MATIUS 7
7
Mangakim ra ulun
(Luk. 6:37-38, 41-42)
1“Pai' kau pangakim ra ulun bokon, koson kalo niayuk akimin kau ri Aki Kapuuno', 2#Mrk. 4:24sabap ri Aki Kapuuno' mangakim ramuyun koson akau mangakim ra ulun bokon. Panuku' ondo' alapon mino koson mangakim ra ulun bokon, panuku' raginio niayuk alapon ri Aki Kapuuno' koson mangakim ramuyun. 3Kua kakito min tipolon ru tataun ra mato ru ulun bokon, kaa' akau galama' kalo makatutun ra mokoondo' tataun makalu ra mato mino galama'? 4Kua pai' kau kalalaa' mindagu ra ulun bokon, ‘Ibok, paingkualo' ku tipolon ru tataun intor ra mato muno,’ kaa' mokoondo' tataun makalu ra mato mino galama'. 5Oi ulun maabau-abau! Ingkualo' poyo galing tataun makalu intor ra mato mino galama', bagu no makakito kau toojo am maalap min kaingkual tipolon no intor ra mato ru ulun bokon.
6“Pai' min pataaki' ondo' matulai no ra uku'; uku' no sumaguli' am mongokot ramuyun. Pai' min pataaki' ondo' maatang kaga' no ra bauwi; kikinjangin ayuk boo ru bauwi no.”
Pakitaak, paguyum am titiko' noyo
(Luk. 11:9-13)
7“Pakitaak kano am aniin kau. Paguyum kano am makatuum kau. Titiko' min kulobon no am ukabin kau. 8Moonong ulun makitaak, aniin; moonong ulun maguyum, makatuum; moonong ulun manitik ra kulobon, ukabin io. 9Kolondo' sangulun ama' mangani' ra anak nano ra batu amon ru makitaak io ra ruti'. 10Kapoam aniin ra kukuo amon ru makitaak io ra papait? 11Kabalu' pana malaat kau, mapandai kau niayuk mangani' ra moonsoi ra anak mino. Ama' min giu' ra suruga' pana masaga' mangani' ra moonsoi no ramuyun amon ru makitaak kau.
12 #
Luk. 6:31
“Baalo' min noyo ra ulun ra bokon, atan ondo' kasagaan min ilo mambaal ramuyun. Gitio noyo suang ru Ukum ri Musa am pangilaan ru nabi-nabi.”
Kulobon ra mapisok
(Luk. 13:24)
13“Subol kano ra kulobon ondo' mapisok no, sabap ra malangka' kulobon am malimparang ralan mongoi ra naraka! Masuang ulun maya' ra ralan ragitio. 14Kaa' mapisok kulobon am mapagon ralan ondo' sumuku' ra kaayagan motopot. Kalo masuang ulun mokoowot ra kaayagan ragitio.”
Puun am kawa' nano
(Luk. 6:43-44)
15“Ilalai' min ulun-ulun ondo' migiangku ra nabi. Rumatong ilo ramuyun tumilu ra domba, kaa' sotopot no ilo ti koson ra taani masangit. 16Mauligan min ilo ti intor ra binaal nilono. Bulungkut ra makaruui kalo manangkawa' ra anggur, am kusingan no kalo manangkawa' ra ara. 17“Koson niayuk ra puun ondo' malabung no, manangkawa' io ra moonsoi; am puun ondo' kalo malabung no, manangkawa' ra malaat. 18Puun malabung no kalo manangkawa' ra malaat kapoam puun ondo' kalo malabung no kalo manangkawa' ra moonsoi. 19#Mat. 3:10; Luk. 3:9Puun ondo' kalo manangkawa' ra moonsoi tagaron am suruin. 20#Mat. 12:33Koson raginio mauligan min ulun-ulun ondo' migiangku ra nabi intor ra binaal nilono.”
Kalo nakaulig Aku ramuyun
(Luk. 13:25-27)
21“Sala' ka ngaangai' ulun ondo' mindagu ra Aku Tuhan nilo masauk ra ulun ri Aki Kapuuno', kaa' ilo ayuk ondo' sumugut ra kasagaan ru Ama' Kuno giu' ra suruga'. 22Paat ra Orou Pupus no masuang ulun mampiau Raki', ‘Tuhan, sala' ka kia ralalom inggalan Muno nampatanou akai no ra Tanou Moonsoi; am ralalom inggalan Muno nampagiru' akai ra riwato-riwato, am niayuk nambaal ra masuang kaimuagan?’ 23#Mzm. 6:9Kaa' tumaam Aku risilo, ‘Kalo nakaulig Aku ramuyun! Pagiru' kano intor Raki', akau ulun malaat!’ ”
Ruo ngaulun manambaloi
(Luk. 6:47-49)
24“Moonong ulun ondo' mangkirongog am gumagaya' ra raguon Kuno, io ti koson ra ulun mapintar ondo' mambaal ra baloi nano ra rasawat ru batu. 25Paat ra rumasam maawas, mampaliur am masiob ru bagiu' mapuor, baloi ti kalo matungkob sabap ra pinatampak ra batu.
26“Moonong ulun ondo' mangkirongog ra raguon Kuno kaa' kalo gagayaan no, io ti koson ra ulun bungas ondo' nambaal ra baloi nano ra tampak ru agis. 27Paat ra rumasam maawas, mampaliur am masiob ru bagiu' mapuor, baloi no pana matungkob am malunsai boo toojo.”
Kuasa' ri Jisus
28 #
Mrk. 1:22; Luk. 4:32 Kopongo i Jisus minindagu raginio, ulun masuang no nangimuag ra pangilaan Nano, 29sabap ra Io nangila' mabaya' ra kuasa', sala' ka koson mangingila'-mangingila' ra Ukum ri Musa.
Hakcipta © Bible Society of Malaysia, 2013.