Matiu 17
17
Ukpəho Uduud
1Usen itiokeed amaakeboiyo, Yisọs amaadat Pita, Yems ye Yọọn, ayịneka Yems adọọk ñkoñ-ñkoñ abod keed enyʌñ ekeba do ke idem ammọ ikpọọñ. 2Do ke uduud amọ akekpəho ke iso ammọ. Iso amọ amaayamma nte utịn, ndin afọñ amọ amaakappa afia nte unwana. 3Ndin ete ise Moses ye Elaiya emaewuọñọ edeppe, edineme nneme ye Yisọs.
4Ndin Pita amaabo Yisọs ate, “Abọọñ, afọn ñnyịn adiba mi. Adieke afo amaaha ami ñyaabọp atayad ita, keed unie fiin, keed anie Moses, keed anie Elaiya.”
5Naña anye akesʌkkọ atatañ ikọ, ñyamma-ñyamma ntọñanyọñ amaadifʌk ammọ, ndin uyio amaato ntọñanyọñ ado awuọ ate, “Anye ami ado Ayịn mmi, a-ami mmaaha ñnyʌñ nnem esịd ye anye eti-eti. Ikpañ utọñ inọ anye!”
6Ke ini mbed amọ ekekoppo ami, ammọ emaeduọññọ ke isọñ efʌk iso ke ndịk. 7Ado Yisọs amaadituuk ammọ ate, “Idakka ida, ikiikop ndịk.” 8Ke ini ammọ ekedịppeke iso, ammọ ikikịtte awo ndomokeed aba, ibọhọke Yisọs.
9Naña ammọ ekesʌkkọ esọiyọ ke abod ado, Yisọs amaanọ ammọ ewʌhọ ate, “Ikiitañ se ekịt inọọ awo ndomokeed tutu enam nọ Ayịn Awo aset ke ñkpa.”
10Mme mbed emaebịp anye, “Ntak a-mme andikpeeb mbed ebooho ke ana Elaiya abem iso adi-e?”
11Yisọs amaabọọrọ ate, “Ke akpanikọ, Elaiya ayaadi adimaana nneeñe afịd ñkpọ mbon. 12Ado ami idọkkọ ndufo, Elaiya amaadidi, ado ammọ ikidiọọñọke anye, ndin ekappa enam anye se ammọ ekeduaduak. Kpa ukem usʌñ ado ke Ayịn Awo adiibọ ufen ke ubọk ammọ.” 13Ke ini ado mbed amọ ekekere ke anye aketañ ikọ ami anọ ammọ abaña Yọọn Aduọkmmọọñ.
Yisọs Akọk Etəkayịn Awodeen a-Anieghe Dimọn
14Ke ini ammọ emaekedisịme atu awo, awodeen keed amaasaña akpere Yisọs anyʌñ atọọñọ edọñ ke iso amọ. 15Ndin anye amaabo, “Abọọñ, tua ayịn mmi mbọm, anye ado ndukpi anyʌñ abọ ufen eti-eti. Anye asiduọ adʌk ikañ ye mmọọñ uwak ini. 16Mmaaben anye nsọk mme mbed mfo ado ammọ ikikanna ikọk anye.”
17Yisọs amaabọọrọ ate, “Ndufo mbon emana unana mbuọdidem ye ukwañ uwem, ami ndiiba ye ndufo ñkpeene die? Iben ayịn akparawa ado insọk miin mi.” 18Yisọs amaawuuk dimọn ado ndin dimọn amaawuọ etək akparawa ado ke idem, ndin idem amaasọñ anye tọọñọ ke idaha ado.
19Akem mme mbed emaedibịne Yisọs ndịbe-ndịbe enyʌñ ekebịp anye ete, “Ntak a-ñnyịn imiikikanna adibịn dimọn ado nsio-o?”
20Anye amaabọọrọ, “Sia mbuọdidem ndufo ado ataa etək-etək. Ntañ akpanikọ inọ ndufo, ekpenie mbuọdidem akpesʌkkọ asịp nte ñkpasi mọstad, emekeme ibo ekamba abod ami, ‘Dakka ke itie ami kaa ñko, ndin anye ayaadakka.’ Ñkpọ ndomokeed idiisọññọ ikan ndufo. [21Ado ekeme ibịn dimọn anye ami ke akam ye utreudia.”]#17:21 Usʌk ikpañwed esịn mme ikọ ake abitte se iba ke Maak 9:29
Yisọs Atañ Abaña Ñkpa Amọ Ayọhọ Ñke Mba
22Ammọ emaekedisoobo ke Kalili, Yisọs amaabo, “Eyaetap Ayịn Awo esịn ke ubọk mme awo. 23Ammọ eyaewot anye, ndin ke ayọhọ usen ita eyaenam anye aset ke ñkpa.” Ndin mme mbed amọ emaefʌhọ eti-eti.
Taks Tembịd
24Yisọs ye mbed amọ emaekedisịm Kapanum, mme abọọ taks tembịd a-akedooho drakma iba, emaedibịp Pita, “Ado nte eteufọk ndufo isikpeeghe taks tembịd?”
25Anye amaabọọrọ, “Asikpe.”
Ke ini Pita akedʌkkọ ufọk, Yisọs akedo akpa awo aditañ ikọ. Anye amaabo, “Saimọn, nsoo ido akikere mfo? Mme ndidem ederimbod ebọ isob ye taks eto mme anie: me ebọ eto nditọ ammọ me ebọ eto mbon mfen?”
26Pita amaabọọrọ, “Mbon mfen.”
Yisọs amaabo anye, “Ndin e-esio mme nditọ efep. 27Ado mbaak ñnyịn ididue ammọ, kaa ibiok ako, nyʌñ top uwaam mfo sịn. Ben akpa iyak a-afo uduumʌm, tat anye inua, ndin ayaakịt drakma inaañ. Ben anye sọk ammọ ke taks mmi ye ake ndufo.”
Айни замон обунашуда:
Matiu 17: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.