युहन्न 8
8
ब्यभीचार् स्य्हेङ्बे अमकोल
1तर येसु जैतुन् पङ्बे गङ्तोर् स्येःजेत्ज्यी।
2न्हम्स्योर्हङ् स्य्होः म्हुन्चेनो येसु पर्मेस्वर्की दीम्री दोःज्यीम् स्येःजेत्ज्यी। ओसेम् जम्मनो म्हीमा थेङ्की कोरोरो र्हुब् तज्यी, ओसेम् थेङ् स्य्हुःज्यीम् थेङ्यीमात लोप्प तीप्जेत्ज्यी।
3ओसेम् ब्यभीचार् स्य्हेङ्टीबे बेलोरी स्यप्पे अमकोलत धर्म लोप्पोन्मातेङ् फरीसीमाचे बज्यीम् जम्मइ ङोन्ग्यम् रप्पुङ्ज्यी। 4ओसेम् थेङ्यीमाचे येसुत पङ्ज्यी, “लोप्पोन्, चु अमकोलत ब्यभीचार् स्य्हेङ्टीन स्य्हेङ्टीननो चुङ्ज्यी। 5मोसाचे ब्रीबे पर्मेस्वर्की नीयम्री चोतेबे लक् स्य्हेङ्बे अमकोलत युङ्बचे प्रुङ्ज्यीम् सेत्थोब बी कुल्बल मुब#लेबी २०:१०; ब्यबस्था २२:२२-२४, ओसेम् थेङ्चेम् ता सुङ्जेत्प?” 6थेङ्यीमाचे थेङ्त दोस् ल्हइदी म्य्हङ्मुवा बी चोले ङ्योत्पल मुबल। तर थेङ्चे कुरीक् लजेत्ज्यीम् सरी फ्या जुमीचे ब्रीजेत्ज्यी। 7थेङ्यीमाचे ङ्योत्स्यीनो टीज्यी, होत्तज्यीम् थेङ् रप्जेत्ज्यीम् थेङ्यीमात सुङ्ज्यी, “एङ्यीमान्हङ्री खल्चे देरेसम्म पाप् स्य्हेङ्बल अरे, हुजुचेनो गोदोब्न्हङ् ङोन्ग्यम् चु अमकोलत युङ्बचे प्रुङ्खइ।” 8हुजुलीप्चे येसुचे देबेएनो कुरीक् लजेत्ज्यीम् सरी ब्रीजेत्ज्यी। 9येसुचे सुङ्बे तम् थ्येःब बीसेम् खेक्पमा य्हङ्से य्हर्ब तीप्ज्यीम् ज्यीदमाएनो काकर्ले हुजु ग्ला ग्यम्से य्हर्ज्यी। ज्युःरी येसुतेङ् अमलकीनो हुजुरी तज्यी, ओसेम् हुजु अमकोल थेङ्की ङोन्ग्यम् रप्टीबल मुबल। 10येसु रप्जेत्ज्यी ओसेम् अमकोलत ङ्योत्जेत्ज्यी, “ओ अङ, थेङ्यीमा खइ? एत खल्चेएनो सजाय अपीनो स्यीम्?” 11हुजु अमकोलचे पङ्ज्यी, “प्रभु, खल्चेएनो अपीन्।” ओसेम् येसुचे सुङ्ज्यी, “ङएनो एत सजाय अपीन्। देरेम् य्हरो, तर दोःज्यीम् पाप् थस्य्हेङो।”]
येसु जम्बुलीङ्की य्हल्
