Yọọn 5
5
Ukọk Udọñọ ke Ñkpọdiọhọ Mmọọñ
1Etək ini amaakeboiyo, Yisọs amaakaa Yeruselem ke ntak usọrọ mme Yuu. 2Ke Yeruselem ñkpọdiọhọ mmọọñ keed amaaba a-akpereke Inuaatob Edọñ, e-ekekoodo ke usem Aramaik Betesda#5:2 Usʌk mme ikpañwed ewet Bedsata; usʌk ñko ewet Betsaida, a-mme abai ition ekenyʌññọ edudak ekanna anye ekʌk. 3Mi ke ataa uwak mbon ñkpọnnam ekesidunam, mme nnan, mbʌñọ ye mme akpaubeñ. 4Ke ini ke ini, enyere Abọọñ amaasidi adibəkko mmọọñ ami. Ndin awo keed akeedodo a-aketooho adʌk mmọọñ ami, emaebəkko ntom, amaasibọ nsọñidem akpekọm se udọñọ ikidọñ anye. 5Amaaba awo keed do a-akedọñọke isua edịb mme duob mme itiaita. 6Ke ini Yisọs akekịtte anye naña ana do anyʌñ adiọọñọ ke anye amaabọ ufen ado akpeene, amaabịp anye ate, “Nte afo ameyem idem usọñ?”
7Awo udọñọ ado amaabọọrọ ate, “Ete, ami nnieghe awo se imben isịn ke ñkpọdiọhọ mmọọñ ami ke emaebəkko mmọọñ. Ke ini ami ndomoke ukeme adidʌk, awo mfen ambebem miin adʌk.”
8Yisọs amaabo anye, “Dakka da! Ben mbịd mfo nyʌñ saña.” 9Inikeed-inikeed, idem amaasọñ awo ado; anye amaanyʌñ aben mbịd amọ asaña.
Ñkpọ ami aketịppeke ke usen Sabad. 10Ndin mme Yuu emaebo awo e-ekekọkkọ udọñọ ete, “mfịn ado Sabad, mbed ukpan fiin adiben mbịd mfo nsaña.”
11Ado anye amaabọọrọ ate, “Awo a-akenamma idem ansọñ akembo, ‘Ben mbịd mfo nyʌñ saña.’ ”
12Ndin ammọ emaebịp anye, “Anie awo ido awo a-akubooho yak aben mbịd mfo asaña?”
13Awo e-ekekọkkọ udọñọ ikinieghe ifiọk ndomokeed mme anye akedo anie awo, sia Yisọs amaadʌk atu mme awo e-ekebaaha do asop.
14Akema Yisọs amaadikịt anye ke tembịd anyʌñ abo anye, “Sese, idem amaana usọñ. Kuunam idiọọkñkpọ aba, mmiidooho ntoro ñkpọ adiọọhọ akan ado akeme aditịppe unọọ fiin.” 15Awo ami amaanyọñ anyʌñ akedọkkọ mbọọñ Yuu ke Yisọs akenam nọ idem imọ asọñ.
Adudu a-Ayịn Anieghe
16Sia Yisọs akenañña mme ñkpọ ami ke Sabad, mbọọñ mme Yuu emaetọọñọ adikọbọ anye. 17Ke adifak idem Yisọs amaabo ammọ ate, “Ete mmi anam utom afịd-afịd ini, ami ñko nsʌk nnam utom.” 18Ntak ami akenam nọ mme Yuu enekke eyem adiwot anye sia anye ikiyʌkkọke ke adibiat Sabad ikpọọñ, ado amaakoot Abasi Ete amọ, anịm idem amọ ñka-ñka ye Abasi.
19Yisọs amaabọọrọ ate, “Ke ataa akpanikọ ami ntañ inọọ ndufo, Ayịn ikemeke inam ñkpọ ndomokeed ke idem amọ; ukweeñe se anye akeme inam ado se anye akịt naña Ete amọ anam, sia ñkpọ keed akeedodo e-Ete anamma, kpa ado ke Ayịn anam. 20Sia Ete a-ama Ayịn, anyʌñ awọt anye afịd ñkpọ se anye anam ke idem amọ, ayaanyʌñ awọt anye kpa mme ñkpọ se ikpoon ikan mbon ami, mme utom e-ediikpa ndufo idem. 21Ke ntom, kpa naña Ete anam mme akpañkpa eset anyʌñ anọ ammọ uwem, kpa ntoro ke Ayịn anọ awo akeedodo anye amekke uwem. 22Ke akanna ado, Ete ibiereke ikpe awo ndomokeed. Ado anye akappa afịd ubiideikpe anọ Ayịn amọ, 23nọ afịd awo ekpono Ayịn naña ammọ ekpono Ete. Awo akeedodo i-idiikponoke Ayịn ikponoke Ete a-akedọññọ anye.
