MARK 12
12
Drakha Lau Saanvmei Latgiam
(Met 21.33-46; Luk 20.9-19)
1Khoutei Jisu rui latgiam zayna kaniw khou sa thau the: “Meic gaanv khatpu drakha lau lingclouna karaengv raengclou the, drakha dui sunhpui khunc kasiamhlou the, khatni lauphaan kai swlou the. Kumna hei tei lau nngemei nunc khou saanvlouna tat kan the.#Isa 5.1-2 2Kathai minhpui ganv guang pwkhou, kathai laa khang kabangc gaanv khat ta lau nngemei nunc khou tei ndiu guang the. 3Khoutei kaniw rui kata nymna bai lana kabaanc raeng thouc hanc dat the. 4Khoutei kamei baihmei bangc gaanv khat ta ni kaniw khou ndiulou dat re. Khoutei kaniw rui kapy sw nzamhlou the khatni sw zaklou the. 5Baihmei bangc akhat ta ni kamei rui ndiu guang dat re. Kumna mi ta tei kaniw rui swluai the. Baihmei mpeyna ta kamei rui ndiu guang e; tiki gaanvsaekc ta bai the, gaanvsaekc ta swluai the. 6Ndiulou dat khang gaanv khat nai he. Mi kiu kamei nzianmei nac mpouh e. ‘Anac mpouh ta thu kaniw chakhwang swlou pungh di the,’ twna sana kata nkhamh liang khou kaniw khou ndiu guang the. 7Tiki mi lau nngemei nunc tei kaniw pang khou mi kumcna sa the, ‘Mi hei katuang tampy luak nimeipu the; guang tho, aniu kata swluai di kho, kumna katuang hei aniu khang laa di kho.’ 8Kumna kaniw rui kata nymna swluai the, kumna kata drakha lau paengc thangc ganc pat the.
9“Drakha lau pouc tei rui tabui sw puni bo? Kamei guangna lau nngemei nunc ta tei swluai puni, kumna drakha lau tei meic baihmei khang tii dat puni. 10Nangniw mi kumcna hylou bammei hei pah mak he nah cho?
‘Kai swmei nunc rui ganc patmei tauc rui,
kaikwnpy tauc sw the.#Kal 118.22-23
11Mi hei Poubauhmei taanv e;
mi hei aniu ramninglou khou kadath dat tuang e.’ ”
12Khoutei Jisu ta nym khang kaniw kachaeng phu the. Kalam thu mi latgiam hei kaniw ta sa bam tu e twmei kaniw thay khwan e. Tiki kaniw meic nunc ta ping khwan e, kumna kaniw kata ganclouna tat kan the.
Dihkhav Tiimei lam khou Thanvmei
(Met 22.15-22; Luk 20.20-26)
13Kalat khou rui nym khang twna kaniw rui Pharisimei khatni Herodmei gaanvsaekc ta Jisu daeng khou ndiu guang the. 14Kaniw guangna Jisu khou sa the, “Dinhpouc, nang hei maansei ta rouh tuang maekna latling sameipu e; kalam thu nang maansei ta zaw khu zaw ru zauh mak ge, kumna Ravguangc tuang chwn tei kaling dinc e twmei aniw thay e. Kumna Kaisar khang dihkhav tiimei hei Riakdanv thei layna nchumh ni nchumh mak cho? Mi hei aniw tii nina ny, tii lak nina cho?”
15Khoutei Jisu rui kaniw tuang rouc tei thay lana kaniw khou sa the, “Tabui swna nangniw ata nchanv bam tu cho? Denari#Mi hei syan zanc e akhat laaguang o, zauc kho.”
16Kaniw rui hei tei laaguang the. Khoutei Jisu rui kaniw khou sa the, “Mi hei thow maengc cho, khatni thow tuang e twna hylou bu cho?”
Khoutei, “Kaisar tuang,” twna kaniw rui daw the.
17Khoutei Jisu rui kaniw khou sa the, “Kaisar tuang tei Kaisar khang tii tio, Ravguangc tuang tei Ravguangc khang tii tio.”
Khoutei kaniw ngak the.
Theihmei khou rui Ringcthaumei lam Thanvmei
(Met 22.23-33; Luk 20.27-40)
18Theihmei ringcthau dat mak khe twna samei Saddukimei nunc Jisu daeng khou guangna thanvna kumna sa the,#Lat 23.8 19“Dinhpouc, thowkumhmei chana gaanv khat kanac maekna kanow ta ganclouna theic kan e thei, kakainac rui kachaic now ta kakhauh dat lana kachaic kikta tinailou nina e twna Mousi rui aniw khang hylou e.#Ria 25.5 20Chana gaanv chanei nai khwan e. Kumna gaanvthaihmeipu tei kanow kawna kanac maekna theic kan the. 21Khoutei kaneimeipu tei rui kata kakhauhna kanac maekna theic muay kan the. Kathumhmeipu tei ni, hei tei kumc muay the. 22Mi kumna gaanv chanei tei kaniw nac maek khe. Nkhamh khou ntumei tei ni theic the. 23Ringcthau datpui nungc kiu kaniw ringcthau pwkhou mi pui tei thow now sw nina cho? Kalam thu kaniw gaanv chanei rui kata kaw the.”