12येसुचे देबेएनो थेङ्यीमात सुङ्ज्यी, “जम्बुलीङ्की य्हल् ङनो य्हीन्ब। ङइ लीप्चे ब्रबलमा म्हुन्दुङ्री ब्रस्ये अरे, तलेपङ्सम् थेचे जीवन्की य्हल् यङ्स्ये मुब।”
13चु थ्येःज्यीम् फरीसीमाचे थेङ्त पङ्ज्यी, “ए र्हङ्की बारेरी र्हङ्नो पङ्ब, ओसेम् एइ हुजु तम् देमेन् अय्हीन्।”
14येसुचे थेङ्यीमात जोहप् न्हङ्ज्यी, “ङइ बारेरी ङ र्हङ्चेनो पङ्लेनो ङइ तम् देमेन्नो य्हीन्ब, तलेपङ्सम् ङ खनचे खबल ओसेम् खन ङ्यीटीब बी ङत था मुब। तर एङ्यीमातमी हुजु तम् था अरे। 15एङ्यीमाचे म्हीचे म्हेन्ब र्हङ्ले न्याय स्य्हेङ्ब, तर ङम् खल्तेएनो न्याय अस्य्हेङ्। 16ङचे न्याय स्य्हेङ्थोलेनो ङचे स्य्हेङ्बे न्याय देमेन् तब, तलेपङ्सम् न्याय स्य्हेङ्बल ङ गीकीनो अय्हीन् तर ङत पीत्युजेत्पे अपएनो ङतेङ् बक्च्य मुब। 17एङ्यीमाकी र्हङ्की नीयम्रीएनो म्ही ङ्य्हीचे पङ्बे तम् देमेन् तब#ब्यबस्था १९:१५ बी ब्रीबल मुब। 18ङइ बारेरी पङ्बल गी ङनो य्हीन्ब ओसेम् गीबमी ङत पीत्युजेत्पे अप य्हीन्ब।”
19हुजु लीप्चे थेङ्यीमाचे थेङ्त, “एइ अप खन मुब?” बी ङ्योत्ज्यी।
येसुचे थेङ्यीमात जोहप् न्हङ्ज्यी, “एङ्यीमाचे न्ह ङत स्येःब न्ह ङइ अपत स्येःब। एङ्यीमाचे ङत स्येःबल य्हीन्सम् ङइ अपतेएनो स्येःस्ये मुबल।”
20येसुचे चु फ्रोइमा पर्मेस्वर्की दीम्की भेटी ताबे तङ्लोइ रेइरी लोप्जेत्टीबे बेलोरी सुङ्बल य्हीन्ब। तर थेङ्त खल्चेएनो अचुङ् तलेपङ्सम् थेङ्की बेलो दवम् खबल अरेबल।
ङ ङ्यीटीबे ग्लारी एङ्यीमा ङ्यीब अखम्
21येसुचे देबेएनो थेङ्यीमात चोले सुङ्जेत्ज्यी, “ङ थारीङ् य्हर्स्ये मुब, ओसेम् एङ्यीमाचे ङत म्हइस्ये मुब, तर एङ्यीमा र्हङ्की पाप्रीनो स्यीस्ये मुब, तलेपङ्सम् ङ ङ्यीटीबे ग्लारी एङ्यीमा खब अखम्।”
22थेङ्चे सुङ्बल थ्येःब बीसेम् यहुदीमाचे पङ्ज्यी, “थेचे र्हङ्चे र्हङ्त सेत्प म्हइटीब वुइ ता? तलेपङ्सम् थे ङ्यीटीबे ग्लारी ङ्य्हङ्मा ङ्यीब अखम् बी पङ्ब।”
