MATIUS 27
27
Pinauma' i Jisus ri Pilatus
(Mrk. 15:1; Luk. 23:1-2; Jua. 18:28-32)
1Paat ra tumawang ngaangai' tingganai imam Jaudi am tingganai ru ulun ru Jaudi namatas ra mamatoi ri Jisus. 2Bangkilo' nilo Io am ibito' paumaan ri Pilatus, gabenor karajaan Roma.
Pinatayan ri Judas
(Rin. 1:18-19)
3 #
Rin. 1:18-19
Paat ri Judas, ondo' nampataak ri Jisus ra pantula' Nano, nakakito ri Jisus inukuman ra potoyon, pansagulian boo guang nano. Alapo' no boo ruit pirok no ongoyo' pasagulio' ra tingganai imam Jaudi am tingganai ru ulun ru Jaudi no. 4Kono, “Natulaan aku noyo sabap ra nampataak ra ulun kolondo' sala saboi inukum Io potoyo'!”
Kaa' taam ilo, “Pai' ru akai, okou nambaal!”
5Papatiro' ri Judas ruit no ra ralalom Baloi Tuhan am iruani' no ilo. Ugar io boo am ongoi sigot pantuwo.
6Anamo' ru tingganai-tingganai imam Jaudi ruit no am indagu, “Ruit ragitio alig ru raraa'. Sumugut ra Ukum ri Musa ruit ragitio kalo moonsoi pasubolon ra ralalom kaban panimungan ra ruit ru Baloi Tuhan takau ti.” 7Pabalio' nilo boo ruit ni ra sampila' tana' ru ulun manukang ra rarapu' koson ra intok pampalabangan ra ulun bansa' ra bokon. 8Ginio sabap ra saboi raino tana' no ininggalanan ‘Tana' Raraa'’.
9 #
Ja. 11:12-13
Kon raginio boo masauk bala' ondo' pinasaboi ri nabi Jirimia, kono, “Alapon nilo ruit pirok talu ngoopor i, ginio logo inaru' ru ulun ru Israil pambayar ra ulun nampataak ri Jisus i. 10Ruit no pinabali ra tana' ru ulun manukang ra rarapu' maya' ra susuban ru Tuhan raki'.”
Nangkuot gabenor Pilatus ra binaal ri Jisus
(Mrk. 15:2-5; Luk. 23:3-5; Jua. 18:33-38)
11Paat ri Jisus pinauma' ra gabenor Pilatus, kuati' Io, “Okou kia raja' ru ulun ru Jaudi?”
Taam i Jisus, “Rinagu mu noyo.” 12Kaa' kalo timinaam i Jisus ra atan ayuk panguwan ru tingganai-tingganai imam Jaudi am tingganai-tingganai ru ulun ru Jaudi.
13Ginio ra i Pilatus mindagu Riso, “Kalo kia norongog Mu ragu panguwan nilono Rirun?”
14Kaa' kalo timinaam i Jisus ra rondo' pana ragu, saboi gabenor no nangimuag.
Inukum i Jisus ra matoi
(Mrk. 15:6-15; Luk. 23:13-25; Jua. 18:39—19:16)
15Moonong masuku' Pangiantakan ra Paska, gabenor ti naindalom mampalabus ra sangulun inaput no maya' ra kasagaan ru ulun masuang. 16Paat raginio mokoondo' sangulun inaput ondo' mauligan, inggalan nali i Jisus Barabas. 17Paat ra ulun masuang nantitimung, pangkuot i Pilatus risilo, “Osoi kia kasagaan min labusin kuno ramuyun? I Jisus Barabas kia, kapoam i Jisus ondo' sabiton i Kristus?” 18Napandayan noyo ru gabenor ti ra mangusolon panguasa'-panguasa' ru ulun ru Jaudi am ginio sabap ra nampataak ilo ri Jisus riso.
19Paat ri Pilatus nanturung ra intok pangakiman no, panusub andu' nano ra sangulun mongoi pambala' riso, kono, “Pai' no babaya' mangukum Riso sabap ra Io ti ulun kolondo' sala, sabap ra magalabo aku ra naupi ku Io ra rondom i.”
20Kaa' tingganai-tingganai imam Jaudi am tingganai-tingganai ru ulun ru Jaudi nanusuk ra ulun masuang maa' raginio i Barabas palabuson am i Jisus ukumin ra potoyon. 21Pangkuot i Pilatus risilo, “Osoi kia intor ra ruo ngaulun ti kitaakon min palabuson kuno ramuyun?”
