Оятҳои маъмули Инҷил аз 1 Tomoteo 6

Паҳн кунед

Bïïxi gï gubukarhigakïdï ibui kïkiba aapi ixtumaxi xia duada ïrhiada gïr buaboidaraga tudu. Daiñi, ka kïïga maaxiko aa aapi buitapi mui odami sai buaboitudai aapi Suxi Kristo dai aidïpïrï Diuxi gï báí pïsai kïïgakïrï oidakana bïïxkïrï bïïtarï. Diuxi gï urhiñdi go kïïgakïrï oidakaragai bïïxkïrï bïïtarï tudu. Kaxkïdï gï agai xi kïïgakïrï oidaka aapi sai maatï taatana aapi ix taadaga xibi go bïïxkïrï oidakaragai. Gobai ïr gï maitïki oiditai aapi gïr buaboidaraga tudu.

Odami ix makïdï go ïï tuminxi adaimïi naana dukai gïpiïrï surhigïi tudu. Ïïmoko ka dagito go kïïgadukïdï buaboidaragai ïpï adaimïitai go tuminxi dai podukai ïïgi gïn abhana darai gïïpi soi ïrhiaragai.

Dïï gia odami ix makïdï xadutudai Diuxi dai bhai gïn ïrhidiña gobaikïdï ix makïdï bia ïgai xioma kïïga ïr gïn bipidakami ix bhai ix makïdï mui bia tuminxi.

Daiñi, aidïxi dada aatïmï tami oidigi daama mai biakatadai aatïmï toma lïïchi ixtumaxi. Dai xïxkadï koiyagi aatïmï mai bukamu ixtumaxi ïpï.

Aapi Timoteo, aagidañi go buaboitudadami ix makïdï gïn bipidaka sai mai gïgïrdukïdï gïn ïrhiada naana maaxi biakatai tami idi oidigi daama. Maiti gï agai xi buaboitudada ïgai buxtuidadï tudu po ïrhiditai xi gobai ïr soiñigadïka agai. Bïïxi gobai ugitimu tudu. Kaxkïdï gï agai bhaiyoma xi buaboitudada ïgai Diuxi. Ïgai ïr soiñigadï di. Ïgai gia mai ugiti agai dai ipïrhidi xi bhai gïr ïrhiada aatïmï. Kaxkïdï gïr maa ïgai mosïï ïï naana maaxi ixtumaxi bia aatïmï.

Daiñi, mui odami gïpiïrï susurhigïiña gïn bipida ïrhiditai. Kaxkïdï tudu ibuada ïrhidiña ïgai naana maaxi soimaaxkami. Pobïnïrhidi sai podukai gïn bipida agai. Gobai ïgai dai gïpiïrï surhitudai dai xia buayi oidakaradï bïïxkïrï bïïtarï.

Aagidañi go buaboitudadami ix makïdï kïïga gïn bidaka sai kïïga ibuada ixtumaxi ïr soiñi. Sai bïïxi bhai ïrhiaradïkïdï maakana soiñi xorai tïgitokagi tudu. Xi pobuadagi ïgai aidï gia kïïgakïrï óídakamu ïgai. Suxi Kristo maakimu ïgai gïïpi maitïki tïbagiana. Ïpïan dukamu gobai xi gïïpi bhai tuatadai ïgai maitïki tïbagiana ix makïdï mai ugiti agai.