Matiu 4
4
Edomo Yisọs Idomo ke Anaan
1Akem Sịbidịd amaaben Yisọs akaa anaan nọ setan akedomo anye idomo. 2Ke anye amaakeba ke utreudia ke usen aba ye akonayio aba, abiọọñ amaadọñ anye. 3Ndin andidomo amaadibịne anye akebo, “Adieke afo adooho Ayịn Abasi, bo mme itiad ami ekappa edo uyo.”
4Yisọs amaabọọrọ ate, “E-ewet ete, ‘Idiidooho uyo ikpọọñ ke awo adiidat idu uwem, ado adiidat afịd ikọ a-atooho inua Abasi.’ ”
5Akem setan amaaben anye akaa adisana abio anyʌñ akenam anye ada ke ataa anyọñ tembịd, 6anyʌñ abo anye, “Adieke afo adooho Ayịn Abasi, da mi tamma keduọ ke isọñ. Sia ewewet ebo:
“ ‘Anye ayaanọ mme enyere amọ ewʌhọ ubaña fiin,
ndin ammọ eyaudịppe fiin ke ubọk ammọ,
mbaak afo udutuak ukod mfo ke itiad.’ ”
7Yisọs amaabọọrọ anye ate, “Enyʌñ ewet ñko ebo: ‘Kuudomo Abọọñ Abasi mfo.’ ”
8Setan amaamaana aben anye akaa ataa ñkoñ-ñkoñ abod anyʌñ akewọt anye afịd mme abioubọọñ ederimbod ye mme mmọnyọ ammọ. 9Anye amaanyʌñ abo Yisọs ate, “Ami ñyaakappa afịd ami unọ fiin, adieke afo atuakka iwuod mfo ke isọñ anyʌñ añkpono miin.”
10Yisọs amaabọọrọ anye ate, “Dakka ñkpọñ miin Setan! Sia emaewewet ete: ‘Kpono Abọọñ Abasi mfo nyʌñ nam ñkpọ nọ anye ikpọọñ.’ ”
11Setan amaakpọñ anye, ndin mme enyere emaedi edise ñkpọ ebaña anye.
Yisọs Atọọñọ Adikwọrọ Ikọ
12Ke ini Yisọs akekoppo ke emaesịn Yọọn ke ufọk ñkpakọb, anye amaatịmme anyọñ Kalili. 13Ke anye amaakekpọñ Nasared, anye amaakaa akedʌñ ke Kapanum, abio a-akekpereke ibiok Kalili ke ubeñ Sebulọn ye Naftali. 14Ke ntom se prọfed Aisaiya aketañ amaasu:
15“Isọñ Sebulọn ye isọñ Naftali,
ke Usʌñ Akpainyañ ke edem inyañ Yọdan,
Kalili mme Gentile,
16mbon e-edʌññọ ke ekịm
e-ekịt ekamba unwana;
amaado mbon e-edʌññọ ke isọñ ndukpọñ ñkpa,
unwana ayamma anọ ammọ.”
17Tọọñọ ke ini ado Yisọs amaatọọñọ adikwọrọ ikọ ate, “Ikappa esịd sia abioubọọñ hefịn akpere.”
Yisọs Akoot Mme Akpa Mbed Amọ
18Naña Yisọs akesañake ke mben Akpainyañ Kalili, anye amaakịt nditọeka iba, Saimọn e-ekekoodo Pita, ye ayịneka amọ, Andru. Ammọ ekesʌk etop iyịre esịn ke ibiok, sia ammọ ekedo mme akọiyak. 19Yisọs amaabo ammọ, “Idi, iñkeene miin, ndin ami ñyaidọñ ndufo ekekọ mbon awo.” 20Ini keed ini keed ammọ emaekpọñ iyịre ammọ enyʌñ ekeene anye.
21Anye akekpọñ ndo, anye amaakịt nditọeka iba mfen, Yems, ayịn Sebidi, ye ayịneka amọ, Yọọn. Ammọ ekesịne ke ubom ye ete ammọ, Sebidi, ediọñ iyịre. Yisọs amaasịn uyio akoot ammọ. 22Ini keed ini keed ammọ emaekpọñ ubom ye ete ammọ ekeene anye.
Yisọs Akọk Mbon Udọñọ
23Yisọs amaasaaña ke afịd Kalili akpeep ñkpọ ke mme sinakọk, akwọrọ eti etob abioubọọñ Abasi, anyʌñ akọk afịd udọñọ ye unana nsọñidem ke atu mbon awo do. 24Etob amọ amaasuana ke afịd Siria, mme awo emaenyʌñ ekoono afịd mbon e-ekedọñọke nsio-nsio udọñọ, mbon e-ekedọñọke akpọsọñ mbiakidem, mbon se dimọn akesịn ukad, mbon se ikinie udọñọ atuatuak ye akpaubeñ esọk anye; ndin anye amaanyʌñ akọk ammọ. 25Uwak atu awo e-eketooho Kalili, Dekapolis#4:25 a-adooho Mme Abio Duob, Yeruselem, Yudia ye edem inyañ Yọdan emaekeene anye.
Айни замон обунашуда:
Matiu 4: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.