“I Barabas,” taam nilono.
22“Koson poyo raginio, atan kia baalon kuno ri Jisus ti ondo' sabiton i Kristus?” kon ri Pilatus risilo.
“Salipo' Io,” kon ru ulun masuang no.
23Kon poyo i Pilatus, “Atan kia sala ondo' binaal Nati?”
Ilo pana giminolok, “Salipo' Io.”
24 #
Sag. 21:6-9
Kalimani' ri Pilatus ra kolondo' onong io mingkotog mambaal raginio am ra ulun masuang maaru' lumunsai, alapo' no timug am bagui' no kalindu' nano am indagu, “Kolondo' tayar ku ra pinatayan Nano, akau ayuk ra kandoi.”
25Ngaangai' ru ulun no timinaam, “Polosoo' noyo akai am anak maino balasin ukumin sabap ra pinatayan Nano.”
26I Barabas boo pinalabus ri Pilatus, am panusub io ra saujor-saujor mampalapos ri Jisus am pataakin no risilo ra salipon.
Nagasab saujor-saujor Roma ri Jisus
(Mrk. 15:16-20; Jua. 19:2-3)
27Saujor-saujor Roma pana nagibit boo ri Jisus mongoi subol ra istana ru gabenor, am ngaangai' saujor no timung limpu ri Jisus. 28Aluso' nilo bayang ri Jisus am pambayango' ra sukub malia'. 29Pambaal ilo boo rondo' karaun intor ra bulisang makaruui am pasampako' nilo ra ulu ri Jisus. Saujor-saujor no niayuk nangani' Riso rondo' tataun ra kalindu' pamiris Nano am igugulatur ra saang Nano am pagasab Riso, “Tabi', raja' ru ulun ru Jaudi!” konilo. 30Tiwagi' nilo am alapo' nilo tataun no am palambaa' ra ulu ri Jisus. 31Pakapagasab ilo ri Jisus, aluso' nilo sukub no am pasulungo' saguli' bayang galama' ri Jisus. Ibito' nilo boo i Jisus mingkual ra ongoyon salipo'.
Sinalip i Jisus
(Mrk. 15:21-32; Luk. 23:26-43; Jua. 19:17-27)
32Paat ra ilo mingkual, kauma' nilo sangulun intor ra pekan Kirini ininggalanan i Simon. Jinajalan io ti mansaan ra salip ri Jisus. 33Suku' ilo ra rondo' intok ondo' ininggalanan ra Golgota, arati' no, ‘Intok kuapak’. 34#Mzm. 69:22Giu' no pinainum nilo i Jisus ra wain naratok ra tatapis ondo' mapait kaga'. Kaa' kakinami' no ayuk ginio, marara' Io boo manginum.
35 #
Mzm. 22:19
Salipo' i Jisus ru saujor-saujor am tatayaro' nilo bayang Nano ra magugundi' galing. 36Kopongo raginio panturung am tamungi' nilo Io. 37Rasawat ru salip Nano pinolokot rondo' papan ondo' tinulisan ra, “Gitio noyo i Jisus, raja' ru ulun ru Jaudi.” 38Nababaya' ri Jisus sinalip nilo ruo ngaulun mantatakou; sangulun sinalip tampilon ra pamiris am sangulun sinalip tampilon ra kait.
39 #
Mzm. 22:8; 109:25 Ulun-ulun ondo' mansail ra intok ti mamisik ra ulu am magasab ri Jisus, konilo, 40#Mat. 26:61; Jua. 2:19“Ragu Mu, ‘Lunsayon Ku Baloi Tuhan am baalon Ku saguli' buoi kataluan’! Amon ru Anak Kou ri Aki Kapuuno', ibayag no galama' am tuun ra salip no!”
41Koson niayuk ra tingganai imam Jaudi, mangingila' ra Ukum ri Musa am tingganai ru ulun ru Jaudi magasab ri Jisus, konilo, 42“Ulun bokon bayagon no, kaa' Io galama' kalo maalap no! Sala' ka kia Io ti raja' ru ulun ru Israil? Amon ru raino ti tumuun Io ra salip ti mangintopot akai Riso. 43#Mzm. 22:9Io ti malansan ri Aki Kapuuno' am rokoon no, ‘Anak Aku ri Aki Kapuuno'’. Moonsoi ilai' takau bayagon Io nua' ri Aki Kapuuno' raino.”
44Ulun-ulun mantatakou ra sinalip no pana nangiis Riso.
