Sakaraiya 14
14
Abọọñ a-Adi Adidat Ukara
1Yeruselem, usen Abọọñ asʌk adi, ini se ediibịme mme inie mfo enyʌñ ebakka ammọ edeeme kpa ke esịd abio mfo ami.
2Ami ñyaakoot afịd mme idịd ndi ke Yeruselem, nọ edinwana ye anye; eyaebọ abio ami enie, enyʌñ ekoono mme ñkpọ ke mme ufọk, enyʌñ esappa ibaan. Eyaekoono mbakka iba abio ami ekaa asen idịd, ado awo idiikoonoke mbon se isʌhọ ikpọñ abio ami. 3Ndin Abọọñ ayaawuọ akaa akenwana ye mme idịd ado, ukem naña anye asinwana ke usen ekọñ. 4Ke usen ado ñkpad amọ adiidoro ke anyọñ Abod Ọlif, ke usakkautịn Yeruselem, ndin Abod Ọlif ayaabakka iba tọọñọ ke usakkautịn tutu usobutịn, anịm ekamba abedeñ, keed ke ubaak iba abod ado akaa adoro, ubaak anye ako akaa usuuk. 5Afo ayaafeghe afrọ ke abedeñ abod mmi, sia anye ayaatara akewuọ Asel. Afo ayaafeghe nte afo akefegheke abọkkọ unyekisọñ ke mme usen Usaiya adidem Yuda. Ndin Abọọñ Abasi mmi ayaadi, afịd mme ndisana ikọd amọ ñko eyaesaña ye anye.
6Utịn idiisakkake, ndedeñ idiinyʌññọ iba, ndedeñ ekịm idiibaaha, ke usen ado. 7Adiido ataa asaña-asaña usen, usen A-Abọọñ ikpọọñ adiọọñọke, ukpʌhọde idiibaaha ke uweemeayio ye akonayio. Ndubiayio amaadi, unwana ayaaba.
8Ke usen ado mmọọñ uwem ayaawuọ ato Yeruselem, mbakka keed ke itie iba ayaafeghe akaa usakkautịn ke Akpainyañ Inʌñ, mbakka anye ako anyʌñ afeghe akaa usobutịn ke Akpainyañ Mediterenia, ke ndaayio ye ke ukwọedịm.
9 Abọọñ adiido adidem ke afịd iso isọñ. Ke usen ado Abọọñ keed ikpọọñ adiiba, ñko anyịñ amọ adiido ukweeñe anyịñ.
10Afịd isọñ, tọọñọ ke Keba tutu Rimọn, ke usuuk Yeruselem, ediiba nte Araba. Ado Yeruselem adiidoro ke anyọñ tọọñọ ke Inuaatob Benyamin tutu itie Akpa Inuaatob, tutu Inuuk Inuaatob, ñko tọọñọ ke Tọwa Hananel tutu asịm afe utem ukọd adidem, ndin ayaasọọñọ ada ke itie amọ. 11Mme awo eyaedʌñọ ke Yeruselem; awo idiisoboke anye aba. Yeruselem ayaaba ke ifuuro.
12Anye ami ado udọñọ nsobo A-Abọọñ adiidat itọ afịd mme idịd e-ekenwanake ye Yeruselem: Ikpọkidem ammọ ayaabʌttọ ke ini ammọ esʌkkọ edada ke ukod ammọ, anyen ammọ ayaayeeme ke ako anyen, ñko edeme ammọ ayaayeeme ammọ ke inua. 13Ke usen ado, Abọọñ ayaatọ mme awo ekamba ndutịme. Ammọ eyaemʌm emọ-emọ ke ubọk enyʌñ etọọñọ adinwana ke idem ammọ. 14Yuda ñko ayaanwana ke Yeruselem. Eyaekoono mme inie afịd mme ñkanñkʌk idịd, uwak ibad kold ye silfa ye afọñ. 15Utọ ukem udọñọ nsobo ado ayaatọ mme enañmbakara ye mme ñwaahadọñki, mme kamel ye mme dọñki, ye afịd mme unam se iba ke mme itie nnaaekọñ ado.
16Ado amaakweeñe, afịd mbon se isʌhọ ke afịd mme idịd se ikinwana ye Yeruselem eyaedʌk ekaa ke isua mme isua adikpono Adidem, Abọọñ Andikponñkan, ye adikinam Usọrọ Atayad. 17Adieke mme idịd ederimbod etreke adika Yeruselem ñkekpono Adidem, Abọọñ Andikponñkan, edịm idiibaaha inọ ammọ. 18Adieke mbon Iyib imiikaaha ikikeene iwana do, ammọ idiinieghe edịm. Abọọñ ayaanọ ammọ udọñọ nsobo a-anye akenọọhọ mme idịd i-imiimaaha adika ñkenam Usọrọ Atayad. 19Ami adiido ufen Iyib ye ufen afịd mme idịd i-imiimaaha adika ñkenam Usọrọ mme Tabanakịd.
20Ke usen ado eyaemịñ, “Adisana Ñkpọ Abọọñ” ke mme ñkanika enañmbakara, ndin mme ako utem ñkpọ ke ufọk Abọọñ ediiba nte mme ndisana bọwịd ke iso akpokoro uwa. 21Afịd ako utem ñkpọ ke Yuda ye Yeruselem ediido ndisana inọ Abọọñ Andikponñkan, ndin afịd awo se idiidinam uwa eyaedat ubaak ako ado etem ñkpọ. Ñko ke usen ado awo Kenan ndomokeed idiibaaha ke ufọk Abọọñ Andikponñkan.
Айни замон обунашуда:
Sakaraiya 14: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.