Luk 6
6
Yisọs Ado Abọọñ Sabad
1Ke usen Sabad keed Yisọs amaasaña aboiyo ke mme inwañ abakpa,#6:1 Akesido eduuwem ammọ adiyaak mme akaisañ se ikop mbiọñ nnọ ekịppe abakpa ke inwañ mfịd eta. ndin mme mbed amọ emaetọọñọ adikịppe usʌk mfịd nta. 2Ubaak mme Farisi emaebịp ammọ ebo, “Ntak a-ndufo enamma ñkpọ se mbed akpan ke usen Sabad-a?”
3Yisọs amaabọọrọ ammọ ate, “Nte akenam ndufo ikoodo se Defid ye mme nsaña amọ ekenam ke ini abiọọñ akedọññọ ammọ? 4Anye amaadʌk ufọk Abasi anyʌñ akesio uyo e-emaekediọñ ata, uyo a-adooho mme aku kpọd ekenie unen adita. Anye amaanyʌñ anọ mme nsaña amọ ubaak.” 5Ndin Yisọs amaadian do abo ammọ, “Ayịn Awo ado Abọọñ Sabad.”
6Ke usen Sabad mfen, anye amaadʌk akaa ke sinakọk anyʌñ akekpeep ñkpọ; ndin awodeen keed u-ubọk nnasia amọ amaakekpa amaaba do. 7Mme Farisi ye mme akpeeb mbed emaeyem se ekpedat edot Yisọs ikọ, ado amaanam ammọ enekke ewuuk anyen ese me anye ayaakọk udọñọ ke usen Sabad. 8Ado Yisọs amaadiọọñọ se ammọ ekekere, ndin amaabo awodeen a-akenieghe ñkpaikpa ubọk ate, “Dakka da ke iso afịd awo.” Ndin awo ado amaanyʌñ adakka ada.
9Yisọs ndin amaabo ammọ ate, “Yak ami ibịp ndufo ñkpọ ise: Akee ado se mbed atemme abo enam ke usen Sabad, adinam eti me adinam idiọọk, adinyaaña uwem me adisobo?”
10Anye amaakanna anyen aseet afịd ammọ, anyʌñ abo awo u-ubọk amaakekpa ate, “Nyanna ubọk mfo.” Anye amaanam se Yisọs akebo anye anam, ndin ubọk amọ amaamaana akappa adeghe ataa afịd-afịd. 11Ado mme Farisi ye mme akpeeb mbed emaekop akpọsọñ iyadesịd enyʌñ etọọñọ adidioomo ye emọ-emọ se ammọ ekpenam Yisọs.
Mme Mbed Duob mme Iba
12Akedo usen keed, Yisọs amaawuọ akaa mben ekamba abod adikibọñ akam, ndin anye amaatie afịd akonayio abọñ akam anọ Abasi. 13Ayio akesiere, anye amaakoot mme mbed amọ akpere idem, ndin anye amaamek awo duob mme iba ke atu ammọ a-anye akekoodo mme abọsịd:
14Saimọn (a-anye akekoodo Pita), ye ayịneka amọ awodeen Andru,
Yems,
Yọọn,
Filib,
Batolomiu,
15Matiu,
Tọmọs,
Yems ayịn Alfiọs,
Saimọn e-ekekoodo Amaidʌñ.
16Yudas ayịn Yems,
ye Yudas Iskariọd, a-akedooho andikitap Yisọs nnọọ ñkpa.
Mme Adidiọñ ye Isuuñọ
17Akem anye amaasọiyọ ye mme mbed amọ adida ke unaisọñ. Ataa uwak mme mbed amọ ye uwak atu awo emaeto ke afịd Yudia, Yeruselem, ye mben esʌk Tai ye Sidọn edi, 18e-ekediighe adikop ikọ amọ ye adibọ ukọk udọñọ. Anye amaakọk mme awo se ndiọi sịbidịd akefịna, 19ndin afịd awo emaeyem adituuk anye, sia adudu akesʌk ato idem amọ awuọ anyʌñ akọk afịd ammọ udọñọ.
20Ke anye amaakebenne anyen ase mme mbed amọ, anye amaabo:
“Afọfọn inọ ndufo e-edooho uweene,
sia abioubọọñ Abasi inie ndufo.
21 Afọfọn inọ ndufo e-etieghe abiọọñ idahami,
sia eyaekop uyʌkkọ.
Afọfọn inọ ndufo e-etuaha ayịd idahami,
sia eyaesak imam.
22 Afọfọn inọ ndufo ke mbon awo emaisua ndufo,
ammọ emaisara ndufo ke atu, enyʌñ isuenne ndufo
enyʌñ esịn anyịñ ndufo nte idiọọk,
ke ntak Ayịn Awo.
23 “Idaara ke usen ado inyʌñ ikop ataa inemesịd, sia utịb ndufo akpon ke hefịn. Sia ukem ado ke mme eteete ammọ ekenam mme prọfed.
24 “Ado adọdiọọk inọ ndufo e-edoññoke mme imọ awo,
sia ndufo emebọbọ idọñesịd ndufo.
25 Adọdiọọk inọ ndufo e-ediaha eyʌkkọ idahami,
sia abiọọñ ayaidọñ ndufo.
Adọdiọọk inọ ndufo e-esakka imam idahami,
sia ndufo eyaefʌhọ enyʌñ etua ayịd.
