ROMMEI 3
3
1Kum e thei, Jihudimei swmei tuang tabui gaeng tuang naina cho? Gihruamhmei rui tabui gaengna cho? 2Kalam kathuicna khou mbu e! Rey liangmei khou, Ravguangc rui kalat Jihudimei khou nsinlou the. 3Tiki kaniw meic gaanvsaekc tei lwm nuh makpui zaeng rui, Ravguangc hei lwm nuh makmei de twna sa nina cho? 4Kiuc hamh e! Meic guayna saraamc ngam kan sini, Ravguangc thu saraamc ni tu hamh e.
“Nang sa pat pwkhou,
nang nchumh e twmei thay puni;
latzan khou nang ngam puni.”
twna hylouna nai e.#Kal 51.4
5Aniu simei taanhmei rui Ravguangc rui gaymei taanhmei ta tihow nthanlou e thei, aniu akumhna sa kho cho? Ravguangc rui kalungpuam aniu ruc khou tikeylou bammei hei kamei nkhuai e twna sa kho cho? (Maansei riak thei layna ai sa tuang e.) 6Kiuc hamh e! Ravguangc kamei nchumhmei taanh mak ge thei, akumhna kamei mbaanv ta latzan sw ngam nina cho?
7Ai saraamhmei hei rui Ravguangc thu saraamh makmeipu e twmei nthanna lyanlouna, hei tei rui Ravguangc hym tidaiclou e thei, tabui swna ata paapcmei e twna latzan sw bam nina cho? 8Kum e thei, “Gay khang aniu simei taanv taanc di kho,” twna aniu sa kho cho? Mi hei kumcna ai rui sa e twna meic gaanvsaekc rui akhou nkhamlouna ata sw zaklou the. Kaniw mi kumcna samei hei nkhuaimei e twmei hei nchumhmei latzan the.
Ravchaptatmei Gaanv Khat na Sini Maek ge
9Kum e thei, aniu Jihudimei hei Zentelmei suangc gay mbumei tuang#hamh e thei si ranvmei tuang nai bu cho? Kumc mak ge! Jihudimei ni, Zentelmei ni paapc ngamv bangc khou bam e twmei ai lyanlou kan the. 10Nthanmei Latrik rui sa e:
“Ravchaptatmei gaanv khat na sini maek ge,#Kal 14.1-3; 53.1-3
11ningtyngmei gaanv khat na sini maek ge,
Ravguangc ta phumei gaanv khat na sini maek ge.
12Meic guayna Ravguangc khou rui duc tat kan the;
kaniw guayna chaeng tat maanv ngam the;
meic gaanv khat na sini gaymei taanh mak khe,
gaanv khat na sini maek khe.
13Kaniw mwang tei laancloumei tarou kumc the;
kaniw baley khou rui simei, saraamhmei luangc pat the,
kaniw chy khou rui meic theic nimei nrui khay luangc pat the;#Kal 5.9; 140.3
14Kaniw mwang tei nkhucmei syang rui padik the.#Kal 10.7
15Meic swluai swtiat khang kaniw phay nthaan the;#Isa 59.7-8
16Kaniw tatloupui bamv kathuic khou sw kasic karoucna ganclou the.
17Kaniw hei chuzaenghmei chaeng thay mak khe;
18Kaniw khou Ravguangc ta pingmei maek khe.”#Kal 36.1
19Riakdanv khou hyloumei guay tei Riakdanv bangc khou bammei nunc khang e twmei aniu thay e. Hei tei rui maansei mwang guay ta thingclou khang khatni Ravguangc rui mbaanv kapwm ta latzan sw khang e. 20Kalam thu meic gaanv khat na sini Riakdanv ngaekpui paan rui Ravguangc mikzaw khou ravchaptatmei sw ngam mak ge. Kariak Latdanv tuang taanv thu maansei ta nang paapc taanc the twmei dinh khang de#Kal 143.2; Gal 2.16
Akumhna Ravguangc rui Aniu ta Ravchaptatmei Tiswlou Tu Cho?
21Ntaw thu, Riakdanv kazauh makna ravchaptatmei swpui chaeng Ravguangc rui ndauhlou the. Mi lam khou hei Mousi tuang Kariak Latdanv khatni Muhzwng nunc rui ni salou the. 22Mi kiu thu, Jisu Khrista khou lwmmei guay ta Ravguangc rui ravchaptatmei tiswlou the. Kakhakh kalangv nai dat mak khe.#Gal 2.16 23Kalam thu meic guayna paapc taanc ngam the, kumna Ravguangc tuang hymdaihmei tei guang tangh mak khe. 24Tiki Ravguangc rui, kazauzian paan rui kapha kaphy maekna kaniw ta ravchaptatmei tiswlou the. Mi hei kaniw ta tinyngswloumei Khrista Jisu paan rui e. 25-26Kazei rui paapc khaeng kuaklou khang, Ravguangc rui Khrista Jisu ta tii pat the; mi kuakloumei hei kakhou lwmpui paan rui laa khang e. Mi hei Ravguangc kamei thu nchumhmeipu e twmei lyan tuang e. Tat kanmei ganv khou tei thu, akhaengvlouna meic nunc paap guay tei zauc samlou the; tiki ntaw thu kamei hei thu nchumhmei taanhmeipu e twmei lyanna, kamei rui kaniw paap guay nsa ganclou dat mak khe. Kumna Jisu khou lwmmei guay ta ravchaptatmei tiswlou the twmei kamei rui lyanlou the.
27Kum e thei, aniu gaengh sw nuhpui lam tabui tuang naina cho? Khat sini maek ge! Mi kiu tabui zaeng rui cho? Aniu Riakdanv piupui paan rui cho? Kiuc hamh e! Lwmpui paan rui de! 28Kum thena, Riakdanv piupui paan rui hamhna, lwmpui paan rui aniu ta ravchaptatmei tiswlou the twmei thay the. 29Ravguangc hei Jihudimei Racguangc na dina cho? Zentelmei Racguangc ni hamh nah cho? Ngguay, kamei Zentelmei Racguangc ni de. 30Ravguangc thu akhat na de, kumna Jihudimei ta ni, Zentelmei ta ni kaniw lwmpui paan rui ravchaptatmei tiswlou puni.#Ria 6.4; Gal 3.20 31Kum e thei, lwmmei hei rui Riakdanv ti hei ganc thah? Ganh mak ge! Aniu Riakdanv ta nthukna sw bam de.
Айни замон обунашуда:
ROMMEI 3: RONGBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.