Yenesis 1
1
Ntọọñọ
1Ke aditọọñọ Abasi amaabot mme hefịn ye isọñ. 2Ndin isọñ akedo ikpu-ikpu ye ukpọk. Ekịm amaayọhọ anyọñ akpammọọñ, ndin Sịbidịd Abasi amaafuum ke anyọñ mmọọñ.
3Ndin Abasi amaabo, “Yak unwana aba,” unwana amaanyʌñ aba. 4Abasi amaakịt ke unwana ado a-afọn, anye amaanyʌñ adiañña unwana ado akpọñ ekịm. 5Abasi amaakoot unwana “uweemeayio,” anyʌñ akoot ekịm “akonayio.” Ndin ndubiayio ye ubakusen emaeba ke akpa usen.
6Ndin Abasi amaabo, “Yak ukpa aba ke ufọọd mmọọñ nọ adiañña mmọọñ ye mmọọñ.” 7Ndin Abasi amaanam ukpa anyʌñ adiañña mmọọñ idak ukpa ye mmọọñ anyọñ ukpa. Ndin amaado ntoro. 8Abasi amaakoot ukpa ado “ikpaanyọñ.” Ndin ndubiayio ye ubakusen emaeba ke ayọhọ usen iba.
9Ndin Abasi amaabo, “Yak mmọọñ ke idak ikpaanyọñ aboho itie keed, yak nsaad isọñ anyʌñ awuọ ada.” Ndin amaado ntoro. 10Abasi amaakoot nsaad isọñ “isọñ”, anyʌñ akoot mme mmọọñ e-ekebohoke “mme akpainyañ.” Abasi amaanyʌñ akịt ke amaafọn.
11Ndin Abasi amaabo, “Yak isọñ atịppe mbid: mme eto se iyọhọ ye ñkpasi ye mme eto ke isọñ e-enwịmme mfịd ye ñkpasi ke esịd, akeene nsio-nsio aduuk ammọ.” Ndin amaado ntoro. 12Isọñ amaatịppe mbid. Mme eto emaesakka ke ñkpasi ekeene mme aduuk ammọ ye mme eto enwịmme mfịd ekeene mme aduuk ammọ. Abasi amaanyʌñ akịt ke a-afọn. 13Ndin ndubiayio ye ubakusen emaeba ke ayọhọ usen ita.
14Ndin Abasi amaabo, “Yak unwana aba ke ukpa ikpaanyọñ, nọ abakka uweemeayio ye akonayio, yak ammọ enyʌñ eba nte idiọọñọ adiwọt mme asaña-asaña ini, ye mme usen ye mme isua, 15yak ammọ enyʌñ edo unwana ke ukpa ikpaanyọñ nọ ayamma anọ isọñ.” Ndin amaado ntoro. 16Abasi amaanam ikpọ unwana iba, unwana andikpon ñkan adikara uweemeayio ye etək unwana adikara akonayio. Anye amaanyʌñ anam mme ntantaafiọñ. 17Abasi amaanịm ammọ ke ukpa ikpaanyọñ adinọ isọñ unwana, 18adikara uweemeayio ye akonayio, anyʌñ adiañña unwana akpọñ ekịm. Ndin Abasi amaakịt ke a-afọn. 19Ndin ndubiayio ye ubakusen emaeba ke ayọhọ usen inaañ.
20Ndin Abasi amaabo “Yak mmọọñ ayọhọ ye mme aduuwem ñkpọ, yak mme inuen enyʌñ efuurọ ekpọñ isọñ ke ukpa ikpaanyọñ.” 21Ntom ke Abasi akebot mme ikpọ unam ke akpainyañ ye afịd ñkpọ se idu uwem e-edọñọke eyọhọ mmọọñ, e-enyʌññọ esaaña ke esịd mmọọñ akeene aduuk ammọ, ye aduuk inuen se inie mba akeene mme aduuk ammọ. Abasi amaanyʌñ akịt ke a-afọn. 22Abasi amaadiọñ ammọ anyʌñ abo, “Itọt inyʌñ iwak ke ibad inyʌñ iyọhọ mmọọñ ke mme akpainyañ, yak mme inuen enyʌñ etọt ke ederimbod.” 23Ndin ndubiayio ye ubakusen emaeba ke ayọhọ usen ition.
24Akema Abasi amaabo “Yak isọñ asịññe mme aduuwem ñkpọ akeene mme aduuk ammọ: Mme ufene, mme unam e-esaañake ke isọñ, ye mme ndiọi unamikọd, afịd akeene aduuk ammọ.” Ndin amaado ntoro. 25Abasi amaanam ndiọi unamikọd akeene aduuk ammọ, mme ufene akeene aduuk ammọ, ye afịd mme unam e-esaañake ke isọñ akeene aduuk ammọ. Ndin Abasi amaakịt ke a-afọn.
26Ndin Abasi amaabo, “Yak ñnyịn ibot awo ke mbid idem ñnyịn, ukem naña ñnyịn iba, nọ ammọ ekaara mme iyak ke akpainyañ ye mme inuen ke ikpaanyọñ, ye mme ufene ye afịd ndiọi unamikọd, ye afịd mme unam e-esaañake ke isọñ.”
27Ndin Abasi amaabot awo ke mbid idem amọ,
ke mbid Abasi anye amaabot ammọ;
anye amaabot ammọ, awodeen ye awonwaan.
28Abasi amaadiọñ ammọ anyʌñ abo ammọ ate, “Itọt, inyʌñ iwak ke ibad; iyọhọ ederimbod inyʌñ isịn anye ke idak ndufo. Ikaara mme iyak ke akpainyañ ye mme inuen ke ikpaanyọñ ye afịd aduuwem ñkpọ e-esaañake ke isọñ.”
29Ndin Abasi amaabo, “Ami mminọ ndufo afịd eto se inwịm mfịd e-ebaaha ke afịd ederimbod ye afịd eto se inie mfịd ye ñkpasi ke esịd. Ammọ ediido ndidia inọ ndufo. 30Ami mmenọ afịd unam ke ederimbod ye afịd inuen ke ikpaanyọñ ye afịd aduuwem ñkpọ se isaaña ke isọñ, afịd ñkpọ se inie ibifịk uwem, ami mmenọ ammọ afịd awawa mbid nte ndidia.” Ndin amaado ntoro.
31Abasi amaakịt afịd se anye akenam, ke amaanekke afọn. Ndin ndubiayio ye ubakusen emaeba ke ayọhọ usen itiokeed.
Айни замон обунашуда:
Yenesis 1: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.