ROMMEI 11
11
Isaraelmei ruc khou Ravguangc Latzan
1Kum e thei Ravguangc rui kamei nunc ta ganc pat thena cho? Ganh mak ge! Ai kahak hei Isaraelmei e, Abraham kikta e, Benjamin kaikhwangmei e.#Phil 3.5 2Ravguangc kamei rui kapahloumei nunc ta ganc pat mak ge. Elija rui Ravguangc khou Isaraelmei ruc khou sa kanmei latbamv nthanmei latrik khou hylou bammei tei nangniw thay e. Mi khou tei mi kumna sa e: 3“Poubauhmei kaniw rui nang tuang muczwng nunc ta swluai kan the khatni nang tuang ravchabamv guay swra kan the; kumna nsaekcloumei kiu ai na di the. Kaniw rui ata ni swluai khang sw bam the.”#1 Ki 19.10,14 4Khoutei, “Baal ta kalum makmei meic ching chanei ai rui akhang lou bam de,” twna Ravguangc rui sa kan makna cho?#1 Ki 19.18 5Hei tei kumcna, ntaw ni Ravguangc kamei rui zauzian paan rui kadahloumei gaanvsaekc nai de. 6Kamei rui kaniw ta kadahmei hei kaniw taanv paan rui hamhna kazauzian paan rui de. Taanv paan rui khwan e thei kazauzian tei zauzian ling hamh ni tuang e.
7Kum e thei akumh tha? Isaraelmei nunc tei kaniw phu bammei tei laatow kan mak khe. Hei tei kamei rui kapahloumei mei kang katitna rui laatow kan the; baihmei guay ta tei thu kaniw lung titanc kan the. 8“Ravguangc rui kaniw lung khatni kaniw lungning ti-ndylou the; aseic nganv kaniw how mak khe, chu ni chu mak khe,” twna nthanmei latrik rui sa e.#Ria 29.4; Isa 29.10 9David rui sa e:
“Kaniw tuang khumngai tei kaniw khang phah sw kan di tho,
phaysuy bamv sw kan di tho,
riaploupui bamv sw kan di tho!#Kal 69.22-23
10Kaniw how mak khang kaniw mik zingc kan di tho,
kaniw ngumc nkuanna lungc bam kan di tho.”
11Jihudimei nunc phaysuymei hei bow nzut kan ni thah? Kum ni tu hamh e! Kaniw paap zaeng rui, Zentelmei khang ringhbamv guang the. Mi hei Jihudimei ta timamavlou khang e. 12Jihudimei paap zaeng rui mbaanv khang suaihiam dai phungc guang the, khatni kaniw suaimei rui Zentelmei khang suaihiam dai phungc guang the. Kum e thei, Jihudimei guang ntanghlou pwkhou thu adih daihmei suaihiam phungc guanglou puni cho!
Zentelmei khang Ringhbamv
13Ntaw ai rui Zentelmei nangniw khou sa tuang e: Ai Zentelmei khang latdiutatmei sw bammei zaeng rui atuang taanv ta thuanc bam puni. 14Mi kumna ai rui Jihudimei ta timamavloumei rui kaniw gaanvsaekc ta kanlou nuh khang e. 15Kalam thu kaniw ta ganc patmei rui mbaanv ta Ravguangc khou zay kariulou dat the. Kum e thei kaniw ta laalou dat pwkhou thu, akumh puni tha? Hei tei theihmei khou rui ringhmei sw puni!
16Ntyan dwm akhat tuang reymei kiak tei Ravguangc khang katlou kan e thei, ntyan dwm kapwm tei nthanmei di the; khatni thing bang akhat tuang kamaan guay tei Ravguangc khang katlou kan e thei, kachy guay tei ni nthanmei di the. 17Lingcloumei Olive bang tuang chy katapc ganc lana, nwmbangc tuang Olive chy nsuklou the. Zentelmei nang hei nwmbangc tuang Olive chy tei kumh tuang e, kumna ntaw thu nang Jihudimei tuang suaihiam guay tei laa the. 18Kumna thingchy katapc ganh kumcna ganc pat kanmei Jihudimei ta nang mala nuh mak ge. Nang gaengh sw nuh tuang tabui tuang naina cho? Nang thu kachy na de; nang rui kamaan ta makuat tu hamh e; kamaan rui nang ta makuat tu de.