23येसुचे थेङ्यीमात सुङ्ज्यी, “एङ्यीमाम् चु दुङ्ल य्हीन्ब, ङम् जोल य्हीन्ब। एङ्यीमा चु जम्बुलीङ्ल य्हीन्ब, ङ चु जम्बुलीङ्ल अय्हीन्। 24होत्तज्यीम् ङचे एङ्यीमात ‘एङ्यीमा र्हङ्की पाप्रीनो स्यीस्ये मुब’ बी पङ्बल य्हीन्ब। तलेपङ्सम् एङ्यीमाचे ‘हुजु ङनो य्हीन्ब’ बी बीस्वास् अस्य्हेङ्ज्यी पङ्सम् एङ्यीमा र्हङ्की पाप्रीनो स्यीस्ये मुब।”
25होत्तज्यीम् थेङ्यीमाचे येसुत, “ए खल स्यीम्?” बी ङ्योत्ज्यी। येसुचे थेङ्यीमात जोहप् न्हङ्ज्यी, “ङ खल बी ङचे एङ्यीमात लोप्प तीप्प य्हङ्सेनो स्येत्पल मुब। 26ङचे एङ्यीमाइ बारेरी पङ्थोबतेङ् न्याय स्य्हेङ्थोबे तम्मी य्हक्को मुब, तर ङत पीत्युजेत्पल देमेन् मुब, ओसेम् ङचे थेङ् ग्यम्से ता थ्येःज्यी हुजु तम्नो जम्बुलीङ्री स्येत्प।”
27येसुचे थेङ्की अप पर्मेस्वर्की बारेरी सुङ्बल बी थेङ्यीमाचे अगो। 28होत्तज्यीम् येसुचे थेङ्यीमात सुङ्ज्यी, “एङ्यीमाचे म्हीइ जत क्रुस्री च्योलाब बीसेम्कीनो हुजु ङनो य्हीन्ब बी स्येःस्ये मुब, ओसेम् ङ ङइ सेम्चे म्हेन्ब र्हङ्ले तेएनो अस्य्हेङ्, तर अपचे ङत लोप्जेत्पे तम्कीनो पङ्ब बी एङ्यीमाचे स्येःस्ये मुब। 29ओसेम् ङत पीत्युजेत्पे अप ङतेङ् बक्च्य मुब। थेङ्चे खेमेएनो ङत ङ गीकीनो ख्लेथेन्बल अरे, तलेपङ्सम् ङचे खेमपङ्लेनो थेङ् तङ्बे लक्कीनो स्य्हेङ्ब।” 30येसुचे सुङ्बे चु तम्मा थ्येःज्यीम् य्हक्को म्हीमाचे थेङ्त बीस्वास् लज्यी।
अब्रहाम्की कोलमा
31येसुचे थेङ्त बीस्वास् स्य्हेङ्बे यहुदीमात सुङ्ज्यी, “ङचे लोप्पे तम्मा ङ्येन्ज्यीम् ब्रस्यीनो टीज्यी पङ्सम् एङ्यीमा देमेन्नो ङइ डबमा य्हीन्ब। 32हुजु लीप्चे एङ्यीमाचे देमेन्त स्येःस्ये मुब, ओसेम् देमेन्चे एङ्यीमात छुटकारा पीन्स्ये मुब।”
33ओसेम् थेङ्यीमाचे पङ्ज्यी, “ङ्यीमा अब्रहाम्की कोलमा य्हीन्ब। ङ्यीमा खेमेएनो खलइ बानएनो तबल अरे, ओसेम् एचे ङ्यीमात ‘एङ्यीमात छुटकारा पीन्स्ये मुब’ पङ्बल ता स्यीम्?”