26 Adọdiọọk inọ ndufo a-mme awo etañña nti ikọ ebaña,
sia ntoro ke mme eteete ammọ ekesinam mme prọfed abiaña.
Adima mme Asua
27 “Ado ami ntañ ami inọ ndufo e-ekpañña utọñ ennọ miin: Ima mme asua ndufo, inam nti ñkpọ inọ mbon i-isuaha ndufo, 28idiọñ mbon i-isueñe ndufo, ibọñ akam inọ mbon i-inamma ndufo idiọọk. 29Awo akpisiak ndufo ufia ke mbañ keed, ikanna mbañ edem uko inọ anye. Awo akpiwappa ndufo ewịra abọ, yak anye adat afọñidem ndufo ñko. 30Awo akpibeeñe ñkpọ, inọ anye, ndin awo akpeben ñkpọ ndufo ikiiyem aba. 31Inam inọ mbon mfen se ndufo ekpema ammọ enam inọ ndufo.
32 “Adieke ndufo emaaha mbon i-imaaha ndufo, nsoo ido udod ndufo? Akapado ndiọi awo esʌk ema mbon e-emaaha ammọ. 33Ñko ndufo ekpenam nti ñkpọ enọ mbon e-efọnnọ ido ye ndufo, nsoo ido udod ndufo, sia mme ndiọi awo e-enam ukem ado. 34Ñko ndufo ekpewuọt mme awo e-ediikan imaana ikpe ndufo, nsoo ido udod ndufo? Mme ndiọi awo ewuọt akpo ammọ ke idodanyen ke eyaekpọñ inọ mmimọ ayọhọ-ayọhọ. 35Ado ima mme asua ndufo, inyʌñ isio ammọ eti usiene, iwuọt ammọ ñkpọ, ikiinyʌñ inie idodanyen aditịmme mbọọ. Ndin utịb ndufo ayaakpon, ndufo eyaedoñño nditọ Andikoñ Ñkan, sia anye afọfọn ido ye mme anana esịd ekọọm ye mbon ibak. 36Itua awo mbọm, kpa naña Ete ndufo atua awo mbọm.
Ubiereikpe Nnọọ Mbon Mfen
37 “Ikiibiide ikpe inọọ awo, mbaak awo adibiide ikpe ndufo. Ikiibiat awo, mbaak awo adibiat ndufo. Ifeen inọ awo, nọ awo afeen inọ ndufo. 38Inọ ke eyainọ ndufo. Eti udomo, efiik, enyeghe, anekke ayọhọ aduọiyọ, adiido udeeme ndufo. Sia ukem udomo ñkpọ a-ndufo ekamake edomo, ke ediinyʌñ ikama idomo inọ ndufo.”
39Anye amaanyʌñ atop ñke ami anọ ammọ: “Nte nnan akeme adidat nnan usʌñ? Nte ammọ awo iba idiiduọññọke idọñọ ube? 40Ayịn ufọkñwed ikponno ikan andikpeeb amọ, ado anye a-abọọhọ ayọhọ ukpeeb ayaatie nte andikpeeb amọ.
41 “Ntak a-afo akịtte etək ndueeto ke anyen ayịneka mfo, ado ukịtte adukpọk a-asịneke ke anyen mfo-o? 42Asaña die adibo ayịneka mfo, ‘Ayịneka, yak ami nsio etək mbio ke anyen mfo mfep,’ ke ini afo ke idem mfo umuukanna ukịt adukpọk a-asịneke ke anyen mfo? Afo awo mbubịk, bemiso sio eka adukpọk ke anyen mfo nọ afo anekke amọọnọ etək mbio a-asịneke ke anyen ayịneka mfo.
Eto ye Mfịd Amọ
43 “Ibaaha eti eto a-anwịmme idiọọk mfịd, inyʌññọ iba idiọọk eto anwịmme eti mfịd. 44Ediọọñọ eto ekeene mfịd se anye anwịm. Sia awo isikịppeke fik ito eto ñkukịm, awo inyʌññọ ikịppe kreb ito udañaya. 45Eti awo asịññe nti ñkpọ a-adọñọke ke ise esịd amọ, ukem ado idiọọk awo asịññe ndiọiñkpọ a-adọñọke anye ke esịd. Sia se iwuọ awo ke inua akeene se ifịghe anye ke esịd.
Mme Adiọọñọñkpọ ye mme Ndisịme Abọbufọk
46 “Ntak a-ndufo eñkoodo miin, ‘Abọọñ, Abọọñ,’ ado ndufo inamma se ami mboo? 47Ami ñyaaben iwọt ndufo nte udomo ñkpọ naña awo a-adiighe ambịne miin, akop ikọ mmi anyʌñ aben asịn ke adinam aba. 48Ammọ eba nte awo a-abọppọ ufọk, a-amaakedọk isọñ atəño ndin asịn itiad idakisọñ. Ke atọ amaakedi, mmọọñ anyʌñ atọ ufọk ado, kpayeado ikikanna iwuut anye, sia emaenekke ebọp anye. 49Ado awo a-akoppo ikọ mmi ndin ibenne isịn ke adinam atie nte awo a-akebọppọ ufọk ado isịnne itiad idakisọñ. Ke ini atọ amaakeditọ ufọk ado, anye amaaduọ ataa afịd-afịd.”
Айни замон обунашуда:
Luk 6: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.