Yenesis 8
8
1Ado Abasi amaatoiyo Nua ye afịd mme afai unamikọd ye mme ufene ekebaaha ke ubom ye anye, anyʌñ anam afịm afịme ke ederimbod, ndin mmọọñ amaasuuhọ. 2Idaha ntoro, emaebet mme udem idịm inyañ ibom ye mmọọñ inuaatob mme hefịn, ndin edịm amaatre adidep nto ikpaanyọñ. 3Mmọọñ amaakaa iso asuuhọ ke ederimbod. Ke utịd usen ikie mme aba mme duob mmọọñ amaateek, 4ndin ke ayọhọ usen duob mme itiaba ke ayọhọ afiọñ itiaba, ubom amaadibeghe ke mme ikpọabod Ararad. 5Mmọọñ amaakaa iso asuuhọ tutu ke ayọhọ afiọñ duob. Ndin ke akpa usen ke ayọhọ afiọñ duob emaetọọñọ adikịt mme anyọñ ikpọabod.
6Ke usen aba amaakeboiyo Nua amaabeere ubenafịm a-anye akenamma ke ubom 7anyʌñ asio ekọọñebʌkayob adọñ, anye amaanyʌñ akaiso afuurọ, aka iso atịmme edem tutu mmọọñ asat ke ederimbod. 8Akema anye amaasio ibiom adọñ nọ akese me mmọọñ asat ke iso isọñ. 9Ado ibiom ikikịtte itie se asọrọ, sia mmọọñ amaayọhọ afịd ederimbod. Ke ntoro anye amaatịmme abịne Nua ke ubom. Nua amaasio ubọk anyan amʌm ibiom ado asịn ke ubom. 10Anye amaatie usen itiaba mfen mbemiso anye amaana asio ibiom ke ubom adọñ. 11Ke ini ibiom atịmmeke adibịne anye ke ndubiayio, ibiom amaafịbe nsek mfañ ọlif ke inua! Ndin Nua amaadiọọñọ ke mmọọñ asat ama ke isọñ. 12Anye amaabet usen itiaba mfen ndin atịmme asio ibiom adọñ, ado isañ anye ami, ibiom ikitịmmeke inyọñ ibịne anye aba.
13Ke akpa usen afiọñ ke akpa afiọñ ke ayọhọ isua Nua ikie itiokeed mme keed, mmọọñ amaasat ke ederimbod. Nua ndin amaafʌkkọ ufʌkñkpọ ke ubom anyʌñ akịt ke iso isọñ amaasat. 14Ke usen afiọñ edịb mme itiaba ke ayọhọ afiọñ iba, isọñ amaasat ataa afịd-afịd. 15Ndin Abasi amaabo Nua, 16“Wuọ ke ubom di, afo ye anwaan mfo ye nditọ mfo ideen ye ibaan ammọ. 17Sịññe afịd utọ mme aduuwem ñkpọ e-ebaaha ye afo: Mme inuen, mme unam, ye afịd ñkpọ se inyọọn ke isọñ, nọ ammọ ediitọt ke ederimbod enyʌñ enwịm mfịd, enyʌñ ewak ke ibad.”
18Ndin Nua amaawuọ adi ye nditọ ye anwaan ye ibaan nditọ amọ. 19Afịd unam ye afịd ñkpọ se inyọọn ke isọñ ye afịd inuen, afịd ñkpọ se isaña ke isọñ, emaewuọñọ ke ubom, ke mme aduuk ammọ.
20Ndin Nua amaabọp itie uwa anọ Abọọñ anyʌñ akoono mme unam se isana ye mme inuen se isana anam ufọfọb uwa anọ Abasi. 21Abọọñ amaakop inemufịk uwa ado anyʌñ abo ke esịd amọ ate: “Tutu amama, ami ndiisuuñọke isọñ aba ke ntak ubonawo, akpesʌkado afịd akikere esịd awo adooho idiọọk tọọñọ ke uyịn ammọ. Ñko tutu amama ami ndiisoboke afịd mme aduuwem ñkpọ aba, naña ami ñkenam.
22“Adaña nte ederimbod abaaha,
ini utọ ye ini idọk,
ndedeñ ye ufiob,
ndaayio ye ukwọedịm,
uweemeayio ye akonayio
idiitreke.”
Айни замон обунашуда:
Yenesis 8: OICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Biblica® Open Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Biblica® Open Ibibio Contemporary Bible™
Copyright © 2020, 2025 by Biblica, Inc.
Biblica ye idiọọñọ esịn ke itie utom United States Patent and Trademark Office enọ Biblica, Inc. Enam ke emaekebọ Unyịmme.
Biblica and the Biblica logo are trademarks registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.