Yọọn 3
3
Yisọs Akpeep Nikodemọs Ñkpọ
1Amaaba awo Farisi keed a-akekereke Nikodemọs, a-akedooho keed ke atu akwa esob ukara mme Yuu. 2Anye amaadi adisoobo Yisọs akonayio anyʌñ abo anye ate, “Andikpeeb, ñnyịn imidiọọñọ ke afo ado andikpeeb a-atooho Abasi. Sia awo ndomokeed ikpikanna inam mme utịppe idiọọñọ a-afo anamma adieke Abasi imiikpibaaha ye anye.”
3Yisọs amaabọọrọ anye ate, “Ataa akpanikọ ke ami ntañ unọọ fiin, ibọhọke awo atịmme amana ufa, anye idiikanna ikịt abioubọọñ Abasi.”
4Nikodemọs amaabịp anye ate, “Awo akeme die adimaana mmana ke ini anye amaakesọñ? Ke aditʌm ntañ, anye idiikanna itịmme ikidʌk idịb eka amọ ayọhọ akañ iba ikimaana imana!”
5Yisọs amaabọọrọ anye ate, “Ataa akpanikọ ke ami ntañ unọọ fiin, ibọhọke awo amana ato mmọọñ ye Sịbidịd, anye idiikanna idʌk abioubọọñ Abasi. 6Abʌkidem aman abʌkidem, ado Sịbidịd aman sịbidịd. 7Ikpinaaha ukpa fiin#3:7 Ke usem Greek ado uwak idem ke ami adibo, ‘Ana afo amaana amana ufa.’ 8Afịm afịme aka nte anye ama. Afo amekeme adikop uyom amọ, ado ukanna utañ nte anye ato me nte anye aka. Kpa ntoro ke ado ye afịd awo e-emanake eto Sịbidịd.”
9Nikodemọs amaabịp anye ate “Die ke ami akeme aditịppe?”
10Yisọs amaabo anye, “Afo ado andikpeeb ke Isrel, ndin afo udiọọñọke mme ñkpọ ami? 11Ataa akpanikọ ke ami ntañ unọọ fiin, ñnyịn itañ se ñnyịn idiọọñọ, inyʌñ itie ntiense ibaña se ñnyịn ikịt, ado mme awo isʌkkọ inyenyịmme ikọ ntiense ñnyịn. 12Ami mmetañ mme ñkpọ ederimbod unọ fiin ado afo unịmme ke akpanikọ; die ndin ke afo uduunịm ke akpanikọ adieke ami ntañña mme ñkpọ e-ebañake hefịn? 13Kpaanam awo ndomokeed ikaaha hefịn ibọhọke anye a-aketooho hefịn adi, a-adooho Ayịn Awo. 14Kpa naña Moses akebenne udʌkikọd ke anyọñ ke anaan, kpa ntoro ke ana ebenne Ayịn Awo ke anyọñ, 15nọ afịd awo e-enịmme anye ke akpanikọ enie nsi-nsi uwem ke anye.
16“Sia Abasi akeneenekke ama ederimbod asịn anye akenọ ukweeñe Ayịn keed a-anye anieghe nọ awo akeedodo a-anịmme anye ke akpanikọ akuutak ado anie nsi-nsi uwem. 17Sia Abasi ikinọọhọ Ayịn amọ adi ederimbod adibiom ederimbod ikpe, ado nọ adinyaaña ederimbod ato ke anye. 18Awo akeedodo anịmme anye ke akpanikọ, awo idiibiommo anye ikpe, ado awo akeedodo i-imiinịmme anye ke akpanikọ, e-ekap ebobiom anye ikpe, sia ammọ inieghe mbuọdidem ke anyịñ ukweeñe Ayịn keed a-Abasi anieghe. 19Anye ami ado ubiideikpe: Unwana a-adi ederimbod, ado mme awo ema ekịm ekan unwana, sia se ammọ enañña edo ndiọi. 20Afịd awo se inam idiọọkñkpọ esuasua unwana ndin idiidʌkkọ unwana mbaak ediyaara mme idiọọkñkpọ ammọ. 21Ado awo akeedodo aduuho uwem akpanikọ a-adʌk unwana, nọ ekịt anwa-anwa ke se ammọ enam ado ke iso Abasi.”
Yọọn Amaana Atie Ntiense Abaña Yisọs
22Ke ñkpọ ami amaakeboiyo, Yisọs ye mme mbed amọ emaekaiya esịd idʌñ Yudia akeba ye ammọ etək ini anyʌñ aduọk mme awo mmọọñ. 23Yọọn ñko akesʌk aduọk mme awo mmọọñ ke Anọn a-akpereke Salịm, sia mmọọñ amaanekke aba ke udo, ndin mme awo emaesidi do edibọ uduọkmmọọñ. 24Ami aketịppe mbemiso ekesịn Yọọn ke ufọk ñkpakọb. 25Mfaaña amaatọọñọ ke ufọọd usʌk mme mbed Yọọn ye awo Yuu keed ke abaña edu adinam idem asana. 26Ndin ammọ emaebịne Yọọn enyʌñ ekebo anye ate, “Andikpeeb, awo a-akebaaha ye afo ke edem inyañ Yọdan uko, anye a-afo akenọọhọ ikọ ntiense abaña, asʌk aduọk mmọọñ ndin afịd awo ekịppe ebịne anye.”
27Yọọn amaabọọrọ ammọ, “Awo akeme adibọ enọ a-atooho hefịn kpọd. 28Ndufo ke idem ndufo emekeme ido ntiense ke mmaabo, ‘Ami ndooho Krais ado endọọdọñ ebo mbem anye iso ndi.’ 29Anwaanndọ anie ebendọ. Ufan a-aseeghe ñkpọ abaña ebendọ ami atietie anyʌñ akpañ utọñ anọ anye, esịd anyʌñ ayọhọ anye ye idaara ke anye amaakop uyio ebendọ. Inemesịd ado ado ake mmi, ndin idahami esịd mmi ayọhọ ye idaara. 30Ana anye akpon añkan miin; ana nte ami nsesịp.
31“Anye a-atooho anyọñ adi, a-akpon akan afịd awo; anye a-atooho ederimbod anie ederimbod, anyʌñ atañ ikọ nte awo a-atooho ederimbod. Anye a-atooho hefịn ado andikoñ ñkan afịd awo. 32Anye ado ntiense anọ se anye akịt anyʌñ akop, ado awo ndomokeed inịmme ikọ ntiense amọ ke akpanikọ. 33Awo akeedodo a-anịmme ikọ ntiense ami ke akpanikọ asọọñọ anyịmme ke Abasi ado akpanikọ. 34Sia awo se Abasi adọñ, atañ ikọ a-atooho Abasi, sia Abasi anọ Sịbidịd ayọhọ-ayọhọ. 35Ete a-ama Ayịn ndin ayaak afịd ñkpọ asịn anye ke ubọk. 36Awo akeedodo a-anịmme Ayịn ke akpanikọ a-anie nsi-nsi uwem, ado awo keed akeedodo a-asịnne Ayịn idiikịtte uwem, sia iyadesịd Abasi adoro anye ke idem.”
Айни замон обунашуда:
Yọọn 3: OICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Biblica® Open Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Biblica® Open Ibibio Contemporary Bible™
Copyright © 2020, 2025 by Biblica, Inc.
Biblica ye idiọọñọ esịn ke itie utom United States Patent and Trademark Office enọ Biblica, Inc. Enam ke emaekebọ Unyịmme.
Biblica and the Biblica logo are trademarks registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.