Sakaraiya 10
10
Abọọñ Ayaase Ñkpọ Abaña Yuda
1Ibeeñe Abọọñ edịm ke ini ukwọ;
Abọọñ ado andinọ edịmitiad.
Anye anọ afịd awo ñkeñe ukod edịm,
anyʌñ atọ inwañ anọ afịd awo.
2Mme ubobodñkpọ etañ ikọ abiaña-abiaña,
mme mbiaidiọñ ekịt mme nsu-nsu ñkukịd;
ammọ enyʌñ etañ mme nsu-nsu ndab,
ammọ enọ mme awo idọñesịd ke ikpu-ikpu.
Ke ntoro mme awo ekpọọrọ nte mme edọñ
e-ekịtte ukuud sia ammọ inieghe andikpeme.
3“Iyadesịd mmi afiop abaña mme akpemeedọñ,
ami ñko ñyaamia mme adadusʌñ ufen;
Sia Abọọñ Andikponñkan ayaase ñkpọ abaña
ufene amọ, kpa ikọd Yuda,
anyʌñ anam ammọ eba nte akịdidem enañmbakara ke iso ekọñ.
4Itiad idakisọñ adiito Yuda idi,
mboi atayad adiito anye idi,
utịgha iso ekọñ adiito ke anye,
afịd mme adaukara ediito ke anye.
5Afịd ammọ ediibit mme anwana anwan ke iso ekọñ
e-enuakka asua ammọ edọñ ke mbad ke mme efaak.
Ammọ eyaenwana sia Abọọñ mmọdo ye ammọ,
ammọ eyaenyʌñ enam abuud amʌm mme awad enañmbakara asua.
6“Ami ñyaanọ Yuda adudu,
ñnyʌñ ñnyaaña mme esiin Yosef.
Ami ñyaamaana mfọn mfọn ye ammọ,
sia ami mmenie mbọm mbaña ammọ.
Ammọ ediiba nte
akenam ami nsịnne ammọ,
sia ami ndo Abọọñ Abasi ammọ,
ami ñko ñyaayie ammọ.
7Mbon Ifrem eyaekappa eba nte mbon ekọñ,
esịd ammọ ayaanyʌñ adat nte enwọñ ukọd.
Nditọ ammọ eyaekịt ami enyʌñ edat esịd;
esịd ammọ ayaadaara ke Abọọñ.
8Ami ñyaakoot ammọ
ñnyʌñ ñkoono ammọ mbok.
Ke akpanikọ ami ñyaafak ammọ;
ammọ eyaewak naña ekedo ke akpa.
9Akpesʌkado nte ami nsuanna ammọ ke atu mme idịd,
kpayeado ammọ eyaentoiyo miin ke mme anyan idịd.
Ammọ ye mme nditọ ammọ eyaedu uwem,
ammọ eyaenyʌñ etịmme enyọñ edi.
10Ami ñyaaben ammọ nto Iyib ndi,
ñnyʌñ ntañ ammọ nto ke Asiria ndi.
Ami ñyaakoono ammọ ñkaa Kilied ye Lebanọn,
ndin ufañ idiikemme afịd ammọ.
11Ammọ eyaesaña eboiyo akpainyañ mfịna;
awawa akpainyañ ayaadobo,
ndin afịd mme udem Nail eyaesaat.
Eyaesuuho ntañidem Asiria enịm ke isọñ,
ndin esañubọọñ Iyib ayaakpọñ anye.
12Ami ñyaasọọñọ ammọ idem ke Abọọñ,
ndin ke anyịñ Abọọñ ammọ eyaedʌñ ke ifuuro,”
Abọọñ Abasi atañ.
Айни замон обунашуда:
Sakaraiya 10: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.