34येसुचे थेङ्यीमात जोहप् न्हङ्ज्यी, “ङ एङ्यीमात देमेन्नो पङ्ब, पाप् स्य्हेङ्बलमा जम्मनो पाप्की बान य्हीन्ब। 35बान खेमेएनो दीम्की म्हेम्य अत, तर ज खेमपङ्लेनो दीम्की म्हेम्य तब। 36होत्तज्यीम् जचे एङ्यीमात छुटकारा पीन्ज्यी पङ्सम् एङ्यीमाचे देमेन्नो छुटकारा यङ्स्ये मुब। 37एङ्यीमा अब्रहाम्की कोलमा य्हीन्ब बी ङचे स्येःबलनो मुब, तर एङ्यीमाचे ङत सेत्प म्हइब, तलेपङ्सम् एङ्यीमाचे ङचे पङ्बे तम् सेम्री थेन् अखम्। 38ङचेम् ङ ङइ अपतेङ् मुबे बेलोरी म्रङ्बे तम्मा स्येत्प। तर एङ्यीमाचेम् एङ्यीमाकी अप ग्यम्से थ्येःबे लक्मा स्य्हेङ्ब।”
39थेङ्यीमाचे येसुत, “ङ्यीमाइ अप अब्रहाम् य्हीन्ब” बी पङ्ज्यी।
ओसेम् येसुचे थेङ्यीमात सुङ्ज्यी, “एङ्यीमा देमेन्नो अब्रहाम्की कोलमा य्हीन्सम् एङ्यीमाचेएनो अब्रहाम्चे र्हङ्बे लक्नो स्य्हेङ्स्येल। 40ङचे एङ्यीमात पर्मेस्वर् ग्यम्से थ्येःबे देमेन्की फ्रोइ स्येत्प, तर एङ्यीमाचे ङत सेत्प म्हइब। अब्रहाम्चे चोतेबे लक् खेमेएनो अस्य्हेङ्! 41एङ्यीमाचेम् एङ्यीमाकी अपचे ता स्य्हेङ्ज्यी एङ्यीमाचेएनो हुजु स्य्हेङ्ब।”
ओसेम् थेङ्यीमाचे येसुत, “ङ्यीमा जम्म थोइ बेस्य ग्यम्से न्हबे कोलमा अय्हीन्। ङ्यीमाल अप गीकीनो मुब, थेङ् पर्मेस्वर् य्हीन्ब” बी पङ्ज्यी।
42येसुचे थेङ्यीमात सुङज्यी, “एङ्यीमाकी अप पर्मेस्वर् य्हीन्बल पङ्सम् एङ्यीमाचे ङत म्होइस्येल, तलेपङ्सम् ङ पर्मेस्वर् ग्यम्से युबल य्हीन्ब। ङ ङइ सेम्चे म्हेन्ज्यीम् युबल अय्हीन् तर ङत थेङ्चे पीत्युजेत्पल य्हीन्ब। 43ङचे पङ्बे तम् एङ्यीमाचे गोअखम्, तलेपङ्सम् ङचे पङ्बे तम् एङ्यीमाचे ङ्येन्बे सेम् लअखम्। 44एङ्यीमाकी अप सैतान् य्हीन्ब, ओसेम् एङ्यीमाकी अपचे स्य्हेङ्खइ म्हेन्ब र्हङ्लेनो स्य्हेङ्बरी एङ्यीमा तयार मुब। थेचेम् ठुङ्बे बेलो य्हङ्सेनो म्ही सेत्न लबल मुबल, थे देमेन्की तम्री टीब अखम्, तलेपङ्सम् थेल न्हङ्री तेएनो देमेन् अरे। थेइ बानी र्हङ्लेनो थेचे भ्युकीनो पङ्ब। तलेपङ्सम् थे भ्यु य्हीन्ब, ओसेम् थे भ्युकी अप य्हीन्ब। 45तर ङचे देमेन्कीनो पङ्बल तज्यीम् एङ्यीमाचे ङत बीस्वास् अल। 46एङ्यीमान्हङ्री खल्चे ङत पाप्की दोस् ङोन्ब खम्ब? ङचे देमेन्कीनो पङ्ब पङ्सम् एङ्यीमाचे ङत तले बीस्वास् अलबल स्यीम्? 47खजु म्ही पर्मेस्वर्ल य्हीन्ब थेचे पर्मेस्वर्की फ्रोइ ङ्येन्ब। तर एङ्यीमाम् पर्मेस्वर्ल अय्हीन्, होत्तज्यीम् एङ्यीमाचे अङ्येन्।”
अब्रहाम् बीम येसु ङ्हच्छ्यङ्
48ओसेम् यहुदी अगुवामाचे पङ्ज्यी, “ङ्यीमाचे पङ्बे तम् ठीक्नो य्हीन्ब, ए सामरी म्ही य्हीन्ब, ओसेम् एत म्हङ् स्यप्पल मुब!”