19“Ngguay kiuc e, tiki kachy tei katapc ganc lana aniu ta lou dat lyn tuang di the,” twna nang sa nuh e. 20Hei tei nchumh e. Lwm ti makpui zaeng rui kaniw ta ganc kan the; lwm tipui zaeng rui nang ta lou lyn the. Tiki nang gaengh sw riu; mi phaan tei ping o. 21Kabang tuang chy kumhmei Jihudimei ta sini ganc pat re thei, nang ta thu ganc pat dat pw lak khe twna ningna cho? 22Ravguangc hei adih zauzian thay cho khatni adih katuang latzan tanc cho twmei aniu mi khou rui thay e. Latliammei nunc ruc khou thu katuang latzan tanhmei keylou the; tiki nang ta thu kamei nzianmei lungc khou bam pwkhou kamei rui zauc nzianlou the. Tiki nangniw ta ni kakhou bam ti mak ge thei, ganc puni de. 23Jihudimei nunc rui lungh laicna lwm dat pwkhou, kaniw ta guang duanclou dat puni; kalam thu kaniw ta guang duanclou dat khang Ravguangc kamei ngam de. 24Zentelmei nang hei thu nwmbangc tuang Olive chy ta kalwnlungh bang khou rui ramtap pat lana katuang bang hamhmei lingcloumei Olive bang khou duancloumei tei kumh tuang de. Jihudimei nunc hei lingcloumei Olive bang kumh tuang e. Mi ramganc kanmei chy nunc ta tei kabang khou guang duanclou dat khang thu chiwmei de.
Ravguangc rui Meic Guayna ta Zauc-nzianloumei
25Chanathiu, nangniw rana nangniw ta ningtyngmei nunc e twna kakhanh bam mak khang, nangniw mi hei thay kanmei ta ai laa nii e: Isaraelmei kaniw lung tanc bammei hei tingsaeng tanc bam ni tu hamh e; Zentelmei Ravguangc khou guang nimei sing guang ntangh mak saanv khang na de. 26Mi hei kumcna Isaraelmei guayna ta kanlou puni. Nthanmei latrik rui sa e:
“Kanloumeipu Zaion khou rui guang puni,
kumna simei taanv guay Jakob kikta nunc khou rui laa ganc puni.#Isa 59.20
27Ai rui kaniw paap guay laa ganclou pwkhou,
ai rui kaniw lev mi latryan hei sw puni.”#Jer 31.33-34
28Gaychamv lam khou thu Jihudimei nunc hei Ravguangc khang zauczihmei nunc sw the; tiki Zentelmei nangniw khang thu hei tei gaeng the. Kum khwan sini Ravguangc rui kapahloumei lam khou thu kaniw hei kaniw pupouc nunc zaeng rui Ravguangc rui nzianmei nunc e. 29Kalam thu kamei rui kapahloumei khatni suaihiamloumei nunc lam khou kalung kalaih mak ge. 30Zentelmei nangniw hei tat kanmei ganv khou Ravguangc lat piu makna bam khwan e; tiki Jihudimei rui lat piu makpui zaeng rui, nangniw Ravguangc zauzian laatow the. 31Hei tei kumcna, nangniw Ravguangc zauzian laa kanmei zaeng rui Jihudimei ni ntaw#Baanhhy baibal asaekc khou ntaw twmei hei maek ge. Ravguangc zauzian laa khang ntaw latliam bam tuang e. 32Kumna Ravguangc rui meic guayna ta latliammei tuang kangmei tiswlou the, mi hei kamei rui kaniw ta zauc nzianlou dat nuh khang e.
Ravguangc ta Thuanhmei
33Ravguangc thu gaat tuang nai dat makmeipu e, kaningting khatni karam thai kanganv maek ge! Thow rui katuang latzan tei thay tangc ngam nina cho? Thow rui kamei taanc bammei tei kabah thay ngam nina cho?#Isa 55.8 34Nthanmei latrik rui sa e:
“Thow rui Poubauhmei lungning thayna cho?
Thow rui kata ncham ngamna cho?#Isa 40.13
35Kamei khangclou dat khang
katuang tii ngammei thow naina cho?”#Job 41.11
36Kalam thu ramh guayna hei kamei rui damclou tuang de, khatni ramh guayna hei kapaan rui khatni kakhang rui nai bam tuang de. Hymdaihmei hei Ravguangc khang tingsaeng sw diu! Amen.#1 Ko 8.6
Айни замон обунашуда:
ROMMEI 11: RONGBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.