24Khoutei Jisu rui kaniw khou sa the, “Nangniw thay maanv the, mi hei nthanmei latrik khou hylou bammei tei khatni Ravguangc ngamv tei thay makpui zaeng rui hamh nah cho? 25Kalam thu theihmei khou rui ringcthau dat pwkhou, now kawmei khatni mihmei nai dat mak khe. Kaniw tingkauh thangc bammei baanchara nunc kumc puni the. 26Theihmei nunc ringcthau datmei lam khou thu, Mousi tuang latrik zy khou, thing phwam lam khou hyloumei tei nangniw pah mak he nah cho? ‘Ai hei Abraham Racguangc e, Isak Racguangc e, khatni Jakob Racguangc e,’ twna Ravguangc rui Mousi khou sa e twmei hylou mak nah cho?#Tat 3.6 27Kamei hei theihmei nunc tuang Racguangc hamh e, ringc bammei nunc tuang de. Nangniw mpeyna nkhuai the.”
Daic Liangmei Latdanv
(Met 22.24-40; Luk 10.25-28)
28Khoutei Riakdanv dinhpouc gaanv khat guang the, kumna kaniw agi bammei tei kamei chu the. Jisu rui Saddukimei nunc khou daw chuyna daw bammei tei chu lana kamei rui Jisu khou, “Latdanv guayna pang khou tabui tei daic liangmei cho?” twna thanv the.#Luk 10.25-28
29Jisu rui mundawna sa the, “Daic liangmei kiu thu: ‘Nking o, he Isaraelmei, Kaipouc kiu thu aniu Poubauhmei Ravguangc na hei de.#hamh e thei Poubauhmei hei aniu Racguangc e, Poubauhmei na hei de. #Ria 6.4-5 30Kumna Poubauhmei nang Racguangc ta nang lung kapwm rui, nang ringcpaan kapwm rui, nang lungning kapwm rui khatni nang pumtan kapwm rui nzian nina e,’ twmei hei e. 31Kaneimei rui: ‘Nang tuang kaining kaigeimei ta nang rui nang ta nzianmei kumcna nzian nina e,’ twmei hei e. Mi khang suangc daihmei latdanv baihmei maek khe.”#Lev 19.18
32Khoutei Riakdanv dinhpouc tei rui Jisu khou sa the, “‘Dinhpouc, Ravguangc akhat na de, kamei hamhna baihmei maek ge.#Ria 4.35 33Kata lungh kapwm rui, lungning kapwm rui khatni pumtan kapwm rui nzianmei, khatni katuang kaining kaigeimei ta karana kata nzianmei kumcna nzianmei twmei hei kapumc kapwm rawna katmei khatni khaengmei guay suangc mbu taph tapmei e.’ twna nang samei hei nchumh the.”#Hos 6.6
34Mi pu tei ningtyngna daw e twmei how la khou, “Nang Ravguangc guangcdic khou rui duh mak khe,” twna Jisu rui kakhou sa the.
Mi tangv thu meic gaanv khat na sini kakhou lat thanv dat bauh mak khe.
Messia lam khou Thanvmei
(Met 22.41-46; Luk 20.41-44)
35Ravkai khou nchamlou bam khou Jisu rui mi kumcna thanv the, “Khrista hei David Nac Mpouh e twna akumhna Riakdanv dinhpouc nunc rui sa tu cho? 36Bumaengh Nthanmei paan rui David rui sa e:
‘Nang ta zauczihmei nunc ta nang
phaypav bangc khou lou mak saanv,
nang abaanzat thangc dungc bam o,
twna Ringhpouc rui apoucbauhmei khou sa e.’#Kal 110.1
37“David rui kata ‘Poubauhmei’ twna kaw e, kum e thei akumhna Khrista hei kanac nina cho?” Meic kangdai tei neihlana kalat nking the.
Riakdanv Dinhpouc nunc khou rui Suriak Thay o
(Met 23.1-36; Luk 20.45-47)
38-39Kumna kamei rui nchamlou bam khou Jisu rui sa the, “Pheychuanh piuna ruan tat bam niimei, charuangc la khou kalumlou pwmei ta kahawmei, sinagog khou bamvdaih dungc niimei, khwm ngay bamv khou chakhwang bamv khou dungc niimei, maypui nunc kai kwam tumei, kum lana gaylwn swna karavsuai saenghmei Riakdanv dinhpouc nunc khou tei rui suriak thay o. 40Kaniw rui kadou chamei laana amaypui nunc kai khou rui kwam laa the kumlana ravsuai rui saengcna suaic the. Kaniw ruc khou keylou nimei latzan hei nrit diangc puni.”
Maypui tuang Puatkat
(Luk 21.1-4)
41Jisu syan kouc daeng khou dungcna meic nunc rui syan kouc khou syankangh phaiclou bammei ta zauc bam khwan e. Lungcgaymei mpeyna rui mpey peyna phaiclou bam khwan e. 42Khoutei lungcsimei maypui gaanv khat guangna matiak kanei, twmei thu pai akhat phaiclou khwan e. 43Khoutei kaziap nunc ta kadaeng khou kaw guangna kaniw khou sa the, “Ai rui nangniw khou kaling siakna sa tuang e: mi syan kouc khou phaiclou bammei pang khou, mi lungcsimei maypui tuang hei geic liang e. 44Kalam thu baihmei guay tei thu mpeyna naimei khou rui tii tuang de, tiki mi pui hei thu karam lungcsi khou naimei kapwm, kamei tu nimei phaan tii tuang e.”
Айни замон обунашуда:
MARK 12: RONGBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.