49येसुचे जोहप् न्हङ्ज्यी, “ङत म्हङ् स्यप्पल अरे, ङ अपत स्य्हेस स्य्हेङ्ब, तर एङ्यीमाचेम् ङत स्य्हेस अस्य्हेङ्। 50ङ र्हङ्चे र्हङ्नो स्य्हेस अम्हइ, तर हुजुरी गी मुब, थेङ्चेनो ङइ स्य्हेस म्हइब ओसेम् ङइ पक्षरी न्याय स्य्हेङ्जेत्प। 51ङ एङ्यीमात देमेन्नो पङ्ब खल्चे ङचे पङ्बे तम् ङ्येन्ब थे खेमेएनो स्यीस्ये अरे।”
52यहुदी अगुवामाचे थेङ्त पङ्ज्यी, “देरेम् ङ्यीमाचे देमेन्नो एत म्हङ् स्यप्पल टीम् बी स्येःज्यी! अब्रहाम् स्यीज्यी, अगम्बक्तमाएनो स्यीज्यी, होलेतलेनो एचे पङ्ब, ‘खल्चे ङचे पङ्बे तम् ङ्येन्ब थे खेमेएनो स्यीस्ये अरे’ 53ता ए ङ्यीमाकी स्यीज्यीम् य्हर्बे म्हेम्हे अब्रहाम्तेङ् अगम्बक्तमा बीमएनो ङ्हच्छ्यङ् य्हीन्ब? ए र्हङ्चे र्हङ्त ता म्हेन्ब स्यीम्?”
54येसुचे थेङ्यीमात जोहप् न्हङ्ज्यी, “ङचे र्हङ्की स्य्हेस म्हइबल य्हीन्लेनो हुजु ङइ लागीरी तइ लक्एनो तस्ये अरेबल। तर ङत ङइ अपचे स्य्हेस स्य्हेङ्जेत्प, थेङ्त एङ्यीमाचे एङ्यीमाइ पर्मेस्वर् पङ्ब। 55होलेतलेनो एङ्यीमाचे थेङ्त स्येःबल अरे, ङचेम् थेङ्त ज्यनले स्येःब। ङचेएनो थेङ्त अस्ये पङ्ज्यी पङ्सम् ङएनो एङ्यीमा र्हङ्बे भ्यु पङ्बे म्ही तस्येल। तर ङचे थेङ्त स्येःब, ओसेम् थेङ्की फ्रोइ ङ्येन्ब। 56एङ्यीमाकी म्हेम्हे अब्रहाम्चे ङइ दीन् म्रङ्बरी य्हक्को सेम् लबल मुबल, ओसेम् थेचे म्रङ्ज्यीम् य्हक्को तङ्ज्यी।”
57थेङ्यीमाचे येसुत, “एचे दवम् ल्हेःगोर् ब्लीस्यी ङ्य्हीत्तीङ्एनो तबल अरे, खले एचे ङ्यीमाकी म्हेम्हे अब्रहाम्त म्रङ्ज्यी?” बी पङ्ज्यी।
58ओसेम् येसुचे थेङ्यीमात, “ङ एङ्यीमात देमेन्नो पङ्ब, अब्रहाम् न्हब बीम ङोन्ग्यम् य्हङ्सेनो ङ मुबल” बी जोहप् न्हङ्ज्यी।
59होत्तज्यीम् थेङ्यीमाचे येसुत प्रुङ्बरी युङ्ब दुत्ज्यी, तर थेङ् पर्मेस्वर्की दीम् ग्यम्से खुसुक्ले डोङ्ज्यीम् स्येःजेत्ज्यी।
Айни замон обунашуда:
युहन्न 8: WTDG
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.