24 “Ke ataa akpanikọ ami ntañ inọ ndufo, awo keed akeedodo a-akpañña utọñ anọ ikọ mmi anyʌñ anịm awo a-akendọññọ ke akpanikọ a-anie nsi-nsi uwem ndin awo idiinyʌññọ ibiom anye ikpe, ado anye awuọ ke ñkpa adʌk uwem. 25Ke ataa akpanikọ ami ntañ inọ ndufo, ini asʌk adi, ke aditʌm ntañ a-adedi, a-mme akpañkpa ediikop uyio Ayịn Abasi ndin afịd awo se ikop uyio amọ eyaedu uwem. 26Sia kpa naña Ete anie uwem ke idem amọ, anye ñko a-anọ Ayịn ukeme adinie uwem ke idem amọ. 27Ñko anye a-anọ ayịn adudu adibiide ikpe, sia anye ado Ayịn Awo.
28 “Ikiiyak ñkpọ ami ikpa ndufo idem, sia ini asʌk adi a-afịd mme akpañkpa ediikop uyio amọ ke udi ammọ, 29enyʌñ ewuọñọ edi. Mbon e-ekenaññake nti ñkpọ eyaeset edu uwem, ado mbon e-ekenaññake ndiọiñkpọ eyaeset edʌk ke ubiomikpe. 30Ami ñkemeke adinam ñkpọ ndomokeed ke idem mmi; ami mbiere ikpe ñkeene se ami ñkop, ndin ubiideikpe mmi ado unen, sia ami ñyemme adinem idem mmi esịd ado ñyem adinem anye a-akendọññọ miin esịd.
Mme Ikọ Ntiense a-Abañake Yisọs
31 “Adieke ami ntieghe ntiense mbaña idem mmi, ntiense mmi idooho akpanikọ. 32Ado aba awo mfen a-anọọhọ ikọ ntiense ambaña miin, ndin ami mmediọọñọ ke ntiense amọ ado akpanikọ.
33 “Ndufo emaedọñ mme isʌñutom ebịne Yọọn ndin anye amaatie ntiense anọ akpanikọ. 34Idooho nte ke ami mmenyịmme ntiense awo, ado ntañ ami nọ ndufo ebọ adinyaaña. 35Yọọn akedo utuenikañ a-akesakka anyʌñ anọ unwana, ndin ndufo emaemek edikop inem ikañ a-anye akenọọhọ ke etək ini.
36 “Ado ntiense mmi a-akpon akan ake Yọọn. Sia kpa mme utom e-Ete annọọhọ miin abo nnam mma, a-adooho ammọ ke nsʌk nnam, edo ntiense a-awọttọ ke Ete akendọñ miin. 37Ñko, Ete a-akendọññọ miin amaatie ntiense ke idem amọ ambaña miin. Akenaanam ndufo ikoppo uyio amọ, inyʌññọ ikịt naña anye aba, 38ikọ amọ inyʌññọ idʌñ ke esịd ndufo, sia ndufo inịmme anye a-anye akedọññọ ke akpanikọ. 39Ndufo etọọtʌm ekpeep ikọ Abasi, sia ndufo ekere ke iminie nsi-nsi uwem ito ikọ Abasi. Kpa mme ikọ Abasi ami etie ntiense embaña miin, 40kpayeado ndufo emesịn adimbịne miin nọ enie uwem.
41 “Ami ñyemme itooro nto awo, 42ado ami mmidiọọñọ ndufo. Ami mmediọọñọ ke ndufo inieghe ima Abasi ke esịd ndufo. 43Ami mmedi ke anyịñ Ete mmi, ado ndufo iñnyịmmeke miin. Ado awo mfen akpedi ke anyịñ idem amọ, ndufo eyaenyịmme anye ado. 44Ndufo ekeme die edinịm ke akpanikọ ke ini ndufo edubọiyọke itooro eto emọ-emọ, ado inamma ñkpọ edibọ itooro a-atooho ukweeñe-ukweeñe Abasi?
45 “Ado ikiikere ke ami ñyaidot ndufo uyio ke iso Ete. Andidot ndufo uyio ado Moses, adooho awo a-ndufo edotto anyen. 46Adieke ndufo ekenịmme Moses ke akpanikọ, ekpaennịm miin ñko ke akpanikọ sia anye amaawet ambaña miin. 47Ado sia ndufo miinịmme se anye akewet ke akpanikọ, ediinam die inịm se ami ntañ?”
Айни замон обунашуда:
Yọọn 5: OICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Biblica® Open Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Biblica® Open Ibibio Contemporary Bible™
Copyright © 2020, 2025 by Biblica, Inc.
Biblica ye idiọọñọ esịn ke itie utom United States Patent and Trademark Office enọ Biblica, Inc. Enam ke emaekebọ Unyịmme.
Biblica and the Biblica logo are trademarks registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.