Sefanaiya 1
1
1Ikọ Abọọñ a-akediighe abịne Sefanaiya ayịn Kuusi, ayịn Kedalia, ayịn Amaria, ayịn Hesikaiya, ke ini ukara Yosaiya ayịn Amọn, adidem Yuda:
Ubiomikpe Afịd Ederimbod ke Usen Abọọñ
2“Ami ñyaakwọọk afịd ñkpọ nsịññe
ke iso isọñ,”
Abọọñ atañ.
3“Ami ñyaakwọọk awo ye unam naña iba nduọọk;
ami ñyaakwọọk mme inuen ke anyọñ
ye iyak ke akpainyañ,
ye mme ubobodñkpọ e-ekenamma mbon ibak eduọññọ.”
“Ke ini ami nsoboke afịd ubon awo
ke iso isọñ,”
Abọọñ atañ,
4“Ami ñyaanyan ubọk mmi ñnwana ye Yuda,
ye afịd mbon se idʌñọ ke Yeruselem.
Ami ñyaasobo afịd nsʌhọ mbon ukpono Baal ke itie ami,
kpa mme anyịñ mme aku ndem,
5mbon e-etuakka iwuod ke anyọñ akọm
ekpono mme ntantaafiọñ,
mbon e-etuakka iwuod enyʌñ enwọñọ ke anyịñ Abọọñ
ye mbon e-enwọñọke ke anyịñ Molek#1:5 Ke usem Hibru ado Malkam,
6mbon e-ewọññọke edem ekpọñ Abọọñ,
inyʌññọ iyem Abọọñ me adibịp mbaña anye.”
7Idop uyio ke iso Abọọñ Andikara,
sia usen Abọọñ akpere.
Abọọñ a-abeeñe uwa;
anye amaadiọñ mbon se anye akekoot idem.
8“Ke usen uwa Abọọñ
ami ñyaanọ mme adaaha ufen,
ye nditọ adidem
ye mbon esịneke
mme afọñ isen idịd.
9Ke usen ado ñyaaben ufen nnọ
afịd mbon e-etreke adidọọk ke inuausʌñ,
e-eyọhọke tembịd mme abasi ammọ
ye afai ye abiaña.
10“Ke usen ado,”
Abọọñ atañ,
“aseeme ayaadọọk ato ke Inuaatob Iyak,
ntuaña ato ke Ufa Efaak,
ñkpo anyʌñ asuana ke mme ntək abod.
11Itua, ndufo e-edʌñọke ke anwa udua;
eyaesobo afịd mme anyam udua ndufo esịññe,
eyaesobo afịd mbon e-enyamma udua ke silfa.
12Ke ini ado ami ñyaakama mme utuenikañ ñyeem Yeruselem
ñnyʌñ nnọ mbon e-ebaaha ke ndueidem ufen,
e-etieghe nte ukọd a-asʌhọke ke anyọñ ntak amọ,
e-ekereke ebo ke, ‘Abọọñ idiinamma ñkpọ ndomokeed,
me eti me idiọọk.’
13Eyaetañ inie ammọ ke mbịme,
ewuut mme ufọk ammọ.
Akpekọm ammọ ebọọp mme ufọk,
ammọ idiidʌññọ ke esịd;
akpekọm ammọ etọ mme inwañ fain,
ammọ idiinwọññọ ukọd ado.”
14Ekamba usen Abọọñ akpere,
akpere anyʌñ adi usọp-usọp.
Ayịd ke usen Abọọñ ado ndod-ndod;
Uko ke Ekọñ a-asio ñkpo ekọñ amọ.
15Usen ado adiido usen ifiobesịd,
usen ukuud ye nnananyen,
usen mfịna ye nsobo,
usen ekịm ye akonayio,
usen ntọñanyọñ ye abubịd,
16usen adukpoñ ye uyom ñkpo ekọñ
abaña mme abio ebọppọ nọ asọñ,
anyʌññọ abaña mme itiad inuuk tọwa.
17“Utọ ukuud ado ke ndiiben nsọk afịd awo,
nọ ammọ eweweere ubọk esaña nte mbon edọñọke nnan,
sia ammọ enam Abọọñ idiọọkñkpọ.
Eyaenwañña iyiib ammọ nte ntọñ
ñkpọ esịdidịb ammọ nte uduañ.
18Kpak silfa me kold ammọ
idiikanna inyaaña ammọ
ke usen ifiobesịd Abọọñ.”
Ikañ ufịb amọ
ayaata afịd ederimbod,
sia anye ayaanam utịd adi ini keed
abaña afịd awo e-edʌñọke ke ederimbod.
Айни замон обунашуда:
Sefanaiya 1: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.