Pinatayan ri Jisus
(Mrk. 15:33-41; Luk. 23:44-49; Jua. 19:28-30)
45Paat ra tanga' ru orou, buoi talu nganjam pagun no liminondom. 46#Mzm. 22:2Paat ra jam katalu ra mamai', golok i Jisus ra bolos mosongou, “Ili, Ili, lama sabaktani?” Arati' no, ‘O Aki Kapuuno' Kuno, O Aki Kapuuno' Kuno, kua iruani' Mu Aku?’
47Kukula' ngaulun ondo' minigor ra giu' no nakaining ra golok no am indagu, “Nampiau Io ra nabi Ilia!” 48#Mzm. 69:22Sangulun intor risilo no pasimbul ongoi pangalap ra busak ru karang ondo' kalo mokotog. Pososopo' no boo ra wain mataris, pasusuko' no ra sambanis tataun malumot ondo' maawar am pasuwo' no ri Jisus.
49Kaa' indagu ulun-ulun ra bokon no, “Pai' poyo, ilai' takau galing amon ru matong nabi Ilia mamayag Riso!”
50Igondo' poyo i Jisus giminolok, am kaampus boo painawo Nano.
51 #
Kai. 26:31-33
Tabir ondo' pinatair ralalom Baloi Tuhan napiruo karilak intor ra rasawat suku' ra ragana'. Tana' ti nauyog am bulur batu nangapilang. 52Lobong-lobong nangaukab am masuang ulun ri Aki Kapuuno' ondo' minatoi binayag saguli'. 53Ingkual ilo intor ra lobong-lobong am kalupus i Jisus binayag saguli', ongoi ilo ra Jirusalim am giu' no masuang ulun nakakito risilo.
54Tingganai ru saujor am saujor-saujor ondo' nantamung ri Jisus ni nalaa' ilo kaga' paat ra ilo nakakito ra tana' ti nauyog am ngaangai' ondo' nasauk ni am indagu, “Motopot toojo Io ti Anak ri Aki Kapuuno'!”
55 #
Luk. 8:2-3
Mokoondo' masuang niayuk ruandu' ondo' nagilong intor ra maalur. Ilo ti minaya' ri Jisus intor ra libung ru Galilia am nangindangan Riso. 56Talu ngaulun intor risilo ti am i Maria Magdalina, i Maria ina' ri Jakubus am i Jusup, am andu' ri Jibidius.
Nampalabangan ri Jisus
(Mrk. 15:42-47; Luk. 23:50-56; Jua. 19:38-42)
57Paat ra palunggai', sangulun ra maamaya' ri Jisus intor ra pekan Arimatia ondo' ininggalanan i Jusup minatong. 58Uma' io ri Pilatus am kitaako' no baangkai ri Jisus. Panusub boo i Pilatus maa' raginio baangkai no pataakin riso. 59Alapo' ri Jusup baangkai no am kulumputo' no ra konoon linon ondo' baguon. 60Pabantaa' no baangkai ra lobong nano galama' ondo' bagu kopongo kinalian ra bulur batu. Luiro' boo ri Jusup batu maayo pinaangob ra luang ru lobong no am ugar. 61I Maria Magdalina am i Maria ra bokon no soroi manturung mamaar ra lobong no.
Nantamung saujor-saujor ra lobong ri Jisus
62Suabon no, paat ra orou Sabat, tingganai-tingganai imam Jaudi am ulun-ulun ru Parisi uma' ri Pilatus 63#Mat. 16:21; 17:23; 20:19; Mrk. 8:31; 9:31; 10:33-34; Luk. 9:22; 18:31-33am indagu, “Tuan, makara' mai paat magagabau no naayag, nakaindagu Io, ‘Mopongo kataluan bayagon Aku saguli'.’ 64Panusub ra saujor-saujor muno mantamung toojo ra lobong no buoi kataluan, maa' raginio maamaya'-maamaya' Nano kalo mantakou ra baangkai no am mindagu ra ulun, ‘Binayag Io noyo saguli' intor ra kapatayan.’ Sabap ra amon ru makapantakou ilo ra baangkai no, mumpara' boo abau tunungon nilo ra ulun intor ra abau nilo ragili.”
65Ragu ri Pilatus risilo, “Ongoi no am ibito' saujor-saujor am tamungi' toojo lobong no.”
66Ongoi ilo boo ra lobong i am tatandui' nilo ra meterai kulobon no koson mapandayan amon ru linuir angob i am poyo paayano' nilo saujor-saujor mantamung ra kulobon no.
Hakcipta © Bible Society of Malaysia, 2013.