Mateo 17
17
Ku Jesús tyikkajtskexy
(Mr 9.2-13; Lc 9.28-36)
1Kyutujjk xëëw, Jesús tpawaay Pedro, Santiago mëët Juan, Santiago y'ütsy, nits tmëët'ajjty mëjjkojpk kukujkm. 2Jämts, jä' wyinkujkmtë Jesús tyikkajjtsy. Wyiin y'aaw tyoypyëjkëjjxy naa'xkë'n xëëw, jäts wyit poop jajjp tëë'kxp jyajtkëjjxy. 3Nits t'ijxpat'të Moisés mëët Elías Jesús tmëëtnakyäjpxyë. 4Nits Pedro tnëëjmjaay Jesús:
—Wintsën, ¡Oynyäxy ku ëëts mëët nyaa'jë! Ku xtsöky oy ëjts tuwëëk ujts'aytyëjjk nyëk'oyë't: Tu'uk mijts mjä', jatu'uk Moisés, jatu'uk Elías jyä'.
5Niyam y'ijjty Pedro kyakkajpxkita'aky, nits jä' nyikkëyxyëjjpëtë tu'kkëypy yoots jajjp tëë'kxp, jäts tmatootë yootsjotm pën wyaany: Ya'at ëjts n'uu'nk'eepy pën ëjts ntsöjkypy, yë' ëjts tëj nwin'ijxy nwinway: yë' mmumato'otë'p.»
6Ku najj tmatootë ixpëjkpëttëjjk, jäts tsyë'ëjk'eetyë nits naxkëjjxy nyamyujtstaajkëtë. 7Nits Jesús nyimiijnëtë, jäts tyaxajjpäjjtëtë nits nyëë'mxëtë:
—Puttë'ëktë; katij mtsë'ëkëtë.
8Kuts y'ijxjë'kte nippën tka'ok'ijxpatnëtë, jä'yë Jesús janityu'uk.
9Kuts y'ijjty kyitaknëtë kojpkwinm nits Jesús nyëë'mxëtë:
—Nippën xkawaajnëtë't tij tëj x'ijxtë, kunë'm naxwiinë'tjaa'y y'Uu'nk jyükypyëkt.
10Nits ixpëjkpëttëjjk tyëktëëtë Jesús:
—¿Tikëjxts wya'antë pawaa'n yëk'ixpëjkpëttëjjk jäts Elías mi'mp jawyiin?
11Nits Jesús y'atsooy:
—Tëyë'm jä' jäts Elías mi'mp jawyiin, jä'äts tyëkni'oyëkyëxp tukkë'yë. 12Ixyamts ëjts miits nwaajnë jäts tëj Elías y'ajtsmyiny, kä'äts jä' t'ijxkajptë, ntsokattunk jä' ttuntë. Ninyajjts jä' mëët tyëk'ayo'otë't naxwiinë'tjaa'y y'Uu'nk.
13Nitnë'mts ixpëjkpëttëjjk tkumaytyë jäts Juan Bautista jä' y'ijjty tyijjpy.
Jesús tyëktso'oky tu'uk una'ajnk mati' y'ijjty mëjjku'ujy tyumpë tajtsënaajyë'p
(Mr 9.14-29; Lc 9.37-43)
14Ku jya'anëtë maj jäm y'ijjty myuku'uktëjjk mëët nimay jaa'y, nits tu'uk yaa'ytyëjjk twinkunëjkx'ëëy Jesús jäts nyakyujxtänëtyaajkë wyinkujjky jäts tnëëjmjaay:
15Wintsën, pa'ayoojääky ëjts n'uu'nk, mëjknäxy mönyë yëk'ayoyë, junëjäty jyënkitaappety ok nyëkitaappety. 16Tëj ëjts m'ixpëjkpëttëjjk njamo'oy nits jyeexyë tyëktso'oky, kä'äts yë' tëj yyëkmata'akyë'të.
17Nits Jesús y'atsooy:
—¡Miits pökytyumpë jäts kattëyjyaa'w'eepyë jaa'y! ¿Junë xjat'të't xtu'ntë't mati' ëjts ntümpy? Kä' ëjts ijtp nyaa'jë'y'itt, yëkmintë jä' una'ajnk.
18Jäts Jesús t'ojjpitsëëmy mëjjku'ujy tyumpë una'ajnk nyikkëjxm, nits jä' una'ajnk jätyë tsyoojky.
19Nits ixpëjkpëttëjjk amää'tsk tyëktëëtë Jesús:
—¿Tikëjxts ëëts tëj xkamay mëjjku'ujy tyumpë nyëkpitsë'mt?
20Nits Jesús nyëë'mxëtë:
—Jakëjx ku kä' miits yëkxon mtëyjyawëtë, tëy ëjts nwa'any ku miits jyeexyë mtëyjyaa'w'ajjtë'n jaknii'xyë'n naa'xkë'n tu'uk naanëxpajjk, mnëëjmjäätyë'p jyeexyë ya'at kojpk: "Kä'äk yaj jäts nëjkx ayam, kä'äkpts yë' kojpk jyeexyë. Nittij miits jyeexyë tsip tsu'ux mkajajjtxyëtë. [21Jä'ku kä' yë' mëjjku'ujy tyumpë najjyë pyitsemy, ayuuj'ajjtë'n nuu'kxtaajkë'n këjxm yë' pyitsemy.]
Jesús jatu'kyaajjë y'oo'jkë'n tnikkäjpxy
(Mr 9.30-32; Lc 9.43-45)
22Ku y'ijjty tu'kmukkë wyittit'të Galilea y'itjotm, nits Jesús nyëë'mxëtë:
—Yyëkkë'yakwamp naxwiinë'tjaa'y y'Uu'nk myutsip'eepyëttëjjk kyë'jë'm, 23jä'äts yyëk'ookë'p, kyutuwëëk xëëwts jatu'kyaajjë jyükypyëkt.
Tsätsywinmaypts ixpëjkpëttëjjk ttattantë jä' ayuujk.
Tsajptëjjk yëknippeky
24Ku Jesús tmëëtja'ajty y'ixpëjkpëttëjjk Capernaúm, jäts pënjäty y'ijjty tsajptëjjk tnippëjktë'p twinkunëjkx'eetyë Pedro jäts tnëëjmjäätyë:
—¿Kä' mWintsën t'ajuytyüky tsajptëjjk?
25—Nits Pedro y'atsooy: —y'ajuytyüjkypy yë'.
Kuts Pedro tyëjjk'ëëy tijkypy, jätyë Jesús nyëë'mxë:
—¿Simón ntsoj mijts mkajpxwimpity? ¿Pën yëknippëjktë'p ok yëktappayo'ytyë'p pëntij yëkkuttujkpëttëjjk yëknikuttujjk'eetyë'p yaj it naxwiin: kukkajjp ok mimpë jaa'y?
26Nits Pedro y'atsooy:
—Mimpë jaa'y.
Nits Jesús jyakwaany:
Naa'm jä', nittij jyeexyë kukkajjp tkakkujuytyë. 27Jäts katij nikoj tsip nyëkmëjktaajkyë'n, nëjkx nëjötypy nits xnëyuu'pätt ajkxmajjts xuu'ny. Jäts ajkx mati' mjuutp jawyiin jä' y'apajk'äjpyts xjuutt tu'uk pujjxmeeny, jä'äts m'ajtstakkuju'ypy ëjts njä' mëët mijts mjä'.
Айни замон обунашуда:
Mateo 17: YTYA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Porciones en Mixe de Yalalag, Oaxaca, México © Sociedad Bíblica de México, A.C.