Maika 7
7
Ukuud Isrel
1Utọ ukuud a-ami mbọọhọ mi!
Ami ntie nte awo a-atañña mfịd ke ini idọk
ke ini etañña mme ñkpọ se isʌhọ ke inwañ fain;
eboho kreb ibaaha se edia,
fik andọññọ itọñ abakka anwịm ibaaha.
2E-ekwọọk mme anam akpanikọ esio ke isọñ;
adinen awo ndomokeed isʌhọke.
Afịd awo ededịbe eyem adiduọk iyiib;
ebịne emọ-emọ ke mme iyịre.
3Naña ubọk iba e-ediọọñọ adinam idiọọk;
adaukara ayem mme enọ,
abiideikpe abọ ubọkedem,
mme anie adudu edomo se ammọ eyem,
afịd ammọ edọñọ idiọọk adu ukem.
4Andifọn ñkan ke atu ammọ atie nte akpab,
andinen ñkan adiọọk akan ñkukịm.
Usen Abasi adiighe aduse fiin adisịm,
usen a-mbon ukpeme esioho ñkpo.
Idahami ado usen ndutịme ndufo.
5Kuunie mbuọdidem ke mbọhọidʌñ;
kuudot anyen ke ufan.
Kpa ye awonwaan a-anaaha ufat fiin
kpeme ikọ inua mfo.
6Sia ayịn ikponoke ete amọ,
ayịn awonwaan adakka ikọ ye eka,
anwaan ayịn atọhọ ye eka ebe,
mme asua awo edo mbon esịd ufọk amọ.
7Ado amaado ami, ntie ke idodanyen mbet Abọọñ,
ami mbet Abasi Andinyaaña mmi;
Abasi mmi ayañkop miin.
Isrel Ayaadakka Ada
8Asua mmi, kunnọọ ñnyọọ!
Akpesʌkado ami mmeduọ, ñyaadakka nda.
Akpesʌkado a-ami ntieghe ke ekịm,
Abọọñ ayaado unwana mmi.
9Sia ami mmedue anye,
ami ñyaayọ iyadesịd Abọọñ,
tutu anye akpe ikpe mmi
anyʌñ abiide ikpe mmi.
Anye ayansio miin adi adisịn ke unwana;
ami ñyaakịt adinenido amọ.
10Asua mmi ayaakịt,
ndin abuud ayaafʌk anye,
anye a-akembooho miin,
“Mmọ anye Abọọñ Abasi mfo?”
Anyen mmi ayaakịt iduọ amọ;
kpa idahami, eyaesọnnọ anye ke ñkpad
nte esọnnọ nsọñ ke mme efaak.
11Usen se ediibọp mme ndibene mfo asʌk adi,
usen se ediisịkke mme adaña mfo nọ amaana akpon.
12Ke usen ado mbon awo eyaedi ibịne ndufo,
eto Asiria ye mme abio ke Iyib,
tọọñọ ke Iyib tutu awuọ Yufretis
tọọñọ ke akpainyañ tutu akpainyañ,
tọọñọ ke ikpọabod tutu ikpọabod.
13Ederimbod ayaanaa ukpọk akeene mbon se idʌñ ke esịd,
ato ke mme adinam ammọ.
Akam ye Itooro
14Idat esañ ndufo ikpeme ikọd ndufo,
ufene a-atooho udeeme ndufo,
a-adʌññọ ke idem amọ ke akai,
ke mme isọñ e-efọnnọ ñkpọ.
Yak ammọ edia ke Basan ye Kilied
naña akedo ke mme usen edem.
15“Naña akedo ke ini a-ndufo eketooho Iyib edi,
ami ñyaawọt ammọ mme utịppeñkpọ mmi.”
16Mme idịd eyaekịt enyʌñ ekop abuud,
ebọi ammọ afịd adudu ammọ.
Ammọ eyaedat ubọk efʌk ke inua ammọ,
ndin utọñ ammọ ayaaforo inan.
17Ammọ ediidai ntọñ ke isọñ nte udʌkikọd,
nte mme unam e-enyọọnọ ke isọñ.
Eyaenyeñ idem ewuọñọ ke adu ammọ edi;
ammọ eyaewọññọ ke ndịk ekeene Abọọñ Abasi ñnyịn,
enyʌñ ubaak fiin.
18Anie Abasi itie nte afo,
a-adakkake anọ ke idiọọkñkpọ anyʌñ afeen ndudue
mme ñyọhọnsʌhọ udeeme amọ?
Afo uyatta esịd ke nsi-nsi,
ado akop inem aditua mbọm.
19Afo ayaamaana itua ñnyịn mbọm;
ayaafiik mme idiọọkñkpọ ñnyịn ke idak ukod mfo,
anyʌñ atop afịd mme ndudue ñnyịn adọñ ke udem inyañ.
20Afo ayaanam akpanikọ ye Yekọb,
anyʌñ awọt Ebraham mbọm,
kpa naña akenwọñọ anọọ mme ete ñnyịn
ke mme usen edem.
Айни замон обунашуда:
Maika 7: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.