Sailm Dhaibhidh 62
62
Salm 62
1Le foighidinn tha m'anam bochd
feitheamh air Dia gu beachd:
'S ann uaith' tha furtachd agus fòir
orm air gach taobh a' teachd.
2'S e mhàin as carraig dhìdein dhomh,
is m'fhurtachd e ro‑dheas:
Mo thèarmann dìleas e faraon,
gu mòr cha ghluaisear mis'.
3Cia fhad a dhealbhar aimhleas leibh?
Làn-mharbhar sibh gu beachd,
Mar bhall' air chrith, 's mar ghàrradh dh'aom
tha leagadh oirbh a' teachd.
4O urram àrd ga thilgeadh sìos
tha 'n comhairlean a' ruith:
'S i 's miann leo breug: beannachd nam beul,
ach mallachd an taobh staigh.
5O m'anam, feith gu foighidneach
ri Dia a‑mhàin mar chleachd:
Oir annsan tha mo mhuinghinn threun,
's mo dhòchas fhèin gu beachd.
6'S e mhàin as carraig dhìleas dhomh,
's e mhàin mo shlàinte dheas:
Mo thèarmann daingeann e faraon,
mar sin cha ghluaisear mis'.
7Mo shlàinte tha 's mo ghlòir an Dia,
ris earbam fhèin a‑ghnàth:
Carraig mo neirt, 's mo thèarmann treun,
's e Dia, gu buan 's gu bràth.
8O phoball, cuiribh ann an Dia
ur dòchas anns gach àm;
Na fhianais dòirtibh mach ur crìdh';
's e Dia ar tèarmann ann.
9'S nì dìomhain daoine beag' gu fìor,
tha daoine mòr' nam brèig:
Air meidh rin tomhas, 's aotroim' iad
na dìomhanas gu lèir.
10Na earb à fòirneart, 's na dèan uaill
à reubainn no droch-bheairt:
Na socraich fòs do chrìdh' air stòr,
'n tràth chinneas saoibhreas leat.
11Do labhair Dia aon uair a‑mach:
siud chualas uair no dhà,
Gur leis an Dia tha cumhachdach
treis agus neart gach là.
12Tròcair, a Thighearn, buinidh dhut,
is gràsan mòr faraon:
Oir bheir thu rèir a ghnìomharan,
a luigheachd do gach aon.
Айни замон обунашуда:
Sailm Dhaibhidh 62: SD1992
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Comann Bhìoball na h-Alba (Scottish Bible Society) 1992.