 27Umiañ awo emaekeene anye, ke atu ami ibaan emaesịne e-ekefʌhọke enyʌñ etuaha ebaña anye. 28Yisọs amaakanna iso ase ammọ anyʌñ abo ammọ, “Nditọ ibaan Yeruselem, ikiitua imbaña miin ado itua ibaña idem ndufo ye nditọ ndufo. 29Sia ini asʌk adi a-ndufo ediibo, ‘Afọfọn anọ mme ada, mme idịb i-imiimanna ayịn akpa, ye mme eba a-ayịn imiiwọppọ akpa.’ 30Ndin,
“ ‘Ammọ eyaebo mme ekamba abod, “Iduọññọ itọọñ ñnyịn!”
Enyʌñ ebo ntək abod, “Ifuuk ñnyịn!” ’
31 Sia adieke mme awo enamma mme ñkpọ ami idaha e-eto adooho ndisi, nsoo idiitịppe ini a-mfañ asaatta?”
32Emaedat Yisọs ye mme ndiọi awo iba ekaa adiwot. 33Ke ini ammọ emaekesịm itie e-ekekoodo Ñkpọkpọrọ, ammọ emaekọñ anye ke krọs ye ndiọi awo iba ado, keed ke ubọk nnasia amọ, keed ke ubọk ufiin. 34Yisọs amaabo, “Ete feen nọ ammọ, sia ammọ idiọọñọke se ammọ enam.”#23:34 Usʌk mme ñkaan ikpañwed inieghe udịmikọ ami. Ke emaekesịn ukañ, ammọ emaedeeme afọñ amọ.
35Mbon awo emaeda ese, mme adaukara emaenyʌñ enọ anye inua ete, “Anye amaanyaaña mbon mfen, yak anye anyaaña idem amọ, akpedo anye ado Krais, Andimek Abasi.”
36Mbon ekọñ ñko emaenyʌñ enọ anye inua. Ammọ emaenọ anye fineka ete anwọñ, 37enyʌñ ebo ete, “Akpedo afo ado adidem mme Yuu, nyaaña idem mfo ise.”
38Emaewet ñwed edian ke anyọñ itie a-anye akekọñọke, ete:
Ami ado Adidem mme Yuu.
39Keed ke atu mme anam idiọọkñkpọ a-akekọñọke ye anye, amaasọñ anye anyen ate: “Idooho afo ado Krais? Nyaaña idem mfo nyʌñ inyaaña ñnyịn!”
40Ado anam idiọọk anye ako amaasua anọ anye ate, “Nte afo ubaaha Abasi, sia afo abọọhọ ukem ufen? 41Inọ ñnyịn ufen a-adotto ye idiọọkñkpọ ñnyịn. Ado ete ami idueghe ke usʌñ ndomokeed.”
42Ndin anye amaabo, “Yisọs, ntoiyo miin ke umaudʌk abioubọọñ mfo.”
43Yisọs amaabọọrọ anye ate, “Ami udọkkọ fiin akpanikọ, mfịn ami afo adiiba ye ami ke paradais.”
Ñkpa Yisọs
44Akedo ke ñkpọ nte ñkanika duob mme iba uweemeayio, ekịm amaafʌk afịd isọñ tutu asịm ñkanika ita uweemeayio, 45sia utịn amaatre adiyamma. Ndin afọñ ikpeghe tembịd amaasakka iba. 46Yisọs amaabọñ ke akpọsọñ uyio ate, “Ete, mmeyaak ukpọñ mmi usịn fiin ke ubọk.” Ke anye amaaketañ ikọ ado ama, anye amaaduọk akpatre ibifịk amọ.
47Ke sentudiọn akekịtte se ikitịppe, amaatooro Abasi anyʌñ abo, “Ke akpanikọ awo ami akedo adinen awo.” 48Afịd awo se ikida ise se ikitịppe emaemia ubọk ke esịd edaaña enyọñọ. 49Ado afịd awo se ikidiọọñọ Yisọs ye mme ibaan e-ekekeeneke anye tọọñọ ke Kalili ekeda nsan-nsan ese mme ñkpọ ami.
Ebuuk Yisọs
50Ndin amaaba awo keed a-akekereke Yosef, awo Akwa Esob akọnsịn, a-akedooho eti ye adinen awo, 51i-idiikinyịmmeke edioomo ye adinam ammọ. Anye aketo abio Yudia ke ukañ Arimatia; anye ke idem amọ akenyʌñ atie abet adidi abioubọọñ Abasi. 52Anye amaakaa abịne Pailed akebeeñe ate inọ akpo Yisọs. 53Ndin anye amaakọññọ akpo Yisọs, awañ ke afọn linen anyʌñ anịm ke udi e-eketịppeke ke itiad a-adooho kpaanam awo ndomokeed ikibʌhọke. 54Akedo Usen Mbeeñeidem, sia Sabad akedo edem usen.
55Ibaan e-ekekeeneke Yisọs tọọñọ ke Kalili emaekeene Yosef ekekịt udi ye naña ekenịm akpo amọ. 56Ndin ammọ emaenyọñ ufọk enyʌñ ekebeeñe idem enam pefium se ediiben ikifiọññọ akpo Yisọs. Ado ammọ emaeduọk adudu ke usen Sabad nte mbed aketemmeke.
Айни замон обунашуда:
Luk 23: OICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Biblica® Open Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Biblica® Open Ibibio Contemporary Bible™
Copyright © 2020, 2025 by Biblica, Inc.
Biblica ye idiọọñọ esịn ke itie utom United States Patent and Trademark Office enọ Biblica, Inc. Enam ke emaekebọ Unyịmme.
Biblica and the Biblica logo are trademarks registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.